Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. I.
1 And it is doon after the deth of
Moyses, the seruaunt of the Lord, that
the Lord spak to Josue, the sone of Nun,
the seruaunt of Moyses, and seide to hym,
Moyses,
2 my seruaunt, is deed; rise, and
-- --
passe ouer this Jordan, thow, and al the
puple with thee, into the loond that Y
shal &yogh;yue to the sones of Yrael.
3 Eche
place that the stap of &yogh;oure foot shal
treed, to &yogh;ow Y shal taak, as Y spak to
Moyses,
4 fro `deseert and Libane and
vnto the greet flood of Effrates; al the
loond of Etheus, vnto the greet see a&yogh;ens
the sunne goynge doun, shal be &yogh;oure
teerme.
5 Noon shal mowe to &yogh;ow to a&yogh;enstoond
alle the dais of thi lijf; as Y was
with Moyses, so Y shal be with thee;
Y shal not leeue, ne forsaak thee.
6 Tak
coumfort, and be strong; forsothe thow
shalt dyuyde bi lot to this puple the
loond, for the which Y haue swore to
thi faders, that Y take it to hem.
7 Take
coumfort therfor, and be ful strong, that
thow keep, and doo al the lawe, that
Moyses, my seruaunt, hath comaundid to
thee; ne bowe thow aside fro it to the
ry&yogh;t or to the left, that thow vnderstoond
alle thingis that thow dost.
8 The volym
of this law goo not awey fro thi mouth,
but thow shalt deuowtly think in it days
and ny&yogh;tis, that thow kepe and do alle
thingis that ben wryten in it; thanne
thow shalt make redi thi weie, and vnderstoond
it.
9 I comaunde to thee; tak
coumfort, and be strong; wole thow not
drede, and wole thow not be feerd; for
with thee is the Lord thi God in alle
thingis, to what euere thingis thow shalt
goo.
10 And Josue comaundide to the pryncis
of the puple, seiynge, Goo &yogh;e bi the myddil
of the tentis; and comaunde &yogh;e to the puple,
and seye &yogh;e,
11 Make &yogh;e redi to &yogh;ou
meetis, for after the thridde day &yogh;e shulen
passse ouer Jordan, and goo into the loond
to be weeldid, that the Lord &yogh;oure God
is to &yogh;yue to &yogh;ow.
12 Forsothe to Rubenytis,
and Gaddytis, and to the half lynage of
Manasse he seith,
13 Haue mynde of the
word that comaundide to &yogh;ow Moises,
the seruaunt of the Lord, seiynge, The
Lord &yogh;oure God hath &yogh;yue to &yogh;ow rest and
-- --
al the loond;
14 &yogh;oure wyues and &yogh;oure children
and beestis shulen dwelle in the
loond that Moyses hath taak to &yogh;ow bi&yogh;onde
Jordan; &yogh;e forsothe passith armed
before &yogh;oure bretheren, alle the stronge
men in hoond;
15 and fi&yogh;te &yogh;e for hem, to
the tyme that the Lord &yogh;yue rest to &yogh;oure
britheren, as and to &yogh;ow he hath &yogh;eue;
and that thei forsothe weelden the loond
that the Lord &yogh;oure God is to &yogh;yue to
hem; and so &yogh;e shulen turn a&yogh;en into the
loond of &yogh;oure possessyoun, and &yogh;e shulen
dwelle in it, that to &yogh;ow hath &yogh;euen Moises,
the seruaunt of the Lord, bi&yogh;ond Jordan,
a&yogh;ens the risynge of the sunne.
16 And
thei answerden to Josue, and seiden, Alle
thingis that thow hast comaundid to vs
we shulen doo, and whidir euer thow
seendist, we shulen goo;
17 as we han
obeishid in alle thingis to Moises, so and
we shulen obeyshe to thee; oneli the
Lord thi God be with thee, as he was
with Moyses.
18 Who a&yogh;en seith to thi
mouth, and obeishith not to alle the
wordis, `the whiche thow hast comaundid
to hym, dye he; thou oonly tak coumfort,
and do manlych.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
