Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. I.
1 James, the seruaunt of God, and of
oure Lord Jhesu Crist, to the twelue kynredis,
that ben in scateringe abrood, helthe.
2 My britheren, gesse &yogh;e, `or deme, al ioye,
whan &yogh;e shulen falle in to diuerse temptaciouns,
`or tribulaciouns,
3 witynge, that
the prouyng of &yogh;oure feith werchith pacience;
sotheli pacience hath parfijt werk,
4
-- --
that &yogh;e be parfijt and hool, in no thing
faylinge.
5 Forsothe if ony of &yogh;ou nedith
wisdom, axe he of God, `the which &yogh;iueth
to alle men largeli, and vpbraydith not;
and it shal be &yogh;ouun to him.
6 Sotheli axe
he in feith, no thing doutynge; forsothe
he that doutith, is lijk to a wawe of the
se, the which `of wijnd is moued and
born aboute.
7 Therfore gesse not `the
ilke man, that he shal take ony thing of
the Lord.
8 A man double of inwit is
vnstable in alle his weyes.
9 Forsothe a
meke brother glorye in his enhaunsinge,
sotheli a riche man in his mekenesse;
10 for
as the flour of hay, `or grasse, he shal
passe.
11 Sotheli the sunne `is sprungun vp
with brennynge, `or heete, and driede the
hay, and the flour of it fel doun, and the
fayrnesse of his cheere perischide; `so and
a riche man welewith in his weies.
12 Blessid
is the man, that suffrith temptacioun;
for whan he shal be proued, he shal receyue
the crown of lijf, the which God
a&yogh;en bihi&yogh;te to men louynge him.
13 No
man whan he is temptid, seie, for he is
temptid of God; sotheli God is vntempter
of yuel thingis, forsothe he
temptith no man.
14 Sotheli ech man is
temptid of his coueitinge, drawun fro resoun,
and snaarid, `or deceyued.
15 Thanne
coueityng, whan it hath conceyued, bringith
forth synne; sotheli synne, whan it
is fulfillid, gendrith deeth.
16 `And so, my
moost derworth britheren, nyle &yogh;e erre.
17 Ech best `thing &yogh;ouun, and al parfijt &yogh;ift
is fro aboue, comynge doun of the fadir
of li&yogh;tis, anentis whom is not ouerchaunginge,
nether schadewing of whileness, `or
tyme.
18 Forsothe wilfully he gendride vs
with the word of treuthe, that we be sum
bigynnyng of the creature of him.
19 Wite
&yogh;e, my britheren moost loued, be ech man
-- --
swift for to here, forsothe slowe for to
speke, and slowe to wraththe;
20 sotheli
the wrath of man werchith not the ri&yogh;twisnesse
of God.
21 For which thing `&yogh;e
castinge awey al vnclennesse, and plente
of malice, in myldenesse, `or homelynesse,
`receyue &yogh;e the word insent, `or
ioyned, that mai saue &yogh;oure soules.
22 Forsothe
be &yogh;e doers of the word, and not
herers onely, deceyuynge &yogh;ou silf.
23 For
if ony man is herer `of the word, and not
doer, this shal be comparsound, `or likned,
to a man biholdinge the cheere of his
birthe in a myrour;
24 sotheli he biheld
him silf, and wente, and anoon he for&yogh;at
`what maner he was.
25 Forsothe he that
`shal parfijtly biholde in the lawe of parfijt
fredom, and `shal dwelle in it, not
maad a for&yogh;etful herer, but a doer of
werk, this shal be blessid in his dede.
26 Forsothe if ony man gessith him silf for
to be religious, `not refreynynge his tunge,
but deceyuynge his herte, the religioun of
him is veyn.
27 This is a clene religioun,
and vnwemmyd anentis God and the fadir,
for to visite `pupilles, that is, fadirles or
modirles, `or bothe, and widewes in her
tribulacioun, and for to kepe him silf vndefoulid
fro this world.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
