CAP. VIII.
1 Al maundement that I comaunde to
thee to day be war bisili that thow doo,
that &yogh;e mowen lyue, and that &yogh;e ben
multiplied, and goon yn, &yogh;e weelden the
loond, for the which the Lord hath
sworn to &yogh;oure fadres.
2 And thow shalt
recorde of al the weie, bi the which the
Lord thi God hath lad thee fourti wintir,
bi deseert, that he traueyle thee, and
tempte; and weren knowun that in thin
inwitte weren styryd, whether thow
woldist kepe the heestis of hym, or noo.
3 He trauelde thee with scarsenes, and &yogh;af
to thee meet manna, the which vnknewe
thow, and thi fadres, that he shewe to
thee, that not in oonly breed lyueth man,
but in eche word of God, that goth out
of the mouth of the Lord.
4 Thi clothinge,
-- --
with the which thow were couerd,
for eelde faylide not, and thi foot was
not vndur bryssed, loo! the fourtith &yogh;eer
is;
5 that thow a&yogh;en thenke in thin herte,
for as a man techith his sone, so the
Lord thi God tau&yogh;te thee,
6 that thow
kepe the heestis of the Lord thi God,
and goo in the weies of hym, and drede
hym.
7 Forsothe the Lord thi God shal
lede thee into a good lond, the lond of
ryuers, and of watrys, and of welles, in
whos feeldis and hillis breken out gedrynges
of flodes;
8 the loond of whete,
and of barly, and of vynes, in the
which figis, and poomgernettis, and
olyues growen; the loond of oyle and
of hony;
9 where with out eny scarsenes
thow shalt eete thi breed, and thow shal
ful vse the plente of alle thinges; whos
stones ben yren, and of the hillis of it
ben doluen metallys of brasse;
10 that
whanne thow eetist, and were fulfillid,
thow blesse to the Lord thi God for the
best loond that he hath &yogh;eue to thee.
11 Kepe wel, and bewarre, lest eny tyme
thow for&yogh;ete the Lord thi God, and mysleue
the heestis of hym, and domes, and
cerymoyns, that Y comaunde to thee to
day;
12 lest after that thow etist, and were
fillid, feyr howses bildist, and dwellidist
in hem,
13 and hast droues of oxen, and
flockis of sheep, and plente of siluer, and
of gold,
14 and of alle thinges, thin herte be
reryd, and haue no mynde of the Lord
thi God, that hath lad thee out of the
loond of Egipte, and of the hows of seruage,
and thi leder was in greet wildernes,
15
and feerful, in the which was serpent
thur&yogh; blast brennynge, and scorpioun,
and `dipsas, that is, an eddre
that whom he bitith, he maketh thur&yogh;
threste die, and noon algatis watris; the
which ladde out ryueres of the moost
-- --
hard stoon,
16 and fedde thee with manna
in wildernes, the which knewen not thi
fadres. And after that he trauelde thee,
and strengthide, at the eende he hadde
mercy of thee,
17 lest thow seidist in thin
herte, My strengthe, and my&yogh;t of myn
hoond alle thes thingis to me han &yogh;euen.
18 But record thow of the Lord thi God,
that he strengthes hath &yogh;eue to thee, that
he fulfille his couenaunt,`vp the which
he hath sworne to thi fadris, as the present
day shewith.
19 If forsothe for&yogh;eten of
the Lord thi God, folwedist alien goddis,
and herye hem, and honoure, loo! now
Y before seye to thee, that vtterly thow
shalt perishe;
20 as the gentilis, that the
Lord dyde awey in thin entre, so and &yogh;e
shulen perishe, if inobeishaunt &yogh;e `shulen
be to the voys of the Lord &yogh;oure God.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
