1   And nowe, Irael, here the heestis and domys, that Y teche thee; that doynge them thow lyue, and goynge yn thow weelde the loond that the Lord God of &yogh;oure fadres is to &yogh;eue to &yogh;ow. 2   &YOGH;e shulen not adde to the word that Y speke to &yogh;ow, ne take awey from it; kepe &yogh;e the heestis of the Lord &yogh;oure God, the whiche Y comaunde to &yogh;ow. 3   &YOGH;oure eyen han seen alle thingis that the Lord dide a&yogh;ens Belphegor; what maner wise he hath brusid down al the heriers of it, fro the myddil of &yogh;ou. 4   Forsothe &yogh;e that cleuen to the Lord &yogh;oure God, lyuen alle, to the day that is nowe. 5   &YOGH;e witen that I tau&yogh;t &yogh;ow heestis, and ri&yogh;twisnesses, as hath comaundid to me the Lord my God; so &yogh;e shulen doo hem in the loond that &yogh;e ben to weeldynge, 6   and kepe and fulfille in dede. Forsothe this is &yogh;oure wisdam, and vndirstondynge before the puplys, that thei alle, herynge thes heestis, seyn, Loo! a wise puple and an vndirstondynge! a greet folk of kynde! 7   Ne there is other nation so greet, that hath goddis nei&yogh;ynge to hem, as oure God is ny&yogh; to alle oure holi preiers. 8   What is forsothe other folk of kynde so noble, that hath ceremoyns, and ry&yogh;twis domys,

and al the lawe, that I purpose to day before &yogh;oure eyen? 9   Keep therfor thi silf, and thi soule bisilich; ne for&yogh;eet thow the wordis that thin eyen han seen, and ne falle thei out of thin herte, alle the dayes of thi lijf. Thow shalt teche hem thi sones, 10   and thi sone sones; the day `the which thow stodist before the Lord thi God in Oreb, whanne to me spak the Lord, seiynge, Gedre to me the puple, that he here my wordis, and lerne to drede me al tyme that he lyueth in erthe, and teche he his sones. 11   And &yogh;e nei&yogh;eden to the root of the hyl, that brent vnto heuene; and there weren in it derknessis, and clowde, and mystynes. 12   And the Lord spak to &yogh;ow fro the myddil of the fier; the voyce of the wordis of hym &yogh;e herden, and the forme out ry&yogh;t saw&yogh; &yogh;e not. 13   And he shewide to &yogh;ow his couenaunt, that he comaundide that &yogh;e shulden doo, and the ten wordis, that he wroot in the two stonen tablis. 14   And to me he comaundide in that tyme, that I shulde teche &yogh;ow cerymoyns, and domes, that &yogh;e owen to doo in the loond that &yogh;e ben to weelden. 15   Kepe &yogh;e therfor bisiliche &yogh;oure soulis; &yogh;e han not seen eny lickenes, in the day that the Lord spak to &yogh;ou in Oreb, fro the myddil of fier; 16   lest perauenture disseyued &yogh;e maken to &yogh;ow a graued liknes, other ymage of maal, or of femaal; 17   liknes of alle beestis that ben vpon erthe, or of briddis vndur heuene fleynge, 18   and of crepynge beestis that meuen in the erthe, other of fisshis that vndir the erthe dwellen in watrys; lest perauenture the eyen reryd to heuene, 19    thou se the sunne, and the mone, and alle the sterris of heuene, and by errour disseyued thow honoure hem, and

herye, the whiche of nou&yogh;t maad the Lord thi God, into seruyce to al folk of kynde, that ben vndur heuene. 20   Forsothe the Lord took &yogh;ow, and ladde &yogh;ow oute fro the yren forneys of Egipte, that he haue a puple bi herytage, as it is in the day that is nowe. 21   And the Lord was wrooth a&yogh;ens me, for &yogh;oure wordis, and swore that I shulde not passe Jordan, ne goo into the best loond, that he is to &yogh;yuynge to &yogh;ow. 22   Loo! I dye in this erthe; I shal not passe Jordan; &yogh;e shulen passe, and weelde the noble loond. 23   Be war, lest eny tyme thow for&yogh;eete the couenaunt of the Lord thi God, that I made couenaunt with thee, and make to thee a graued liknes of hem that the Lord defendide to make. 24   For the Lord thi God fier wastynge is; a God gelows. 25   If &yogh;e geten sones, and sones sones, and dwelliden in the loond, and desseyued make to &yogh;ow eny liknes, doynge yuel before the Lord &yogh;oure God, that &yogh;e terren hym to wraththe, 26   witnesses Y inwardly clepe to day heuene and erthe, that soone &yogh;e ben to perishen fro the loond, that, Jordan ouerpassid, &yogh;e ben to weelden; &yogh;e shulen not dwelle in it long tyme, but the Lord &yogh;ou shal doo awey, 27   and scater into alle folkis of kynde, and &yogh;e shulen dwelle fewe in the naciouns, to whiche the Lord is to lede &yogh;ou. 28   And there &yogh;e shulen serue to goddis, the whiche bi hoond of men ben forgid of tree, and stoon, that seen not, ne heren, ne eten, ne smellen. 29   And whanne thou sechist there the Lord thi God, thow shalt fynde hym; so neuerthelater that with al thin herte thow seche, and

with al the tribulacioun of thi soule. 30   After that thee han foundun alle thingis that ben before seid, forsothe the last tyme thow shalt turne a&yogh;en to the Lord thi God, and thow shalt here the voyce of hym. 31   For a mercyable God the Lord thi God is; he shal not leeue thee, ne vtterlich doo a wey, ne he shal for&yogh;ete the couenaunt in the which he swore to thi fadris. 32   Ask thow of the oold dayes that weren before thee, fro the daye that the Lord thi God fourmede man vpon erthe, fro the hi&yogh;est of heuene vnto the hi&yogh;est of it, if there is doon eny tyme siche a maner thing, 33   or euer is knowun, that the puple herde the voyce of the God spekynge fro the myddil of fier, as thow herdist, and saw&yogh;; 34   if God dide, that he &yogh;ede in, and took to hym a folk of kynde fro the myddil of naciouns, bi temptaciouns, signes, and wondres, bi fi&yogh;t, and strong hoond, and strei&yogh;t out the arme, and orrible si&yogh;tes, after alle thingis that dide for &yogh;ow the Lord &yogh;oure God, in Egipte, seynge thin eyen; 35   that thow knewe for the Lord he a God, and there is noon other but oon. 36   Fro heuene he made thee to here his voyce, that he teche thee; and in the loond he hath shewid to thee his moost fier, and thow hast herde the wordis of hym fro the myddil of fier; for he hath loued thi fadres, 37   and chosun the seed of hem after hem. And he ladde out thee, goynge before in his greet vertue, fro Egipte, 38   that he doo awey moost naciouns, and the strengere, in thin entree, and in lede thee, and &yogh;eue to thee the loond of hem into possessioun, as thow biholdist in the day that is now. 39   Know thow therfor to day, and thenk in thin herte, that the Lord he is a God in heuene aboue, and in erthe benethe, and there is noon other. 40   Kepe thow the

heestis of hym, and maundements, that I comaunde to thee, that wel it be to thee, and thi sones after thee, and dwelle thow myche tyme vpon the erthe, that the Lord thi God is to &yogh;yue to thee. 41   Thanne Moyses seuerde thre citees, bi&yogh;onde Jordan, 42   at the est plage, that to hem flee&yogh; the which sleeth a nei&yogh;bour, not wilnynge, ne were enemy before oon and other day, and to oon of these citees my&yogh;te ascape; 43   Bosor, in wildernesse, that is set in the wijlde feeldi loond, of the lynage of Ruben; and Ramoth, in Galaad, that is in the lynage of Gad; and Golan, in Basan, that is in the lynage of Manasse. 44   This is the lawe that Moyses purposide before the sones of Yrael, 45   and these the witnessyngis, and cerymoyns, that he spak to the sones of Yrael, whanne thei wenten out of Egipte, 46   ouer Jordan, in the valey a&yogh;ens the `mawmet temple of Phegor, in the loond of Seon, kyng of Amorrei, that dwellid in Esebon, whom smoot Moyses. Forsothe the sones of Irael goon out of Egipte, weeldiden the loond of hym, 47   and the loond of Og, kyng of Basan, of the two kyngis of Amorreis, that weren bi&yogh;onde Jordan, at the rysynge of the sunne; 48   fro Aroer, that is set vpon the brenk of the streme of Arnon, vnto the hil of Seon, that is in Hermon; 49   al the pleyn bi&yogh;onde the Jordan, to the eest plage, vnto the see of widernes, and into the rotis of the hil of Phasga.

Previous section

Next section