1   Sones be &yogh;e of the Lord &yogh;our God; &yogh;e shulen not kut, ne make ballidnes, vpon the deed, 2   for `a puple holi thow art to the Lord thi God, and thee hath chosun that thow be to hym into a special puple, of alle gentilis that ben vpon erthe. 3    4   Ne eete &yogh;e thingis that ben vnclene. This is the beest that &yogh;e owen to eete; oxe, and sheep, 5   and she geet, hert, capret, bugle, `tragelaphum, that is, a beest in part lijk an hert, and in part lijk a goot, phigarg, origen, camelion, `that is, a beest lijk a camele in the heed, in the bodi to a paard, and in the nek to an horse, in the feet to a bugle, and pardelun, `that is, a litil pard. 6   Al beest that in two partis deuydith the clee, and chewith code, &yogh;e shulen eete. 7   And of thes that chewen code, and dyuyden not clee, thes &yogh;e shulen not eete; chameyl, haare, yrchun, for thei chowen code, and deuyden not the clee, thei shulen be vnclene to &yogh;ow; 8   a suwe forsothe, for she deuydith the clee, and chewith no code, she shal be vnclene; the flesh of hem &yogh;e shulen not ete, and the careyns &yogh;e shulen not towche. 9   Thes thingis &yogh;e shulen eete, of alle thingis that dwellen in watris; tho that han fynnys and scalis eete &yogh;e; 10   tho that with outen fynnys and scales ben, eete &yogh;e not, for thei ben vnclene. 11   Alle clene briddis eete &yogh;e; 12   vnclene eete &yogh;e not, that is, egle, and griffun, and a merlizon,02Q0005 and yron, 13   `that is, a whyte foul, lasse than a grijp, and of his kynde, and

gryip, 14   and kyte, aftir his kynde, and al thing of crowe kynde, 15   and ostrich, and ny&yogh;t foul, and a koote, and an hawke, after his kynde, 16   a gerfawkon, and a swan, and an ybyn, `that is a foule of Nyle flood, that puttynge his bille into his ers, purgith hym self, 17   and a dyuedap, a pellican, 18   and a ny&yogh;t crowe, a cormeraunt, and a jay, eche in his kynde, and a lapwynk, and a reremos. 19   And al that crepith, and hath fynnes, shal be vnclene, and not ben eten. 20   Alle that is clene, eete &yogh;e; al that is faln with deeth, 21   eete &yogh;e not of it. To the pilgryme that is with ynne the &yogh;atis &yogh;if that he eete, or sel to hym, for thow art an hooli puple of the Lord thi God. Thow shalt not seethe the kidde in the mylk of his moder. 22   The tenthe paart thow shalt seuer fro alle the fruytis that growen in thi lond, bi eche &yogh;eer; 23   and thow shalt eete in the si&yogh;t of the Lord thi God, in the place that he chees, that in it the name of hym be inwardli clepid, the dyme of thi whete, of wyn, and oyle; and the first gotun of droues, and of thi sheep thow shalt offre, that thow lerne to drede the Lord thi God, in al tyme. 24   Forsothe whanne lenger were the weye, and the place that the Lord thi God chees, and hath blessid to thee, ne thow mayst not to hym alle thes thingis brynge, 25   thow shalt selle alle, and into priys turne, and thow shalt bere in thin hoond, and go to the place that the Lord thi God chesith; 26   and thow shalt bigge of the same money what euere thing to the plese, other of droues, or of sheep; forsothe wyn, and sidre, and al that desyrith thi soule; and thow shalt eete before the Lord thi God, and shal eete, 27   thow, and thin hows, and the Leuyte that is with ynne thi &yogh;atis; be war

that thow forsake not him, for he hath noon other paart in thi possessioun. 28   The thridde &yogh;eer thow shalt seuer an other dyme of alle thingis that growen to thee that tyme, and put vp with ynne the &yogh;atis. 29   And the Leuyte shal come, that hath noon other paart ne possessioun with thee, and the pilgryme, and faderles child, and wedowe, that with ynne thi &yogh;atis ben; and thei shulen eete, and be fulfillid, that the Lord thi God blesse to thee, in alle the werkis of thin hoondes that thou shalt doo.

Previous section

Next section