1   Forsoth it is don at Iconye, that to gidere thei entriden into a synagoge of Jewis, and spaken, so that a plenteuous multitude of Jewis and Greekis bileueden. 2   Forsoth the Jewis that weren vnbileueful, reisiden persecucioun, and to wraththe stiriden the soulis of hethen men a&yogh;ens bretheren. 3   Therfore thei dwelliden moche tyme, doynge tristyli in the Lord, beringe witnessinge to the word of his grace, &yogh;yuynge sygnes and wondris for to be maad by the hondis of hem. 4   Forsothe the multitude of the citee is departid, and sotheli summe weren with Jewis, summe sothli with apostlis. 5   Forsoth whanne asawt of hethen men and Jewis was maad, with her princes, for to ponische with dispisingis, `or fals blamyngis, and stoone hem, 6   thei vndirstondinge fledden to gidere to the citees of Licaonye, Listris and Derben, and al the cuntree inuyroun. And thei weren there prechinge the gospel, and al the multitude is moued to gidere in the teching of hem. Poul sothli and Barnabas dwelten at Listris. 7   And sum man at Listris, syk in the feet, saat crokid fro his modris wombe, the which neuere hadde gon. 8   This herde Poul spekinge; the `which biholdynge him, and `seynge, for he hadde feith, that he schulde be maad saaf, 9   seide with greet vois, Ryse thou ri&yogh;t on thi feet. And he lepide, and walkide. 10   Forsoth the cumpanyes, whanne thei hadden seyn that that Poul dide, reriden her voys in Lycaon tunge, seiynge, Godis maad lyk to men camen doun to vs. 11   And thei clepiden Barnabas Jouem, Poul sothli Mercurie, for he was ledere of the word. 12   And the prest of

Jubiter, that was bifore the citee, bryngynge to bolis and crownes bifore the &yogh;atis, with peplis, wolde make sacrifice. 13   The which thing whanne apostlis, Barnabas and Poul, herden, `her cootis kitt to gidere, thei scipten out into the cumpanyes, `cryinge, 14   and seiynge, Men, what don &yogh;e this thing? and we ben deedly `men lyk to &yogh;ou, schewinge to &yogh;ou, `for to be conuertid fro these veyne thingis to quyk God, that made heuene, and erthe, and the see, and alle thingis that ben in hem; 15   the which in generaciouns passid lefte alle folkis entre into her weyes. 16   And sotheli not withoute witnessyng he `wel doynge lefte hym silf, fro heuene &yogh;yuynge reynes and tymis beringe fruyt, fulfillinge with mete and gladnesse &yogh;oure hertis. 17   And thei seyinge thes thingis, vnnethe swagiden the cumpanyes, that thei offriden not to hem. 18   Forsothe summe Jewis camen out fro Antiochie and Iconye, and, the cumpanyes sweteli `stirid, thei stoonynge Poul, drowen out of the citee, gessinge `him for to be deed. 19   Sothli disciplis enuyrownynge hym, he rysinge entride into the citee; and the suynge day he wente forth with Barnabas into Derben. 20   And whanne thei hadden euangelysid to `the ilke citee, and tau&yogh;t manye, thei turneden a&yogh;en to Listris, and Iconye, and Antiochie; confermynge the soulis of disciplis, 21   and monesting, that thei schulden dwelle in feith, and seiynge, For by manye tribulaciouns it bihoueth vs for to entre into the kingdom of heuenes. 22   And whanne thei hadden ordeyned prestis to hem by alle citees, and hadden preied with fastingis, thei bitoken hem to the Lord, into whom thei bileuyden. 23   And thei passinge

Persidie, camen to Pamphilie; 24   and thei spekinge the word of the Lord in Pergen, camen down in to Atalie. 25   And fro thennis thei wenten bi boot to Antiochie, fro whennis thei weren takun to the grace of God, in to the werk that thei fulfilliden. 26   Sothli whanne thei camen, and gedriden the chirche, thei telden how manye thingis God dide with hem, for he hadde opened to hethene men the dore of feith. 27   Forsothe thei dwelliden a tyme not litil with disciplis.

Previous section

Next section