Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIV.
1 Therfore rerynge crye al the puple,
wepte that ny&yogh;t,
2 and grucchiden a&yogh;ens
Moyses and Aaron, that is alle the sones
of Yrael,
3 seiynge, Wolde God we weren
deed in Egipte, and not in this wast wildernes;
wolde God we perisshen, and that
the Lord lede vs not into this loond, lest
we fallen bi swerd, and wyues and oure
free children ben lad caytyues; whethir
were it not beter to turne a&yogh;en into Egipte?
4 And thei seiden oon to that othere,
Ordeyn we to vs a duke, and turne we
a&yogh;en into Egipte.
5 The which thing herd,
Moyses and Aaron fellen redy into the
erthe, before al the multitude of the sones
of Yrael.
6 And forsothe Josue, the sone
of Nun, and Caleph, the sone of Jephone,
the whiche and thei hadden goon the
loond,
7 renten her clothes, and to al the
multitude of the sones of Yrael speken,
-- --
The loond that we han enuyrownde is
ful good;
8 if the Lord were mercyful, he
shal lede vs into it, and take the loonde
flowynge mylk and hony.
9 Wole &yogh;e not
be rebel a&yogh;ens the Lord, ne drede &yogh;e the
puple of this loond, for as breed so we
may deuowre hem; there is goo from
hem al helpe, the Lord is with vs, wole
&yogh;e not drede.
10 And whanne al the multitude
cryede, and with stonus wolden
throwe hem down, the glorye of the Lord
aperide vpon the roof of the boond of
pees, seynge alle the sones of Yrael.
11 And
the Lord seide to Moyses, How longe
shal this puple bacbite to me? How longe
shulen thei not leue to me, in alle the
signes that Y haue doon before hem?
12 Y
shal therfor smyte hem with pestilence,
and waast; thee forsothe Y shal make a
prince vpon a greet folk of kynde, and a
strenger than this is.
13 And Moyses seyde
to the Lord, That the Egipcyens heren, of
whos myddil thow hast ladde out this
puple,
14 and the dwellers of this loond, the
whiche han herde, for thow, Lord, in this
puple be, and with face to face thow be
seen, and thi clowde defende hem, and in
a pyler of a clowde thow goo before hem
bi day, and in a pyler of fier bi ny&yogh;t,
15 that thow slee so myche a multitude as o
man,
16 and seyn, thow my&yogh;tist not brynge
yn this puple in the loond for the whiche
he swore, and therfor he slew hem in
wildernes.
17 Thanne the strengthe of the
Lord be magnyfied, as thow hast sworne,
seiynge,
18 the Lord pacient, and of myche
mercy, doynge aweye wickednesse and
hidows trespassis, and no man giltles forsakynge,
the which visitist the synnes of
fadres into sones into the thridde and the
ferthe generacioun.
19 For&yogh;yue, Y preye, the
synne of this thi puple, aftir the greetnes
of thi mercy, as thow were merciable
-- --
to hem goynge out fro Egipte into this
place.
20 And the Lord seide, Y haue for&yogh;yue
to hem, after thi word.
21 Y lyue;
and fulfillid shal be the glorye of the
Lord, in al the loond;
22 netheles al men
that han seen my maieste, and my signes,
and that Y haue do in Egipte and in
wildernes, and han temptid me now bi
ten sithes, ne han obeshid to my voys,
23 shulen not seen the loond for the which
Y haue swore to the fadris of hem, ne
eny of hem that han bacbytide to me,
shal se it.
24 My seruaunt Caleph, that ful
of another spyryt hath folwid me, I shal
lede into this loond, that he hath goon
about, and the seed of hym shal welde it.
25 For the Amelechites and Chanane dwellen
in the valeys, to morwe `meue &yogh;e the
tentis, and &yogh;e shulen torne a&yogh;en into wildirnes,
bi the weie of the rede see.
26 And
the Lord spak to Moyses and Aaron,
seiynge,
27 How longe this moost shrewid
multitude grucchyth a&yogh;ens me? The
pleyntes of the sones of Yrael Y haue
herde.
28 Sey thanne to hem, Y lyue, seith
the Lord; as &yogh;e han spokun, herynge me,
so Y shal do to &yogh;ow;
29 in this wildirnes
shulen ligge &yogh;oure careyns. &YOGH;ee alle that
ben noumbrid, fro twenti &yogh;eer and aboue,
and han grucchid a&yogh;ens me,
30 &yogh;e shulen
not goon into the loond, vpon the which
Y haue reryde myn hoond, that Y make
&yogh;ow to dwelle, out take Caleph, the sone
of Jephone, and Josue, the sone of Nun.
31 &YOGH;oure litil children forsothe, of which &yogh;e
han seyde, that thei shulen be to preye
to the enemyes, Y shal lede yn, that thei
seen the loond, the which displesid to
&yogh;ow.
32 &YOGH;oure forsothe careyn shal ligge
in wildirnes;
33 &yogh;oure sones shulen be vagaunt
in deseert fourti &yogh;eer, and thei
shulen bere &yogh;oure fornycacioun, to the
-- --
tyme that the careyns of &yogh;oure faders
ben wastid in deseert,
34 after the noumbre
of fourti days, in the whiche &yogh;e han biholdun
the loond; a &yogh;eer for a day shal
be in noumbrid, and fourti &yogh;eer &yogh;e shulen
resseyue &yogh;oure wickidnesses, and &yogh;e
shulen knowe my veniaunce.
35 For as I
haue spoke, so I shal doo to al this multitude
moost shrewid, that hath togidir
rysun a&yogh;ens me in this wildernes; it shal
fayle, and dye.
36 Therfor alle the men that
Moyses sente to beholde the loond, and
the whiche turned a&yogh;en, maden al the
multitude grucchen a&yogh;ens hym, mysseiynge
of the loond,
37 that it was yuel, ben
deed, and smytun in the si&yogh;t of the Lord.
38 Josue forsothe, the sone of Nun, and Caleph,
the sone of Jephone, lyueden, of alle
that wenten to beholde the loond.
39 And
Moyses spake alle thes wordes to alle the
sones of Yrael, and the puple weilide ful
myche.
40 And, loo! eerly firste arysynge,
thei steiden vp the cop of the hil, and
seiden, We ben redi to stye vp to the
place, of the which the Lord hath spokun,
for we han synned.
41 To whom Moyses,
Whi, he seith, ouerpassen &yogh;e the word of
the Lord, the which thing shal not falle
to &yogh;ow into good spede?
42 Wole &yogh;e not
stye vp, forsothe God is not with &yogh;ow,
lest &yogh;e fallen before &yogh;oure enemyes.
43 Amalechitees
and Chanane ben before &yogh;ow,
bi whos swerd &yogh;e shulen falle, for thi that
&yogh;e wolden not assent to the Lord, ne the
Lord shal be with &yogh;ow.
44 And thei blyndid
togidere styeden vp into the cop of the
hil; the arke forsothe of the testament
of the Lord and Moyses wenten not fro
the tentis.
45 And Amalecchite descendide,
and Chanane, that dwelten in the hil,
and smytynge hem, and hewynge togidere,
pursueden hem vnto Horma.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
