1   And the puple wente forthe fro Asseroth, pi&yogh;te the tentes in the deseert of Pharan. 2   And there the Lord spak to Moyses, 3   seiynge, Seend men that biholden the loond of Chanaan, that I am to &yogh;yuynge the sones of Yrael, eche of eche lynagis, of the princes. 4   And Moyses dide that the Lord hadde comaundid, fro the deseert of Pharan seendynge men princes, 5   of whom thes ben the names. Of the lynage of Ruben, Semmya, the sone of Zeccur. 6   Of the linage of Symeon, Saphat, the sone of Hury. 7   Of the lynage of Juda, Caleph, the sone of Jephone. 8   Of the lynage of Ysachar, Agal, the sone of Joseph. 9   Of the lynage of Effraym, Osee, the sone of Nun. 10   Of the lynage of Beniamyn, Phalti, the sone of Raphu. 11   Of the lynage of Zabulon, Gedihel, the sone of Sody. 12   Of the lynage of Joseph, Gaddi, of the septre of Manasse, the sone of Susy. 13   Of the lynage of Dan, Ammyhel, the sone of Gemalli. 14   Of the lynage of Aser, Sur, the sone of Mychael. 15   Of the lynage of Neptalym, Nabdi, the sone of Naphi. 16   Of the lynage of Gad, Guhel, the sone of Machi. 17   Thes ben the names of the men, the whiche Moyses sent to biholde the loond of Chanaan; and he clepide Osee, the sone of Nun, Josue. 18   Thanne Moyses sente hem to biholde the loond of Chanaan, and seyde to hem, Stye &yogh;e vp bi the sowth plage;

and whanne &yogh;e come into the hillis, 19   beholde &yogh;e the loond, what it is; and the puple that is dweller of it, whethir it be stronge, or feble, fewe in noumbre, or many; 20   that loond, good, or yuel; what maner citees, wallid, or with outen wallis; the erthe, 21   fat, or bareyn, wodi, or with outen trees. Be &yogh;e comfortyd, and brynge &yogh;e to vs of the fruytis of that loond. It was forsothe tyme, whanne now the before rijp grapes my&yogh;te be eete. 22   And whanne thei steyden vp, thei enserchiden the loond, fro the deseert of Syn vnto Rohob, hem entrynge Emath. 23   And thei styeden vp to the sowth, and camen into Ebron, where weren Achyman, and Sisay, and Tholmay, the sone of Enath; forsothe Ebron seuen &yogh;eris before Thannyn, the cytee of Egipte, is maad. 24   And thei goynge vnto the rennynge watir of the clustre, kyttiden a vyn with his grape, the which two men beeren in a staf; of the powmgarnettis forsothe, and of the figis of that place thei token, 25   the which is clepid Nehelescol, that is, the rennynge water of the clustre, for thi that the children of Yrael brou&yogh;ten thens a clustre. 26   And the spiers of the loond turneden aftir fourti days, al the regioun goon about, 27   thei camen to Moyses, and to Aaron, and to al the companye of the sones of Yrael, into deseert of Pharan that is in Cades. And thei speken to hem, and to al the multitude thei shewiden the fruytis of the loond. 28   And thei tolden, seiynge, We camen to the loond, to the which &yogh;e senten vs, the whiche forsothe flowith mylk and hony, as of thes fruytis it may be knowe; 29   but moost stronge dwellers it hath, and greet citees, and wallid; the lynage of Enachym we han seen there; 30   Amalech dwellith in the

sowth; Etheus, and Jebuzeus, and Amorreus in the mownteyns; Chananeus forsothe dwellith biside the see, and about the flodis of Jordan. 31   Amonge thes thingis Caleph swagynge the grucchynge of the puple, that spronge a&yogh;ens Moyses, seith, Stie we vp, and weeld we this loond, for we mowen gete it. 32   Other forsothe that weren with hym, seiden, Nay, to this puple we ben not my&yogh;ti to stye vp, for strenger than we he is. 33   And thei mysseiden of the loond that thei bihelden, anentis the sones of Yrael, seiynge, The loond that we han passid deuowrith his dwellers; the puple the which we han biholde is of huge stature; 34   there we seyen thingis passynge the course of kynde, of the sones of Enach, of the kynde of geauntis, to whiche comparysound as locustis we weren seen.

Previous section

Next section