Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVI.
1 Thes thingis I haue spokun to &yogh;ou,
that &yogh;e ben not sclaundrid.
2 Thei schulen
-- --
make &yogh;ou with oute synagogis, but the
our cometh, that ech man that sleeth &yogh;ou,
deme him silf for to &yogh;yue sacrifice to
God.
3 And thei schulen do to &yogh;ou thes
thingis, for thei han not knowe the fadir,
nethir me.
4 But thes thingis I spak to
&yogh;ou, that whanne the our of hem schal
come, &yogh;e haue mynde, for I seide to &yogh;ou.
5 I seide not to &yogh;ou thes thingis fro the
bigynnyng, for I was with &yogh;ou. And now
I go to him that sente me, and no man
of &yogh;ou askith me, Whidur `thou goist?
but for I haue spokyn to &yogh;ou thes thingis,
6
sorwe, `or heuynesse, hath fulfillid &yogh;oure
herte.
7 But I seie to &yogh;ou treuthe, it spedith
to &yogh;ou, that I go; sothli if I schal not
go a wey, the coumfortour schal not come
to &yogh;ou; forsoth if I schal go a wey, I schal
sende hym to &yogh;ou.
8 And whanne he schal
come, he schal reproue the world of synne,
and of ri&yogh;tfulnesse, and of dom.
9 Forsothe
of synne, for thei han not bileuyd in
to me;
10 forsothe of ri&yogh;tfulnesse, for I go
to the fadir, and now &yogh;e schulen not se
me;
11 forsothe of dom, for the prince of this
world is now demyd.
12 &YOGH;it I haue many
thingis for to seie to &yogh;ou, but &yogh;e mown
not bere now.
13 Sotheli whanne `the ilke
spirit of treuthe schal come, he schal teche
&yogh;ou al treuthe; sothli he schal not speke
of him self, but what euere thingis he
schal heere, he schal speke; and he schal
telle to &yogh;ou the thingis that ben to comynge.
14 He schal clarifie me, for of myne
he schal take, and schal telle to &yogh;ou.
15 Alle
thingis, what euere thingis the fadir hath,
ben myne; therfore I seide to &yogh;ou, for of
myne he schal take, and schal telle to &yogh;ou.
16 A litil, and now &yogh;e schulen not se me; and
eft a litil, and &yogh;e schulen se me, for I go
to the fadir.
17 Therfore summe of his disciplis
seiden to gidere, What is this thing
-- --
that he seith to vs, A litil, and &yogh;e schulen
not se me; and eft a litil, and &yogh;e schulen
se me, for I go to the fader?
18 Therfore
thei seiden, What is this, that he seith to
vs, A litel? we witen not what he spekith.
19 Forsothe Jhesu knew, for thei wolden axe
him, and he seide to hem, Of this thing &yogh;e
seken a mong &yogh;ou, for I seide, A litil, and
&yogh;e schulen not se me; and eft a litel, and
&yogh;e schulen se me.
20 Treuli, treuli, I seye
to &yogh;ou, for &yogh;e schulen morne and wepe,
forsothe the world schal enioye; forsothe
&yogh;e schulen be sorwful, but &yogh;oure sorwe
schal turne in to ioye.
21 Sothly a womman
whanne sche berith child, hath sorwe, for
hir our cometh; forsothe whanne sche hath
borun a sone, now sche thenkith not on
the `pressure, or charge, for ioye, for a
man is borun in to the world.
22 And therfore
&yogh;e han now sorwe, sothli eft I schal
se &yogh;ou, and &yogh;oure herte schal enioye, and
no man schal take fro &yogh;ou &yogh;oure ioye.
23 And in that day &yogh;e schulen not axe me
ony thing; treuli, treuli, I seie to &yogh;ou, if
&yogh;e schulen axe the fadir `ony thing in
my name, he schal &yogh;yue to &yogh;ou.
24 Til now
&yogh;e axiden not ony thing in my name; `axe
&yogh;e, and &yogh;e schulen take, that &yogh;oure ioye be
ful.
25 I haue spokun to &yogh;ou thes thingis in
prouerbis, `or derke saumplis; the our
cometh, whanne now I schal not speke to
&yogh;ou in prouerbis, but opynly of my fadir I
schal telle to &yogh;ou.
26 In that day &yogh;e schulen
axe in my name; and I seie not to
&yogh;ou, for I schal preye the fadir for &yogh;ou;
forsothe he the fadir loueth &yogh;ou,
27 for &yogh;e
han loued me, and han bileuyd, for I
wente out fro God.
28 I wente out fro the
fadir, and I cam in to the world; eftsoones
I leeue the world, and I go to the
fadir.
29 His disciplis seyen to him, Lo!
now thou spekist opynli, and thou seist
-- --
no prouerbe.
30 Now we witen, for thou
wost alle thingis; and it is no nede to
thee, that ony man axe thee. In this
thing we bileuen, for thou wentist out fro
God.
31 Jhesu answeride to hem, Now &yogh;e
bileuen.
32 Lo! the our cometh, and now
it cometh, that &yogh;e be disparplid, `or scaterid,
ech in to his owne thingis, and
leeue me aloone; and I am not aloone, for
the fadir is with me.
33 Thes thingis I
haue spokun to &yogh;ou, that &yogh;e haue pees in
me; in the world &yogh;e schulen haue pressing,
`or ouerleying, but `triste &yogh;e, I haue
ouercome the world.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
