Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIV.
1 And he seith to his disciplis, Be not
&yogh;oure herte disturblid, nether drede it;
&yogh;e bileuen in to God, and bileue &yogh;e in to
me.
2 In the hous of my fadir ben many
dwellingis; if any thing lesse, I hadde
seid to &yogh;ou, for I go for to make redy
to &yogh;ou a place.
3 And if I schal go, and
schal make redy to &yogh;ou a place, eftsoone
I schal come, and I schal take &yogh;ou to my
silf, that where I am, and &yogh;e be.
4 And
-- --
whidur I go, &yogh;e witen, and &yogh;e witen the
wey.
5 Thomas seith to him, Lord, we
witen not whidur thou goist, and hou
mown we wite the weye?
6 Jhesu seith
to him, I am weye, treuthe, and lyf; no
man cometh to the fadir, no but by me.
7 If &yogh;e hadden knowen me, sothli &yogh;e hadden
knowen and my fadir; and aftirward &yogh;e
schulen knowe him, and &yogh;e han seyn him.
8 Philip seith to him, Lord, schewe to vs
the fadir, and it suffisith to vs.
9 Jhesu
seith to him, So moche tyme I am with
&yogh;ou, and han &yogh;e not knowun me? Philip,
he that seeth me, seeth and the fadir.
Hou seist thou, Schewe to vs the fadir?
10 Bileuest `not thou, for I am in the fadir,
and the fadir is in me? I speke not of my
silf the wordis that I speke to &yogh;ou; sothli
the fadir dwellinge in me, he doith the
workis.
11 Beleue &yogh;e not, for I am in the
fadir, and the fadir is in me?
12 Ellis bileue
&yogh;e for thilke workis. Treuli, treuli, I seie
to &yogh;ou, he that bileueth in to me, and he
schal do the workis that I do; and he
schal do more workis than thes, for I
go to the fadir.
13 And what euere thing
&yogh;e schulen axe the fadir in my name, I
schal do this thing, that the fadir be glorified
in the sone.
14 If &yogh;e schulen axe ony
thing in my name, I schal do it.
15 If &yogh;e
louen me, `kepe &yogh;e my comaundementis.
16 And I schal preie the fadir, and he schal
&yogh;yue to &yogh;ou another coumfortour,
17 `the spirit
of treuthe, that he dwelle with &yogh;ou into
with outen ende; which spirit the world
may not take, for it seeth `not him, neither
woot him. Forsothe &yogh;e schulen knowe
him, for he schal dwelle at &yogh;ou, and he
schal be in &yogh;ou.
18 I schal not leeue &yogh;ou
fadirlees, I schal come to &yogh;ou.
19 &YOGH;it a litil,
and the world seeth not `me now; forsoth
&yogh;e schulen se me, for I lyue, and &yogh;e schulen
lyue.
20 In that day &yogh;e schulen knowe,
-- --
for I am in my fadir, and &yogh;ee in me, and
I in &yogh;ou.
21 He that hath my comaundementis,
and kepith hem, he it is that
loueth me; sothli he that loueth me, schal
be loued of my fadir, and I schal loue
him, and I schal schewe to him my silf.
22 Judas seith to him, not he of Scarioth,
Lord, what is don, for thou art to schewe
to vs thi silf, and not to the world?
23 Jhesus
answeride, and seide to him, If ony man
loueth me, he schal kepe my word; and
my fadir schal loue him, and we schulen
come to him, and we schulen make dwellinge
at him.
24 He that loueth me not,
kepith not my wordis; and the word
which &yogh;e han herd, is not myn, but his
that sente me, the fadris.
25 Thes thingis
I haue spokun `to &yogh;ou, dwellinge at &yogh;ou;
forsoth the Hooly Gost,
26 coumfortour,
whom the fadir schal sende in my name,
he schal teche &yogh;ou alle thingis, and schal
schewe, `or remembre, to &yogh;ou alle thingis,
what euer thingis I schal seye to &yogh;ou.
27 Pees I leeue to &yogh;ou, my pees I &yogh;yue to
&yogh;ou; not as the world &yogh;yueth, I &yogh;yue to
&yogh;ou; be not &yogh;oure herte disturblid, neither
drede it.
28 &YOGH;e han herd, for I seide to
&yogh;ou, I go, and come to &yogh;ou. If &yogh;e louedyn
me, forsoth &yogh;e schulden `haue ioye, for I
go to the fadir, for the fadir is more than
I.
29 And now I haue seid to &yogh;ou, bifore it
be don, that whanne it schal be don, &yogh;e
bileue.
30 Now I schal not speke many
thingis to &yogh;ou; forsoth the prince of this
world cometh, and he hath not `ony thing
in me.
31 But that the world knowe, for
I loue the fadir, and as the fadir &yogh;af comaundement
to me, so I do. Ryse &yogh;e, go
we hennis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
