CAP. XIII.
1 Forsothe bifore the feeste day of pask
Jhesu witinge, for his our cometh, that he
passe of this world to the fadir, whanne
he hadde loued hise that weren in the
world, in to the ende he louede hem.
2 And
the souper maad, whanne the deuel hadde
sent now in to the herte of Judas, `that
Judas of Symount Scarioth schulde bitraye
him,
3 he witinge for the fadur &yogh;af
alle thingis to him in to hondis, and that
he wente out fro God, and goth to God,
risith fro the souper,
4 and puttith his
clothis; and whanne he hadde takun a
lynnen cloth, he bifore girde him.
5 Aftirward
he sente water in to a basyn, and
bigan for to waische disciplis feet, and
to wype with the lynnen cloth, with
which he was bifore gird.
6 Therfore he
cam to Symount Petre, and Petre seith
to him, Lord, `waischist thou to me the
feet?
7 Jhesu answeride, and seide to him,
What thingis I do, thou woost not now;
forsothe thou schalt wite aftirward.
8 Petre
seith to him, Thou schalt not waische to
me the feet, in to with outen ende. Jhesu
answeride to him, If I schal not waische
thee, thou schalt not haue part with me.
9 Symount Petre seith to him, Lord, not
oonly my feet, but and the hondis and
the heed.
10 Jhesu seide to him, He that
is waischun, hath no nede no but that he
waische the feet, but he is clene al; and
&yogh;e ben clene, but not alle.
11 Forsothe he
wiste, who schulde bitraye him; therfore
he seide, &YOGH;e ben not clene alle.
12 Therfore
aftir that he waischide the feet of hem,
he took his clothis; and whanne he hadde
restid a&yogh;en, eft he seide to hem, `&YOGH;e witen
what I haue done to &yogh;ou.
13 &YOGH;e clepen me
maistir and lord, and &yogh;e seyn wel; forsoth
I am.
14 Therfore if I, lord and maistir,
-- --
haue waische &yogh;oure feet, and &yogh;e `owen to
waische another the totheris feet;
15 for I
haue &yogh;ouun ensaumple to &yogh;ou, that as I
haue don to &yogh;ou, so and &yogh;e do.
16 Treuli,
treuli, I seie to &yogh;ou, the seruaunt is not
more than his lord, neither apostle is
more than he that sente him.
17 If &yogh;e witen
thes thingis, &yogh;e schulen be blessid, if &yogh;e
schulen do hem.
18 I seie not of alle &yogh;ou,
I woot whiche I haue chosun; but that
the scripture be fillid, He that etith my
breed, schal reyse his heele a&yogh;ens me.
19 Treuli, treuli, I seie to &yogh;ou, bifore it be
don, that whanne it `schal be don, `&yogh;e
bileue for I am.
20 Treuli, treuli, I seye to
&yogh;ou, he that taketh whom euere I schal
sende, receyueth me; forsothe he that receyueth
me, receyueth him that sente me.
21 Whanne Jhesu hadde seid thes thingis,
he was troblid `in spirit, and witnesside,
and seide, Treuli, treuli I seie to &yogh;ou,
oon of &yogh;ou schal bitraye me.
22 Therfore
the disciplis lokiden to gidere, doutynge
of whom he seide.
23 Therfore oon of his
disciplis was restinge in the bosum of
Jhesu, whom Jhesu louede.
24 Therfore
Symount Petre bekenyde to him, and seith
to him, Who is it, of which he seith?
25 And so whanne he hadde restid a&yogh;en on
the brest of Jhesu, he seith to him, Lord,
who is it?
26 Jhesu answeride, He it is, to
whom I schal dresse breed dipped yn.
And whanne he had `dippid yn breed,
he &yogh;af to Judas of Symount Scariot.
27 And
aftir the morsel, thanne Sathanas entride
in to him. And Jhesu seith to him, What
thing thou dost, do thou sunnere.
28 Forsoth
no man sittinge at the mete wiste
this thing, to what thing he seide to him.
29 Forsothe summe gessiden, for Judas hadde
-- --
pursis, that Jhesu hadde seid to him, Bye
thou tho thingis, that ben nedeful to vs
at the feeste day, or that he schulde &yogh;yue
sum thing to nedy men.
30 Therfore whanne
he hadde take the morsel, he wente out
a non; forsoth it was ny&yogh;t.
31 Therfore
whanne he hadde gon out, Jhesu seide,
Now mannis sone is clarified, and God is
clarified in him.
32 If God is clarified in
him, and God schal clarifye him in him
silf, and a non he schal clarifie him.
33 Litil
sones, &yogh;it a litil I am with &yogh;ou; &yogh;e schulen
seke me, and, as I seide to the Jewis,
Whidur I go, &yogh;e mown not come; and to
&yogh;ou I seie now.
34 I &yogh;yue to &yogh;ou a newe
maundement, that &yogh;e loue to gidere, as I
louede &yogh;ou, that and &yogh;e loue to gedere.
35 In
this thing alle men schulen knowe, for
&yogh;e ben my disciplis, if &yogh;e `schulen haue
loue to gidere.
36 Symount Petre seith to
hym, Lord, whidir goist thou? Jhesu
answeride, Whidir I go, thou maist not
sue me now, but thou schalt sue aftirward.
37 Petre seith to him, Whi may I
not sue thee now? I schal putte my soule,
`that is, lyf, for thee.
38 Jhesu answeride,
Thou schalt putte thi soule, `that is, lyf,
for me? Treuli, treuli, I seie to thee, the
koc schal not crowe, til thou schalt
denye me thries.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
