1   And it was don aftirward, and Jhesu made iorney by citees and castelis, prechinge and euangelysinge the rewme of God, and twelue with him; 2   and summe wymmen that weren heelid of wickide spiritis and syknessis, Marie, that is clepid Mawdeleyn, of whom seuene deuelis wenten out, 3   and Jone, the wyf of Chuse, procuratour of Eroude, and Susanne, and manye othere, whiche mynystriden to him of her

riches. 4   Forsoth whanne ful moche cumpanye cam to gidere, and fro citees hastiden to him, 5   he seide by a liknesse, He that sowith, &yogh;ede out for to sowe his seed. And the while he sowith, sum felde by sydis the weye, and was defoulid, and briddis of the eyr eeten it. 6   And another felde doun on a stoon, and it sprungen vp dryede, for it hadde not moisture. 7   And anothir felde doun among thornes, and the thornes sprungen vp to gidere strangliden it. 8   And another felde doun in to good erthe, and it sprungun vp made an hundrid foold fruit. He seyinge thes thingis criede, He that hath eeris of heeringe, heere he. 9   Sothli his disciplis axiden him, what this parable was. 10   To whiche he seyde, To &yogh;ou it is &yogh;ouun to knowe the mysterie of the kyngdom of God; forsothe to othere men in parablis, that thei seynge se not, and thei heeringe vndirstonde not. 11   Sothli this is the parable. 12   The seed is Goddis word; sothli thei that ben bisydis the weye, ben thes that heeren; aftirward the fend cometh, and takith awey the word fro her herte, lest thei bileuynge be maad saaf. 13   Forwhi thei that `felden doun on a stoon, ben these `men whiche whenne thei han herd, receyuen the word with ioye. And thes han not roote; for at a tyme thei bileuen, and in tyme of temptacioun thei gon awey. 14   Forsothe `thes that felden doun in thornes, ben thes that herden, and of bysinessis, and richessis, and lustis of lyf thei goynge ben stranglid, and bryngen not a&yogh;ein fruyt. 15   Forsoth `this that felde

doun in to good erthe, ben thes men whiche, in good herte and best, heeringe the word holdun, and bryngen forth fruyt in pacience. 16   Forsoth no man li&yogh;tinge a lanterne hilith it with a vessel, ethir puttith vndir a bed, but on a candilsticke, that men entringe se li&yogh;t. 17   `Forsoth no thing is priuey, which schal not be openyd, neither hid, which schal not be knowun, and come into apert. 18   Therfore se &yogh;e, hou &yogh;e heeren; forsothe it schal be &yogh;ouun to him that hath, and who euere hath not, also this he gessith him silf to haue, schal be takun awey fro him. 19   Forsoth his modir and britheren camen to him; and thei my&yogh;ten not go fully to him for the cumpany of peple. 20   And it is told to him, Thi modir and thi britheren stonden with oute forth, willinge to se thee. 21   Which answeringe seide to hem, My moder and my britheren ben thes, whiche heeren the word of God, and don. 22   Forsoth it was don in oon of dayes, and he sti&yogh;ede in to a boot and his disciplis. And he seith to hem, Passe we ouer the stondinge watir. And thei sti&yogh;eden vp. 23   Sothli, hem rowynge, he slepte. And a tempest of wynd cam doun in to the watir, and thei weren driuen hidur and thidur with wawis, and weren in perel. 24   Forsothe thei comynge ny&yogh; reysiden him, seyinge, Comaundour, we perischen. And he risynge blamyde the wynd, and the tempest of watir; and it ceesside, and pesyblete was maad. 25   Forsoth he seyde to hem, Where is &yogh;oure feith? Whiche dredinge wondriden, `seyinge to gidere, Who, gessist thou, `is this? for he comaundith to wyndis and to the see, and

thei obeyen to him. 26   And thei rowiden to the cuntree of Gerasenus, which is a&yogh;ens Galilee. 27   And whanne he wente out to the lond, sum man ran to him, which hadde a deuyl now longe tymes, and was not clothid with cloth, neither dwellide in hous, but in sepulcris. 28   This as he sy&yogh; Jhesu, felde doun bifore him, and criynge with greet voys seide, What to me and to thee, Jhesu, the sone of `God the hi&yogh;este? I beseche thee, that thou turmente not me. 29   Sothli he comaundide to the vnclene spirit, that he schulde go out fro the man. Forsothe he took him longe tymes, and he kept in stockis was bounden with chaynes, and, the boondis broken, he was led of fendis in desert. 30   Sothli Jhesu axide him, seyinge, What name is to thee? And he seyde, A legioun; for manye fendis hadde entrid in to him. 31   And thei preiden him, that he schulde not comaunde hem, that thei `schulden go in to the depnesse. 32   Forsothe a flok of manye hoggis `was there lesewynge in an hil, and thei preieden him, that he schulde suffre hem to entre `in to hem. 33   And he suffride hem. Therfore fendis wenten out fro the man, and entride in to hoggis; and with bire the floc wente hedlinge in to the lake of watir, and was stranglid. 34   Which `thing, as thei that lesewiden sy&yogh;en don, thei fledden, and tolden in to the citee, and in townes. 35   Sothli thei &yogh;eden out to se that thing that was don. And thei founden the man sittinge clothid, fro whom the fendis wenten out, and in hool mynde at his feet; and thei dredden. 36   Sothli and

thei that sy&yogh;en tolden to hem, how he was maad hool of the legioun. 37   And al the multitude of the cuntree of Gerasenus preieden him, that he schulde go fro hem, for thei weren holde with greet drede. Sothli he sti&yogh;ynge in to a boot turned a&yogh;ein. 38   And the man of whom the fendis wente out, preied him, that he schulde be with him. Sothli Jhesu lefte him, seyinge, Go a&yogh;eyn in to thin hous, 39   and telle hou grete thingis God hath don to thee. And he wente thorw al the citee, prechinge, hou grete thingis Jhesu hadde don to him. 40   Forsothe it was don, whanne Jhesu hadde gon a&yogh;eyn, the cumpanye of peple receyuede him; forsothe alle weren abidinge him. 41   And loo! a man, to whom the name was Jayrus, and he was a prince of a synagoge; and he fel doun to the feet of Jhesu, preiynge him, that he schulde entre in to his hous, 42   for olypi dou&yogh;tir was to him almoost of twelue &yogh;eer, and this deiede. And it bifel, the while he wente, he was throngun of the cumpeny. 43   And sum womman was in flix of blood fro twelue &yogh;eer, which hadde spendid al hir catel in to lechis, nether my&yogh;te be curid of ony, 44   cam ny&yogh; bihynde, and touchide the hem of his clooth, and a non the flix of hir blood stood. 45   And Jhesu seith, Who is it that touchide me? Sothli alle men denyinge, Petre seide, and thei that weren with him, Comaundour, `cumpanyes thringen, and turmentyn thee, and thou seist, Who touchide me? 46   And Jhesus seide, Sum man touchide me, forwhi `and I haue knowe vertu `to haue gon out of me. 47   Sothly the womman seynge, for it was

not priuey, sche tremblinge cam, and felde doun bifore his feet, and for what cause sche hadde touchid him sche schewide byfore al the peple, and hou a non sche was heelid. 48   And he seide to hir, Dou&yogh;tir, thi feith hath maad thee saaf; go thou in pees. 49   `&YOGH;it him spekinge, sum man cam to the prince of the synagoge, seyinge to him, For thi dou&yogh;tir is deed, nyle thou trauaile the maystir. 50   Sothli this word herd, Jhesu answeride to the fadir of the damysele, Nyle thou drede, but `oonly bileue thou, and sche shal be saaf. 51   And whanne he `had come to the hous, he suffride not ony man for to entre with him, no but Petre and John and James, and the fadir and the modir of the damysele. 52   Sothli alle wepten, and biwayleden hir. And he seide, Nyle &yogh;e wepe, sothli the damysele is not deed, but slepith. 53   And thei scorniden him, witinge for sche was deed. 54   Forsothe he holdinge hir hond criede, seyinge, Damysel, ryse vp. 55   And hir spirit turnyde a&yogh;eyn, and sche roos anon. And he comaundide to &yogh;iue to hir for to ete. 56   And hir fadir and modir wondriden gretly; to whiche he comaundide, that thei schulden not seye to ony man `the thing that was don.

Previous section

Next section