Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XI.
1 And it was don, whanne he was preiynge
in sum place, as he ceesside, oon of
his disciplis seide to him, Lord, teche vs
to preye, as and John tau&yogh;te his disciplis.
2 And he seide to hem, Whanne &yogh;e preyen,
seye &yogh;e, Fadir, halewid be thi name. Thi
kyngdom come to.
3 &YOGH;yue to vs to day
oure eche dayes breed.
4 And for&yogh;yue to
vs oure synnes, as and we for&yogh;yuen to
ech owynge to vs. And leed `not vs in
to temptacioun.
5 And he seith to hem,
Who of &yogh;ou schal haue a frend, and schal
go to him at mydny&yogh;t, and schal seie to
him, Frend, leene to me thre loouys;
6 for
my frend cometh to me of the weye, and
I haue not what I schal sette bifore him.
7 And he withynne forth answeringe seye,
Nyle thou be noyful to me; the dore is
now schit, and my children beth with
me in the cowche; I may no&yogh;t ryse, and
&yogh;yue to thee.
8 And if he schal contynue
knockynge, I seye to &yogh;ou, thou&yogh; he schal
not &yogh;yue to hym, for he is a frend, netheles
for his vnrestefulnesse he schal rise,
and &yogh;yue to hym, `how manye he hath
nedeful.
9 And I seie to &yogh;ou, axe &yogh;e, and
it schal be &yogh;ouun to &yogh;ou; seke &yogh;e, and &yogh;e
schulen fynde; knocke &yogh;e, and it schal be
openyd to &yogh;ou.
10 Forsoth ech man that
axith, takith; and he that sekith, fyndith;
and to a man knockynge, it schal be
-- --
openyd.
11 Therfore who of &yogh;ou axith the
fadir breed, wher he schal &yogh;yue to him a
stoon? ether if he axith fysch, wher he
schal &yogh;yue to him a serpent for the
fysch?
12 ethir if he schal axe an ey, whethir
he schal dresse to him a scorpioun?
13 Therfore if &yogh;e, whanne &yogh;e ben yuele,
`kunne &yogh;yue `to &yogh;oure children goode
thingis &yogh;ouun, hou moche more &yogh;oure fadir
of heuene schal &yogh;yue a good spirit to men
axynge him.
14 And Jhesu was castinge
out a fend, and he was doumbe. And
whanne he hadde cast out the fend, the
doumb man spak; and the cumpanyes
wondriden.
15 Forsoth summe of hem
seiden, In Belsebub, prince of deuelis, he
castith out deuelis.
16 And othere temptinge
axiden of him a tokene fro heuene.
17 Forsoth he, as he sy&yogh; the thou&yogh;tis of
hem, seide to hem, Euery rewme departide
`a&yogh;ens it silf, schal be desolat, and an
hous schal falle on an hous.
18 Forsoth
and if Sathanas is departid a&yogh;ens him silf,
how schal his rewme stonde? For &yogh;e
seyn, `that I caste out fendis in Belsebub.
19 Forsoth if I in Belsebub caste out
fendis, in whom `&yogh;oure sones casten out?
Therfore thei schulen be &yogh;oure domesmen.
20 Forsoth if I caste out fendis in the fyngir,
`ether spirit, of God, sothli the rewme of
God is comen in to &yogh;ou.
21 Whanne a strong
armed man kepith his hows, alle thingis
that he weldith ben in pees.
22 Sothli if a
strongere comynge aboue ouercome him,
he schal take a wey alle his armeris, in
whiche he tristide, and schal dele abrood
his spuylis.
23 He that is not with me, is
a&yogh;ens me; and he that gedrith not to gidere
-- --
with me, scaterith a brood.
24 Whanne
an vnclene spirit `hath gon out of a man,
he wandrith by drye placis, sekinge reste;
and he fyndynge not, seith, I schal turne
a&yogh;en in to myn hous, wher of I cam out.
25 And whanne he schal come, he fyndith it
clensid with beesmes, and ourned.
26 Thanne
he goth, and takith with him seuene othere
spiritis werse than him silf, and thei `gon
yn, dwellen there. And the laste thingis
of that man ben maad worse than the
formere.
27 Forsoth it was don, whanne
he seide thes thingis, sum womman of
the cumpany reysinge hir vois, seide,
Blessid be the wombe that bar thee, and
`blessid be the teetis whiche thou hast
sokun.
28 And he seide, Rathere blessid
ben thei, that heeren `Goddis word, and
kepen it.
29 Forsothe the cumpanye comynge
to gidere, he bigan to seye, This
generacioun is a weyward generacioun;
it sekith a tokene, and a tokene schal not
be &yogh;ouun to it, no but the tokene of
Joonas, the prophete.
30 For whi as Joonas
was a tokene to men of Nynyue, so
mannis sone schal be to this generacioun.
31 The queene of the south schal ryse in
dom with men of this generacioun, and
schal condempne hem; for sche cam fro
the endis of the erthe, to heere the wysdom
of Salomon, and lo! here is more
than Salomon.
32 Men of Nynyue schulen
ryse in dom with this generacioun, and
schulen condempne it; for thei diden
penaunce at the prechinge of Joonas, and
lo! here is more than Joonas.
33 No man
li&yogh;tneth a lanterne, and puttith in hidlis,
other vndir a boyschel, but on a candel
sticke, that thei that gon yn, se li&yogh;t.
34 The
lanterne of thi body is thin y&yogh;e; if thin y&yogh;e
-- --
schal be symple, al thi body schal be li&yogh;tful;
forsoth if it schal be weyward, also
thi body schal be derkful.
35 Therfore se
thou, lest the li&yogh;t which is in thee, be
derknessis.
36 Therfore if al thi body schal
be li&yogh;tful, not hauynge ony part of derknessis,
it schal be al li&yogh;tful, and as a
lanterne of bri&yogh;tnesse it schal &yogh;yue li&yogh;t
to thee.
37 And whanne he spak, sum Pharisee
praiede, that he schulde ete at hym.
38 And he gon yn, `saat to the mete. Sothli
the Pharisee `bigan to seie, gessynge with
ynne him silf, whi he was not waischun
byfore the mete.
39 And the Lord seith to
him, Now &yogh;e Farisees clensen `that thing
that is with outenforth of the kuppe and
plater; but that thing `of &yogh;ou that is
`with ynne, is ful of raueyn and wickidnesse.
40 Foolis, wher he that made `that
thing that is with oute forth, made not
`also that thing that is `with ynne?
41 Netheles
`that thing that is ouer, `ether superflu,
&yogh;yue &yogh;e almes, and lo! alle thingis
ben clene to &yogh;ou.
42 But woo to &yogh;ou, Pharisees,
that tythen mynte, and ruwe, and
al wort, `ether herbe, and passen dom
and the charite of God. Forsoth it bihofte
to do thes thingis, and not for
to leeue hem.
43 Woo to &yogh;ou, Pharisees,
that louen the firste chaieris in synagogis,
and salutaciouns in cheping.
44 Woo to
&yogh;ou, that ben as sepulcris, whiche apperyn
not, and men walkynge aboue witen not.
45 Forsoth oon of the wyse men of lawe
answeringe, seide to him, Maistir, thou
seyinge thes thingis, `doist dispit also to
vs.
46 `He seide, And woo to &yogh;ou, wyse
-- --
men of lawe, for &yogh;e chargen men with
birthins whiche thei moun not bere, and
&yogh;e &yogh;ou silf with &yogh;oure o fynger touchen
not the heuynessis.
47 Woo to &yogh;ou, that
bilden birielis of prophetis; forsoth &yogh;oure
fadris slowen hem.
48 Treuly &yogh;e witnessen,
that &yogh;e consenten to the werkis of &yogh;oure
fadris; for sothli thei slowen hem, but &yogh;e
bilden her sepulcris.
49 Therfore and the
wysdom of God seide, I schal sende to
hem prophetis, and apostlis, and of hem
thei schulen slee and pursue,
50 that the
blood of alle prophetis, that was sched
out fro the makyng of the world, be
sou&yogh;t of this generacioun;
51 fro the blood
of Abel `til to the blood of Zacharie,
which perischide bytwix the auter and
the hous. So I seie to &yogh;ou, it schal be
sou&yogh;t of this generacioun.
52 Woo to &yogh;ou,
wyse men of lawe, for &yogh;e han take awey
the keye of kunnynge; &yogh;e &yogh;ou silf entriden
not, and &yogh;e han forboden hem that
entriden.
53 Sothli whanne he spak thes
thingis to hem, Pharisees and wyse men
of lawe bigunnen greuously to a&yogh;enstonden,
and oppresse his mouth `of
many thingis,
54 aspiynge him, and sekinge
to take sum thing of his mouth, that thei
schulden accuse him.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
