Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
Here bigynneth another prologe.
1 Forsothe for manye men enforceden to ordeyne the tellyng of thingis, whiche
ben fillid in vs,
2 as thei that seyn atte the bigynnyng, and weren ministris of the
word,
3 bitaken, it is seen also to me, hauynge alle thingis diligentli bi ordre, to
write to thee,
4 thou best Theofile, that thou knowe the treuthe of tho wordis,
of whiche thou art lerned.
-- --
Here bygynneth the gospel of Luke.
5 Ther was sum prest, Zacharie by
name, in the dayes of Eroude, kyng of
Judee, of the sort of Abia, and his wyf
of the dou&yogh;tris of Aaron, and hir name
Elizabeth.
6 Sothli thei bothe weren iuste
`bifore God, goynge in alle the maundementis
and iustifyingis of the Lord, with
outen pleynte.
7 And a sone was not to
hem, for that Elizabeth was bareyne, and
bothe hadden gon forth fer in her dayes.
8 Sothli it was don, whanne Sacharie was
set `in presthod, in the ordre of his sort
bifore God,
9 vp the custom of presthod,
by sort he wente forth, that he entrid in
to the temple of the Lord, schulde putte
ensence.
10 And alle the multitude of the
peple was withouteforth, preiynge in the
our of encence.
11 Sothli an aungel of the
Lord apperide to him, stondinge on the
ri&yogh;thalf of the auter of ensence.
12 And
Sacharie seynge was disturblid, and
drede felde doun on him.
13 Forsoth the
aungel seith to hym, Zacharie, drede thou
not; for thi preier is herd, and Elizabeth,
thi wyf, schal bere to thee a sone, and his
name schal be clepid John.
14 And `ioye
and gladinge schal be to thee; and manye
schulen enioye in his natyuite.
15 Sothli he
schal be greet bifore the Lord, and he
schal not drynke wyn and sydir, and he
schal be fulfillid of the Hooly Gost &yogh;it
of his modir wombe.
16 And he schal
conuerte manye of the sones of Israel to
the Lord God of hem;
17 and he schal go
bifore him in the spirit and vertu of
Helye; and he schal turne the hertis of
-- --
fadris in to sones, and men out bileue
to the prudence of iuste men, for to
make redy a parfyt peple to the Lord.
18 And Zachari seide to the aungel, Wherof
schal I wite this? for I am old, and my
wyf hath gon fer in hir dayes.
19 And the
aungel answeringe seide to him, Forsoth
I am Gabriel, that stonde ny&yogh; bifore
God; and I am sent to thee for to speke,
and to euangelise, `or telle, to thee thes
thingis.
20 And loo! thou shalt be stille,
`or doumbe, and thou schalt not mowe
speke til in to the day, in which thes
thingis schulen be don; for that thou hast
not bileuyd to my wordis, whiche schulen
be fillid in her tyme.
21 And the peple
was abidinge Zacharie, and thei wondriden,
for he tariede in the temple.
22 Forsoth
he gon out my&yogh;te not speke to hem,
and thei knewen that he hadde seyn a
vicioun in the temple. And he was bekenynge
to hem, and dwellide doumb.
23 And
it was maad, as the dayes of his office
weren fulfillid, he wente in to his hous.
24 Forsoth after dayes Elizabeth, his wyf,
conseyuede, and hidde hir fyue monethis,
seyinge,
25 For so the Lord dide to me in
the dayes, in the whiche he bihelde, for
to take a wey my schenschip a mong men.
26 Sothely in the sixte monethe the aungel
Gabriel was sent fro God in to a citee of
Galilee,
27 to which the name Nazareth, to
a mayden, weddid to a man, to whom
the name was Joseph, of the house of
Dauith; and the name of the mayden
Marie.
28 And the aungel gon yn to hir
seide, Heil, ful of grace; the Lord be
with thee; blessid be thou among wymmen.
29 Which, whanne she had herd, was
troublid in his word, and thou&yogh;te what
-- --
maner salutacioun this was.
30 And the
aungel seide to hir, Ne drede thou, Marie,
sothli thou hast founden grace anemptis
God.
31 Loo! thou schalt conseyue in the
wombe, and schalt bere a sone, and thou
schalt clepe his name Jhesu.
32 This schal
be greet, and he schal be clepid the sone
of the Hi&yogh;este; and the Lord God schal
&yogh;yue to him the seete of Dauith, his fadir,
and he schal regne in the hous of Jacob
`with outen ende,
33 and of his rewme schal
be non ende.
34 Forsoth Marie seith to
the aungel, On what manere schal this
thing be don, for I knowe not man?
35 And the aungel answeringe seide to hir,
The Hooly Gost schal come fro aboue in
to thee, and the vertu of the Hi&yogh;este schal
schadewe vnto thee; therfore and that
hooly thing that schal be born of thee,
schal be clepid the sone of God.
36 And
loo! Elizabeth, thi cosyness, and sche
hath conceyued a sone in hir elde, and
this monethe is the sixte to hir that is
clepid bareyne;
37 for euery word schal not
be inpossible anemptis God.
38 Forsoth
Marie seide, Loo! the hand mayden of
the Lord; be it don to me aftir thi word.
39 And the aungel departide fro hir. Sothli
Marie risinge vp in tho dayes, wente with
haste in to the hilly placis, in to a citee
of Judee.
40 And sche entride yn to the
hows of Zacharie, and grette Elizabeth.
41 And it was don, as Elizabeth herde the
salutacioun of Marie, the &yogh;onge child in
hir wombe gladide. And Elizabeth `was
fillid with the Hooly Gost,
42 and criede
with grete voys, and seide, Blessid be
thou a mong wymmen, and blessid be the
fruyt of thi wombe.
43 And wherof this
thing to me, that the modir of my Lord
come to me?
44 Loo! forsothe as the vois of
thi salutacioun was maad in myn eeris,
-- --
the &yogh;onge child gladide with ioye in my
wombe.
45 And blessid thou ert, that hast
bileuyd, for tho thingis that ben seid to
thee fro the Lord, schulen be parfytli don.
46 And Marie seide, My soule magnyfieth
the Lord,
47 and my spirit hath gladid in
God, myn heelthe.
48 For he hath biholden
the mekenesse of his hand mayde.
49 Loo!
forsoth of this alle generaciouns schulen
seie me blessid. For he that is my&yogh;ti hath
don grete thingis to me, and his name is
hooly.
50 And his mercy is fro kynredis
in to kynredis, to men dredinge him.
51 He
made my&yogh;te in his arme, he scateride
proude men with mynde of his herte.
52 He puttide doun my&yogh;ty men fro seete,
and enhaunside meke.
53 He hath fillid
hungry men with goode thingis, and he
hath left ryche men voyde.
54 He, hauynge
mynde of his mercy, took vp Israel, his
child;
55 as he hath spoken to oure fadris, to
Abraham and to his seed, in to worldis.
56 Forsoth Marye dwellide with hir as three
monethis, and turnyde a&yogh;en in to hir hous.
57 Sothly the tyme of beringe child `was
fillid to Elizabeth, and sche childide a
sone.
58 And the nei&yogh;eboris and cosyns of
hir herden, for the Lord hadde magnyfied
his mercy with hir; and thei thankiden
him.
59 And it was don, in the
ei&yogh;tethe day, thei camen for to circumside
the child; and thei clepiden him Sacharie,
by name of his fadir.
60 And his modir
answeringe seide, Nay, but he schal be
clepid John.
61 And thei seiden to hir,
For no man is in thi kyn, that is clepid
bi this name.
62 Sothli thei maden a syngne
to his fadir, whom he wolde him for to
be clepid.
63 And he axinge a poyntel,
wroot, seyinge, John is his name. And
alle men wondriden.
64 Forsoth his mouth
-- --
was openyd anon, and his tunge, and he
spak, blessinge God.
65 And drede was
maad on alle her nei&yogh;eboris, and thes
wordis weren pupplischid on alle the
hilly placis of Judee.
66 And alle men that
herden puttedyn in her herte, seyinge,
Who, gessist thou, this child schal be?
And sothli the hond of the Lord was
with him.
67 And Zacharie, his fadir, `was
fillid with the Hooli Gost, and prophesiede,
seyinge,
68 Blessid be the Lord God
of Israel, for he hath visitid, and maad
redempcioun of his peple.
69 And he hath
rerid to vs an horn of helthe in the
hous of Dauith, his child.
70 As he spak by
the mouthe of `hooly prophetis, that ben
fro the world.
71 Helthe fro oure enemyes,
and fro the hond of alle men that hatiden
vs.
72 To do mercy with oure fadris, and
to haue mynde of his hooly testament.
73 The ooth that he swor to Abraham, oure
fadir, `to &yogh;yue him silf to vs.
74 That we
`withoute drede deliuerid fro the hond of
oure enemyes,
75 serue to him, in hoolynesse
and ri&yogh;tfulnesse bifore him in alle oure
dayes.
76 And thou, child, schalt be clepid
the prophete of the Hi&yogh;este; for thou
schalt go bifore the face of the Lord, to
make redy his weyes.
77 For to &yogh;yue the
science of helthe to his peple, in to remiscioun
of her synnes;
78 bi the entraylis of
mercy of oure God, in whiche he spryngynge
vp fro an hi&yogh; hat visytid vs.
79 For
to &yogh;yue li&yogh;t to hem that sitten in derknessis,
and in schadewe of deth; for to
dresse oure feet in to the wey of pees.
80 Sothli the child waxide, and was comfortid
-- --
in spirit, and was in desert til to
the day of his schewinge to Israel.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
