Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IX.
1 And aftir sixe dayes Jhesus took Petre,
and James, and John, and ledith hem by
hem selue aloone in to an hi&yogh; hil; and
he is transfigurid byfore hem.
2 And his
clothis ben maad schynynge and white
ful moche as snow, and which maner
clothis a fullere, `or walkere of cloth,
may not make white on erthe.
3 And
Helye with Moyses apperide to hem, and
thei weren spekynge with Jhesu.
4 And
Petre answeringe seith to Jhesu, Maistir,
it is good vs for to be here; make
we here thre tabernaclis, oon to thee, oon
to Moyses, and oon to Helye.
5 Sothli he
wiste not what he schulde seie; forsothe
thei weren agast by drede.
6 And `ther is
maad a cloude schadewinge hem; and a
voys cam of the cloude, seyinge, This is
my mooste deereworthe sone, heere &yogh;e
him.
7 And anon thei biholdinge aboute,
sy&yogh;e no more any man, no but Jhesus
oonly with hem.
8 And hem comynge
down fro the hil, he comaundide hem,
that thei schulde not telle to any man
tho thingis that thei hadde seyn, no but
whanne mannis sone hath risun fro
deede spiritis.
9 And thei heelden the
word at hem silf, sekynge what schulde
be, whanne he hath risun fro deede.
10 And thei axiden him, seyinge, What
-- --
therfore seyn Pharisees and scribis, for
it bihoueth Helye for to come first.
11 The
which answeringe seith to hem, Whanne
Helye schal come first, he schal restore
alle thingis; and hou it is writun `in to
mannis sone, that he suffre many thingis,
and be despisid.
12 But I seie to &yogh;ou, for
and Helye is comun, and thei diden to
him what euere thingis thei wolden, as it
is writun of him.
13 And he comynge to
his disciplis, sy&yogh; a greet cumpany aboute
hem, and scribis axynge with hem.
14 And
anon al the cumpanye seynge Jhesu, was
astoneyed, and thei dreden; and thei
rennynge to, greeten him.
15 And he axide
hem, What seken &yogh;e among &yogh;ou?
16 And
oon of the cumpany answeringe seide,
Maistir, I haue brou&yogh;t to thee my sone
hauynge `an vnclene spirit;
17 the which
wher euere he `schal take hym, hirtith
him, and he frothith, `or vometh, and
betith to gidere with teeth, and wexith
drye. And I seide to thi disciplis, that thei
schulden caste hym out, and thei my&yogh;ten
not.
18 The which answeringe to hem
seide, A! thou schrewid generacioun `and
out of bileue, hou longe schal I be at &yogh;ou,
hou longe schal I suffre &yogh;ou? `Brynge &yogh;e
hym to me.
19 And thei brou&yogh;ten hym to.
And whanne he hadde seyn him, anon the
spirit troublide him; and he cast doun
in to the erthe, was walewid frothinge.
20 And he axide his fadir, Hou moche of
tyme `it is, sithen this thing fel to him?
21 And he seith, Fro childhod; and ofte he
hath sent him and in to fier and `in to
watir, that he schulde leese him; but
and if thou maist ony thing, help vs,
hauynge mercy on vs.
22 Sothli Jhesus
seith to him, If thou maist bileue, alle
-- --
thingis ben possible to a man bileuynge.
23 And anon the `fadir of the child criynge
with teeris seide, Lord, I bileue;
help thou myn vnbileuefulnesse.
24 And
whanne Jhesus hadde seyn the company
`of peple rennynge to gidere, he manaside
to the vnclene spirit, seyinge to him,
Thou deef and doumb spirit, I comaund
thee, go out fro him, and entre not
more in to him.
25 And he criynge, and
moche to-breidynge him, wente out fro
him; and he is maad as deed, so that
manye seiden, that he was deed.
26 Forsoth
Jhesus holdynge his hond, `lifte vp
him; and he roos.
27 And whanne he
hadde entrid in to an hous, his disciplis
axiden him priuely, Whi my&yogh;ten not we
caste hym out?
28 And he seyde to hem,
This kynde `in no thing may go out,
no but in preier and fastinge.
29 And thei
gon fro thennis, wenten forth in to Galile;
and he wolde no man wite.
30 He tau&yogh;te
his disciplis, and seide to hem, For mannus
sone schal be bitrayed in to the
hondis of men, and thei schulen sle
him, and he slayn, on the thridde day
schal rise a&yogh;en.
31 And thei knewen not
the word, and dredden for to axe him.
32 And thei camen to Cafarnaum. Which
whenne `he was in the hous, axide hem,
What tretiden &yogh;e in the weie?
33 And thei
weren stille; sothli thei disputiden among
hem in the weie, who of hem schulde
be more.
34 And he sittinge clepide the
twelue, and seith to hem, If any man
wole be the first among &yogh;ou, he schal be
the laste, and mynystre of alle.
35 And
he takinge a childe, ordeynede him in the
myddil of hem; whom whanne he hadde
byclippid,
36 he seith to hem, Who euere
`schal receyue oon of suche children in
-- --
my name, he receyueth me; and who
euere receyueth me, he receyueth not me
aloone, but him that sente me.
37 John
answeride to him, seyinge, Maistir, we
sy&yogh;en sum oon for to caste out fendis
in thi name, the which sueth not vs, and
we han forbedun him.
38 Sothli Jhesus seith
`to him, Nyle &yogh;e forbede him; `ther is no
man that doth vertu in my name, and
may soone speke yuele of me.
39 Forsothe
he that is not a&yogh;ens vs, is for vs.
40 Sothli
who euere schal &yogh;yue drynke to &yogh;ou a
cuppe of cold watir in my name, for &yogh;e
ben of Crist, treuly I seie to &yogh;ou, he schal
not leese his mede.
41 And who euere `schal
sclaundre oon of thes litle bileuynge in
me, it is good to him that a mylne stoon
of assis were don aboute his necke, and
were sent in to the see.
42 And if thin hond
sclaundre thee, kitt it awey; it is good to
thee `feble to entre in to lyf, than hauynge
twey hondis go in to helle, in to
fier `that neuere schal be quenchid,
43 where
the worm of hem deieth not, and the fier
is not quenchid.
44 And if thi foot sclaundre
thee, kitt it of; it is good to thee `for
to `entre crokid in to euerlasting lyf,
than hauynge twey feet to be sent in to
helle of fier, `that neuer schal be quenchid,
where the worm of hem deieth not,
45
and the fier is not quenchid.
46 That if thin
y&yogh;e sclaundre thee, cast it out; it is good
to thee `for to entre gogil y&yogh;ed in to
rewme of God, than hauynge twey y&yogh;en
for to be sent in to helle of fier,
47 where the
worm of hem deieth not, and the fier is
not quenchid.
48 Forsoth euery man schal
be saltid, `or maad sauori, with fier, and
euery slayn sacrifice schal be sauorid
-- --
with salt.
49 Salt is good thing; that if
salt be vnsauori, in what thing schulen
&yogh;e make it sauori? Haue &yogh;e salt in &yogh;ou,
and haue &yogh;e pees among &yogh;ou.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
