Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XI.
1 And it is don, when Jhesus hadde eendid,
he, comaundynge to his twelue disciplis,
passide fro thennes for to `preche and
teche in the citees of hem.
2 Forsothe when
Joon in boondis hadde herd the werkis of
Crist, he, sendynge `two or three of his
disciplis,
3 seide to hym, Art thou he that
art to cummynge, or we abiden an
other?
4 And Jhesus answerynge, seide to
-- --
hem, &YOGH;ee goynge telle a&yogh;ein to Joon the
thingis that &yogh;e han herde and seen.
5 Blynde men seen, crokid men wandren,
mesels ben maad clene, deef men heeren,
dead men risen a&yogh;ein, pore men ben `taken
to prechynge of the gospel, or ben `maad
keepers of the gospel.
6 And he is blessid,
that shal nat be sclaundrid in me.
7 Sothely
hem goynge awey, Jhesus biganne for to
seye of Joon to the cumpanyes, What
thing wenten &yogh;e out for to see in desert?
whether a reede wawid with
wynd?
8 But what thing wente &yogh;e out
for to seen? whether a man clothid with
soft thingis? Loo! thei that ben clothid
with softe thingis ben in housis of kyngis.
9 But what thing wenten &yogh;e out for to se?
whether a prophete? &YOGH;e, I seie to &yogh;ou,
and more than a prophete.
10 For this is he,
of whom it is writyn, Loo! I sende myne
aungel before thi face, that shal make
redy thi wey bifore thee.
11 Trewly I say
to &yogh;ou, `ther roose noon more than Joon
Baptist amonge children of wommen; forsothe
he that is lesse in the kyngdam of
heuenes, is more than he.
12 Sothely fro the
days of Joon Baptist til now the kyngdam
of heuenes suffreth strengthe, `or violence,
and violent men rauyshen it.
13 For
alle prophetis and the lawe til Joon Baptist
prophecieden;
14 and &yogh;if &yogh;e wolen resseyuen,
he is Ely that is to cume.
15 He that
hath eeris of heerynge, heere he.
16 But to
whom shal I gesse this generacioun lichy?
It is lichi to children sittynge in cheepynge,
the whiche, cryinge to her peeris,
seien,
17 We han sungen to &yogh;ou, and &yogh;e han
nat lippid; we han mourned to &yogh;ou, and
&yogh;e han nat weilid.
18 Sothely Joon cam neither
etyinge ne drynkynge, and thei seien,
-- --
He hath a deuel.
19 The sone of man came
etynge `and drynkynge, and thei seyen,
Loo! a man deuourer, `or glotoun, and
drynker of wyn, and frend of puplicanys
and synful men. And wijsdam is iustified
of her sonys.
20 Thanne Jhesus began for to
seie repreue to citees, in whiche ful manye
vertues of hym ben don, for thei diden
nat penaunce.
21 Woo to thee! Corozaym,
woo to thee! Bethsaida; for &yogh;if tho vertues
that ben don in &yogh;ou hadden ben don
in Tyre and Sydon, sum tyme thei hadden
don penaunce in haire and asch.
22 Netheles
I say, it shal be softer, or `lesse peyne,
to Tyre and Sydon than to &yogh;ou, in the day
of dome.
23 And thou, Caphernaum, whether
til in to heuen thou shalt be `rerid
vp? Thou shalt go doun til into helle.
For &yogh;if the vertues that ben don in thee,
hadden be don in Sodom, perauenture
thei `shulden han dwellid til `vn to this
day.
24 Netheles Y saye to &yogh;ou, for to the
lond of Sodom it shal be softer, `or lesse
peyne, in the day of dome, than to thee.
25 In `the ilk tyme Jhesus answerynge saide,
I knowleche to thee, fadir, lord of heuen
and erthe, for thou hast hid these thingis
fro wijse men and `ware, or slee&yogh; men, and
hast shewid hem to litil men;
26 so, fadir,
for whi so it was `plesynge tofore thee.
27 Alle thingis ben taken to me of my fadir;
and no man knewe the sone, no but the
fadir, neither eny man knewe the fadir,
no but the sone, and to whom the sone
wolde shewe.
28 Alle &yogh;e that traueilen, and
ben chargid, come to me, and I shal refreshe,
`or fulfille, &yogh;ou.
29 Take &yogh;e my &yogh;oc
vpon &yogh;ou, and `lerne &yogh;e of me, for I am
mylde and meeke in herte; and &yogh;e shulen
fynde reste in &yogh;oure soulis.
30 For my &yogh;oc is
`swete, or softe, and my charge `li&yogh;t, or eisy.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
