1   And the Lord spak to Moyses, after the deeth of the two sones of Aaron, whanne thei offrynge alien fier were slawn, 2   and comaundide to hym, seiynge, Spek to Aaron, thi brother, lest alle tymes he goo into the seyntuarye, that is with ynne the veile before the propiciatory, with the which the arke is couerd, that he dye not; for in a clowde Y shal apeere vpon the heuenli answerynge place; 3   but if thes thinges he do before. He shal offre a calf for synne, and a wether in to brent sacrifice; 4   with a lynnen coote he shal be clothid, and with lynnen breches he shal hile the shame worthi membres; he shal

be gyrd with a lynnen gyrdil, and a lynnen mytre he shal putte to the heed; thes forsothe ben the holy clothes, with the whiche al he shal be clothed, whanne he were wasshid. 5   And he shal take of al the multitude of the sones of Yrael two gootes for synne, and a wethir into brent sacrifice; 6   and whanne he offreth a calf, and preieth for hym silf, and for his hows, 7   two gootes he shal make stoonde before the Lord, in the dore of the tabernacle of witnessyng; 8   puttynge vpon either loot, oon to the Lord, and another to the goot that shal be sent out. 9   Whos loot goth out to the Lord, shal offre thilke for synne; 10   whos forsothe into the goot that shal be sent out, shal ordeyne him quik before the Lord, that he heelde preiers vpon hym, and sende hym out into wildernes. 11   Thes thingis lawfully solempnysid, he shal offre a calf, and preiynge for hym silf, and for his hows, shal offre it. 12   And the censure taken to, the whiche he hath fulfillide of the coolis of the auter, and takynge with hoond the maad ensence of dyuers spices into ensensyng, he shal goo yn bi&yogh;onde the veile, in to the hooli thingis; 13   that the swete smellynge spices putt vp on the fier, the clowde of hem and the breeth couer Goddis answeryng place, that is vpon the witnessynge, and die not. 14   And he shal take of the blood of the calf, and he shal sprenge with the fyngre seuen sithes a&yogh;ens the propiciatorye, at the eest. 15   And whanne he hath slawe the goot, for the synne of the puple, he shal bere ynne his blood with ynne the veile, as it is comaundid of the blood of the calf, that he spreynge forn a&yogh;en Goddis answeryng

place, 16   and purge the seyntuarye fro the vnclennes of the sones of Yrael, and fro the trespassynges of hem, and fro alle synnes. After this rijt he shal doo in the tabernacle of witnessyng, that is fichid betwix hem, in the myddil of the sortes of dwellyng of hem. 17   No man be in the tabernacle, whanne the bishop shal goo into the seyntuarye, that he preye for hym silf, and for his hows, and for al the companye of Yrael, to the tyme that he goo out of the tabernacle. 18   And whanne he goth out to the auter that is before the Lord, prey he for hym silf, and the taken blood of the calf, and of the goot, heelde he vpon the hornes of it, bi enuyroun; 19   and sprenge with the fyngre seuen sithes, purge he, and halowe it fro the vnclennes of the sones of Yrael. 20   After that he hath clenside the seyntuarye, and the tabernacle, and the auter, thanne offre he a quyk goot; 21   and either hoond put on his heed, knowleche he al the wickidnes of the sones of Yrael, and alle the giltis, and alle the synnes of hem, the which inwardly preiynge to his heed, he shal sende it out bi a man al redy into desert. 22   And whanne the goot hath born al the wickidnes of hem into solitarye loonde, 23   and were left in desert, Aaron shal turne a&yogh;en into the tabernacle of witnessyng; and the clothes doon of, with the whiche he was clothed before, whanne he entride the seyntuarye of God, and hem laft there, 24   he shal wasshe his flesh in an holi place, and shal be clothid with his owne clothes, and afterward that he, goon out, hath offred his and the puples brent sacrifice, he shal preye as wel for hym silf, as for the puple; 25   and the talw&yogh; that is offred for synne he shal brenne vpon the auter. 26   He forsothe that letith

goo the sent out goot, shal wasshe his clothes and his bodi with water, and so he shal goo into the tentis. 27   The calf forsothe and the goot, that weren offred for synne, and whos blood is brought in seyntuarye, that the clensyng were fulfillid, thei shulen bere out of the tentis; and thei shulen brenne with fier, as wel the skynnes, as the flesh of hem and the drit. 28   And who so euer brenne hem, shal wasshe his clothes and the flesh with water, and so he shal go into the tentes. 29   And this shal be to &yogh;ow lawful euerlastyng; the seuenth moneth, the tenthe day of the moneth, &yogh;e shulen traueyle &yogh;oure soules, and no werke &yogh;e shulen do, whether with ynne bore or comlyng that pilgrimagen among &yogh;ow. 30   In this day shal be the purgyng of &yogh;ow, and clensyng fro alle &yogh;oure synnes, before the Lord &yogh;e shulen be maad clene; 31   the holiday forsothe of restyng it is, and &yogh;e shulen traueil &yogh;oure soules thur&yogh; perpetuel religioun. 32   The preest forsothe, that were anoynt, shal purgen out, and whos hondes ben sacrid, that he bere the office of preesthod for his fader; and he shal be clothid with a lynnen stoole, and with holy clothes, 33   and he shal purge the seyntuarie, and the tabernacle of witnessing, and the auter, and the preestis, and alle the puples. 34   And this shal be lawful to &yogh;ow euermore, that &yogh;e preyen for the sones of Yrael, and for alle the synnes of hem, ones in the &yogh;eer. He dide thanne, as the Lord hadde comaundide to Moyses.

Previous section

Next section