Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
LEVITICUS.
[Prologue on the book of Leviticus.]
This book of Leuitici makith mencioun, how God tau&yogh;te the sones of Israel, by
Moyses, to offre sacrifises to the Lord of oxen, and of scheep, of lambren, and of geet;
and for which synne what sacrifise owith to be doon to the Lord; and the manere of
brennyng, and of offring; and that the prest preie for the offrer; and if the man is
pore, and is not of power to offre beestis for his synne, he shal offre whete flour, or
therf loues, or briddis. Also it is contened therinne the ordre of halewing of the
bisschop, and of prestis, and of alle holi vessels of the tabernacle; and how the Lord
slow&yogh; Nadab and Abyu, prestis, the sones of Aaron, for necligence doon in the auter.
Also the Lord techith the children of Israel discrecioun bitwixe clene beestis and
vnclene, and of fisschis, and of foulis, that thei vse the clene to mete, and leue the
vnclene; and the verrei knowing of lepre, and he that is preued lepre to be put out of
the comynycacioun of men, till he be maad clene, and to do sacrifise for his clensing.
Also the Lord techith hem to fle abhomynaciouns, whiche the peple of Canaan vseden,
for whiche thei weren cast out of her lond; and to kepe hise comaundementis and
lawis; and to vse trewe mesure, and trewe wei&yogh;te, in biyng and silling, for the drede
of God. Here endith the prologe, and here bigynneth the book of Leuitici.
Here begynneth the bok of Leuiticus.
CAP. I.
1 THE Lord forsothe clepide Moyses,
and spak to hym from the tabernacle of
witnessyng,
2 seiynge, Spek to the sones
of Yrael, and thow shalt seie to hem, The
man that offreth of &yogh;ow an oost to God
of the beestis that is, of oxen, and of
sheep,
3 offrynge slawn sacrifices, if al brent
sacrifice were the offryng of hym, and of
the droue, a maal with outen wemme he
shal offre at the dore of the tabernacle
of witnessyng, to plese to hym the Lord.
4 And he shall putte the hondes vpon the
heed of the oost, and it shal be acceptable,
-- --
and profytynge into the clensyng of hym.
5 And he shal offre a calf before the Lord,
and the sones of Aaron, the preest, shulen
offre the blood of it, shedynge bi enuyroun
of the auter, that is before the dore
of the tabernacle.
6 And the skyn of the
oost drawun of, the greet lemes thei shulen
kit in gobetis;
7 and thei schulen leye
fier in the auter maad bifore the heep of
wodde;
8 and the lemes that ben kyt a boue
ordeynynge, the heed, that is, and alle
that cleuen to the mawe,
9 the entrails and
the feet wasshe with watir; and the
preest shal brenne hem vpon the auter
in to al brent sacrifice, and swete smel to
the Lord.
10 That if of the beestis is the
offeryng, the al brent sacrifice of sheep,
or of geyt, he shal offre a loombe of o
&yogh;eer with outen wemme,
11 and he shal offre
at the side of the auter that biholdith to
the north, bifore the Lord. The blood forsothe
of it the sones of Aaron shulen
heelde vpon the auter bi enuyroun,
12 and
thei shulen dyuyde the lemes, the heed,
and alle that cleuen to the mawe, and leie
vpon the wodde, to the which fier is to be
vnder putte;
13 the entrayls forsothe, and
the feet thei shulen wasshe with water;
and the preest shal brenne alle thingis
offred vpon the auter into brent sacrifice,
and moost swete smel to the Lord.
14 If
forsothe of the briddis the offryng of
brent sacrifice were to the Lord, of turturs,
or culuer briddis,
15 the preest shal
offre it at the auter; and the heed crokid
a&yogh;en to the necke, and the place of a
wounde broke, he shal make the blood
renne down vpon the brenke of the auter.
16 The litil bleedre forsothe of the throot,
and the fetheres, he shal cast out biside
the auter, at the eest coost, in the place
where askis ben wonte to be cast out;
and he shal breke the wynges of it,
17 and
-- --
not kyt, ne with yrun dyuyde it; and he
shal brenne it vpon the auter, fier vnder
put to the wodde; al brent sacrifice it is
and offryng of moost swete smel to the
Lord.
CAP. II.
1 Whanne a lijf offreth offryng of sacrifyce
to the Lord, tryed flour shal be the
offryng of him. And he shal heelde vpon
it oyle,
2 and putte cense, and brynge to
the sones of Aaron, the preest, of whom
oon shal take an handful of tried flour,
and of oyle, and al the cense; and putte
the memorial vpon the auter, into moost
swete smel to the Lord.
3 That forsothe that
leeueth of the sacrifice shal be of Aaron
and of his sones, holi of halowes `of offrynges
to the Lord.
4 Whanne forsothe
he shal offre baake sacrifice of tried flour
in the ouen, that is, looues with outen
sourdow&yogh;, spreynt with oyle, and the
therf kaakis medlid with oyle;
5 if thin
offryng shal be fro the friynge panne, of
tryed flour spreynt with oyle and with
outen sour dow&yogh;,
6 thow shalt dyuyde it in
litil parties, and heelde vpon it oyle.
7 If
forsothe fro the gridil sacrifice, euen
maner the tried flour shal be spreynt
with oile;
8 the which offrynge to the Lord
thou shalt take in the hondis of the
preest.
9 The which whanne he shal offre
it, he shal take a memorial fro the sacrifice,
and make brenne vpon the auter into
smel of swetnes to the Lord.
10 What euer
forsothe leeueth, shal be of Aaron and his
sones, holi of halewis of offringis to the
Lord.
11 Al offryng that is offred to the
Lord, shal be maad with outen sour dow&yogh;,
ne eny thing of sour dow&yogh;, and of hony,
-- --
shal be brent in the sacrifice of the Lord.
12 The cheefe fruytys oonly &yogh;e shulen offre
of hem, and &yogh;iftis; vpon the auter forsothe
shal not thei be leyde, into smel of
swetnes.
13 What euer thow shalt offre of
sacrifice, thow shal anoynte it with salt,
ne thow shalt not take a wey salt of the
boond of pees of the Lord thi God fro
thi sacrifice; in al offring thow shalt offre
salt.
14 If forsothe thow shalt offre a &yogh;yfte
of the cheef thingis of thi fruytis to the
Lord, of eerys &yogh;it green, thow shal parche
it with fier, and breke in maner of brysid
corn; so thow shalt offre thi cheefe fruytis
to the Lord,
15 heeldynge vpon hem oyle,
and encense puttynge yn, for the offryng
of the Lord it is.
16 Of the whiche the
preest shal make brynne, into mynde of
the &yogh;ifte, a part of the brisde corn, and of
the oyle, and al the cense.
CAP. III.
1 And if the oost of pesible thingis were
the offryng of hym, and of the oxen he
wole offre, a maal, or a femaal, with outen
wemme he shal offre before the Lord.
2 And he shal putte the hoonde vpon the
heed of his slawe sacrifice, the which shal
be offred in the entryng of the tabernacle;
and the sones of Aaron, the preest,
shulen heelde the blood bi enuyroun of
the auter.
3 And thei shulen offre of the
oost of pesible thingis into offryng to the
Lord, the talw&yogh; that couereth the entrailes,
and what euer of fatnes is with
ynforth;
4 the two reyns, with the talw&yogh;
with the which ben couerd the reyn guttis,
and the calle of the mawe with the
smale reyns.
5 And thei shulen brenne
hem vpon the auter, in to al brent sacrifice,
-- --
the fier vnder put to the wodde, into
offryng of moost swete smel to the Lord.
6 If forsothe of sheep were the offeryng of
hym, and oost of pesible thingis, whether
maal or femaal he shal offre, thei shulen
be with outen wemme.
7 If he shal offre
a loombe before the Lord,
8 he shal putte
his hoond vpon the heed of his slawn sacrifice,
the whych shal be offerd in the
vestiarye of the tabernacle of witnessyng;
and the sones of Aaron shulen heelde the
blood of it bi enuyroun of the auter.
9 And
thei shulen offre of the oost of pesible
thingis a sacrifice to the Lord, talw&yogh;, and
al the tail with the reynes,
10 and the fatnes
that couereth the wombe, and alle the
entrayls, and either litil reyne, with the
talw&yogh; that ys biside the reyne guttes,
and the calle of the mawe, with the litil
reynes.
11 And the preest shal brenne hem
vpon the auter, into foode of the fier, and
of the offryng to the Lord.
12 If a she goet
were the offryng of hym, and he shulde
offre it to the Lord,
13 he shal putte his
hoond vpon the heed of it, and he shal
offre it in the entre of the tabernacle of
witnessyng; and the sones of Aaron shulen
shede the blood of it bi enuyroun of
the auter.
14 And thei shulen take of it,
into foode of the Lordis fier, talw&yogh; that
couereth the wombe, and that helith alle
the entrayles,
15 two litil reyns with the
calle that is on hem biside the reyne
guttes, and the fatt of the mawe, with
the litil reynes.
16 And the preest shal
brenne hem vpon the auter, into foode of
the fier, and of moost swete smel; al the
talw&yogh; shal be of the Lord,
17 thur&yogh; perpetuel
ri&yogh;t, in kynredes and alle &yogh;oure dwellyng
places, and blood, and fat algatis
shulen &yogh;e not ete.
-- --
CAP. IV.
1 And the Lord spak to Moyses, seiynge,
Spek to the sones of Israel,
2 Whanne a
lijf synneth bi ignoraunce, and of alle the
heestis of the Lord, the whiche he hath
comaundide that thei shulden not be do,
eny thing doth;
3 if the preest that is
anoyntid, synne, makynge the puple to
trespasse, he shal offre for his synne a
calf with outen wemme to the Lord;
4 and
shal lede it to the dore of the tabernacle
of witnessyng before the Lord, and he
shal putte the hoond vpon his heed, and
he shal offre it to the Lord.
5 And he
shal take of the blood of the calf, berynge
it in to the tabernacle of witnessyng.
6 And whanne he hath wette the fyngre
in the blood, he shal sprenge it seuene
sithes before the Lord, a&yogh;ens the veyle
of the seyntuarye.
7 And he shal putte of
the same blood vpon the hornes of the
auter of moost kyndli encense to the
Lord, that is in the tabernacle of witnessyng;
al forsothe the laft blood he shal
helde into the foot of the auter of brent
sacrifice in the entre of the tabernacle.
8 And the talw&yogh; of the calf he shal offre
for synne, as wel it that couerith the entreyles,
as alle that ben with ynforth,
9 two
lytil reynes, and the calle that is aboue
hem biside the reyne guttes, and the
talw&yogh; of the mawe, with the litil reynes,
10 as it is doon a wey fro the calf of the
oost of pesible thingis; and he shal brenne
hem vpon the auter of brent sacrifice.
11 The
skynne forsothe, and al the flesh with the
heed, and feet, and the entreyles, and the
dryt,
12 and the laft body he shal bere out
of the tentis into a clene place, where the
asken ben wont to be held out; and he
-- --
shal tende hem vpon the hepe of wode,
the which in the place of heeld out asken
shulen be brent.
13 And if al the companye
of the sones of Yrael bi vnknowyng and
bi vnwisdam do that that is a&yogh;ens the comaundement
of the Lord,
14 and afterward
vnderstonde his synne, he shal offre for
the synne a calf, and he shal lede it to
the dore of the tabernacle.
15 And the eldre
of the puple shal putte hoondes vpon the
heed of it before the Lord; and the calf
offred in the si&yogh;t of the Lord,
16 the preest
that is anoyntid shal bere yn of the blood
of it into the tabernacle of witnessyng,
17 with the weet fyngre sprengynge seuen
sithes a&yogh;ens the veyle.
18 And he shal putte
of the same blood in the hornes of the
auter, that is before the Lord in the tabernacle
of witnessyng; the lafte forsothe
blood he shal helde biside the foot of the
auter of brent sacrifices, that is in the
dore of the tabernacle of witnessyng.
19 And al the talw&yogh; of it he shal take, and
he shal brenne vpon the auter;
20 and so
doynge of this calf, as he dide before, and
the preest preyinge for hem the Lord shal
haue mercy.
21 That forsothe calf he shal
bere out of the tentis, and he shal brenne
as the other calf, for it is for the synne
of the multitude.
22 If a prynce synne, and
doo oon of manye bi ignoraunce, that is
defendid in the lawe of the Lord,
23 and
afterwarde vnderstonde his synne, he shal
offre an oost before the Lord, an hee geit
of the geetis,
24 with outen wemme, and he
shal putte his hoond vpon the heed of it.
And whanne he shal offre it in the place,
where is wont to be slawe the brent sacrifice
before the Lord, for it is for synne;
25 the preest shal wete the fyngre in the
blood of the oost for synne, towchynge
the hornes of the auter of brent sacrifice,
and the relif heldynge at the foot of it.
-- --
26 The talw&yogh; forsothe he shal brenne a boue,
as in slawn sacrifices of pesible thingis is
wont to be doon, and he shal prey for
hym, and for his synne, and it shal be
for&yogh;euen to hym.
27 That &yogh;if a lijf of the
puple of the loond synne bi ignoraunce,
that he doo eny thing of thes thinges
that ben defendid in the lawe of the
Lord,
28 and trespassith, and knowlechith
his synne, offre he an hee geyt with outen
wemme,
29 and `he shal putte the hoond
vpon the heed of the oost that is for the
synne, and he shal offre it in the place of
the brent sacrifice.
30 And the preest shal
take of the blood in his fyngre, and
towchynge the hornes of the auter of
brent sacrifice, the relif he shal helde at
the foot of it.
31 Al forsothe the talw&yogh; takynge
a wey, as yt is wont to be takun fro
the slawn sacrifices of pesible thinges, he
shal brenne vpon the auter into smel of
swetnes to the Lord; and he shal preye
for hym, and it shal be for&yogh;eue hym.
32 If
forsothe of the beestis he shall offre slawn
sacrifice for synne, that is, a sheep with
outen wemme,
33 he shal putte the hoond
vpon the heed of it, and he shal offre it
in the place where ben wonte to ben
slawun the oostis of brent sacrifices.
34 And
the preest shal take of the blood of it
with his fyngre, and towchynge the
hornes of the auter of brent sacrifice, he
shal heelde the relif at the foot of it.
35 And
al the talw&yogh; takynge a wey, as the talw&yogh;
of a wether is wonte to be takun a wey
that is offrid for synnes, and he shal
brenne vpon the auter the encense of the
Lord; and he shal preye for hym, and for
his synne, and it shal be for&yogh;ouun hym.
-- --
CAP. V.
1 If a lijf synne, and here the voyce of
a swerer, and were witnes, that other he
seeth, or to hym silf is knowun gilti, but
if he shewe, he shal bere his wickidnes.
2 The lijf that towchith eny vnclene thing,
other that is slawe of a beest, other bi
hym silf deed, or eny other crepynge
beest, and he were forgeten of his vnclennes,
he is gilti, and hath trespassid.
3 And
if he towche eny thing of the vnclennes
of man, after al vnclennes with the which
he is wont to be defowlid, and for&yogh;eten
afterward knowe, he shal vnderlye to the
trespas.
4 The lijf that swerith, and spekith
with his lippes, that or eny thing yuel
shal do, or wel, and doth not, and the
same thing with ooth or word stableth,
and for&yogh;eten afterward vndirstonde his
trespas,
5 do he penaunce for the synne,
and offre he of the flockis an shee lombe,
6
or a shee geyt; and the preest shal
preye for hym, and for his synne.
7 If
forsothe he may not offre a beeste, offre
he two turturs, or two culuer bryddis
to the Lord, oon for the synne, and another
into brent sacrifice.
8 And he shal
&yogh;yue hem to the preest, the which, the
first offrynge for the synne, shal bowe
a&yogh;en the heed of it to the fethers, so that
it cleue to the nek, and not fullich it be
broke.
9 And he shal sprenge of the blood
of it the wal of the auter; what euer forsothe
were lefte he shal make to drop at
the foundement of it, for it is for synne.
10 The tother forsothe he shal brenne in to
brent sacrifice, as it is wont to be doo,
-- --
and the preest shal preye for hym and
for his synne, and it shal be for&yogh;euen
hym.
11 And if his hoond mowe not offre
two turturs, or two culuer briddes, offre
he for his synne of tried flowre the tenthe
part of ephi; he shal not putte into it
oyle, ne leye yn eny thing of encense,
for it is for synne.
12 And he shal take it
to the preest, the which takynge of it a
ful hoondful, shal brenne vpon the auter,
into the mynde of hym that offrede,
preiynge for hym, and purgynge;
13 that
other forsothe part he shal haue in &yogh;ifte.
14 And the Lord spak to Moyses, seiynge,
If a lijf synne,
15 forfetynge the cerymonyes
bi errour, in thes thingis that ben halowed
to the Lord, offre he for his trespas a
wether with out wemme of the flockis,
the which may be bou&yogh;t with two sicles,
after the wei&yogh;te of the seyntuary.
16 And
that that he hath doo of harm he shal
restore, and the fifthe part he shal putte
a boue, takynge to the preest, the which
shal preye for hym, offrynge a wether,
and it shal be for&yogh;ouen hym.
17 The lijf
that synneth bi ignoraunce, and dooth
oon of thes thingis that ben defendid bi
lawe of the Lord, and gilti of the synne
vnderstonde his wickidnes,
18 he shall offre
a wether with outen wemme of the flockis
to the preest, after the mesure and eymyng
of the synne; the which shal preye
for hym, for vnknowynge he dide, and it
shal be for&yogh;eue to hym,
19 for bi errour he
trespasside in the Lord.
1 And the Lord
spak to Moyses,
2 seiynge, The lijf that
synneth, and, the Lord despiside, denye to
his nei&yogh;bore the laft thing that to his
feith was takun, or with fors eny thing
takith,
3 or doth wrong chalenge, or fynde
lost thing, and denyynge ouermore forswerith,
and eny other of manye doo in
the whiche men ben wonte to synne,
4 he
-- --
5 ateynt of the trespas shal &yogh;elde alle thingis
hool that thur&yogh; frawde he wolde with
hoolde, and ferthermore the fifthe part to
the lord, to whom he dide the harm.
6 For his synne forsothe he shal offre a
wether withouten wemme of the flok, and
he shal &yogh;yue it to the preest, after the
eymyng and mesure of the trespas;
7 the
which shal preye for hym before the
Lord, and it shal be for&yogh;eue to hym, for
al that in doynge he synnede.
CAP. VI.
8 And the Lord spake to Moyses, seiynge,
Comaunde to Aaron and his sones,
9 This
is the lawe of the brent sacrifice; it shal
be brent in the auter al ny&yogh;t vnto the
morwen; fyer it shal be of the same auter.
10 The preest shal be clothid with a
coote, and with lynnen breches; and he
shal take the asken, the whiche the fier
vowrynge brent out, and puttynge bisyde
11 the auter he shal be spoylid the rather
clothes, and clothid with other he shal
offre hem out of the tentes, and in moost
clene place vnto a litil sparcle he shal
make to be wastid.
12 The fier forsothe in
the auter euermore shal brenne, the which
the preest shal norishe, vnder puttynge
wode eerly bi eche dayes; and putte yn
aboue the brent sacrifice, he shal brenne
the talw&yogh; of the pesible thingis.
13 This
fier is perpetuel that shal neuer fayle in
the auter.
14 This is the lawe of sacrifice
and of sacrified licours, the whiche the
sones of Aaron shulen offre before the
Lord, and before the auter.
15 The preest
shal take an handful of tyred flour, the
which ys spreynt with oyle, and al the
encense that is putte vp on the tryed
-- --
flour, he shal brenne it in the auter, in
to mynde of moost swete smel to the
Lord.
16 The laft forsothe part of the tryed
flour Aaron with his sones shal ete, with
outen sour dow&yogh;; and he shal ete in the
holi place of the porche of the tabernacle.
17 Therfore forsothe it shal not be souryd,
for the part of it is offred into the encense
of the Lord; holi of halowes it
shal be, as for the synne and for the trespas.
18 The maalis oonlich of the lynage of
Aaron shulen ete it; lawful and euerlastynge
it is in &yogh;oure kynredes, of the sacrifices
of the Lord; eche that touchith tho
thinges shal be halowid.
19 And the Lord
spak to Moyses,
20 seiynge, This is the offryng
of Aaron, and of the sones of him,
that thei shulen offre to the Lord in the
day of her anoyntyng; the tenthe part of
ephi thei shulen offre of the tried flour,
in euerlastynge sacrifice, the half of it
eerli, and the half of it at euen;
21 the
which in a panne spreynt with oyle shal
be fryed.
22 And the preest that to the fader
thur&yogh; ry&yogh;t cometh after, shal offre it
hoote, into the moost swete smel to the
Lord; and al shal be brent in the auter.
23 Al forsothe sacrifice of preestis with fier
shal be consumyd, ne eny shal eete of it.
24 And the Lord spak to Moyses, seiynge,
Spek to Aaron and his sones,
25 This is the
lawe of oost for synne; in the place where
is offred brent sacrifice, shal it be offerd
before the Lord; holi of halowis it is.
26 The preest that offreth it, shal eete it in
holi place, in the porche of the tabernacle.
27 What euer shal towche the fleishe
of it, shal be halowid; if a clooth be
spreynt of the blood of yt, it shal be
washe in an holy place.
28 The bretil vessel
forsothe in the which it is sothen, shal be
broken; that if it were a brasun vessel,
it shal be rubbid, and washe with water.
-- --
29 Eche maal of the preestis kynrede shal
eete of the fleshe of it; for holi of halowis
it is.
30 An oost forsothe that is slawe for
synne, whos blood is born into the tabernacle
of witnessyng to clense in the seyntuarie,
shal not be eete, but brent with
fier.
1 And this lawe of oost for trespas
is holy of halowis.
2 Therfore where the
brent sacrifice is offred, and the sacrifice
for the trespas shal be slawe; the blood
of it bi enuyroun of the auter shal be
heelde.
3 Thei shulen offre of it the tayl,
and the talw&yogh; that couereth the entrayls,
the two litel reynes,
4 and the fatnes that
is biside the reyne guttes, and the calle
of the mawe, with the litil reynes.
5 And
the preest shal brenne hem vpon the auter;
the encense it is of the Lord for the
trespas.
6 Eche maal of the preestes kynrede
in holi place shal ete this flesh, for
holi of halowis it is.
7 As for a synne is
offred an oost, so and for a trespas, of
either hoost shal be o lawe; to the preest
that it shal offre it shal perteyne.
8 The
preest that offreth the slawn offryng of
brent sacrifice, shal haue the skynne of it.
9 And alle the sacrifice of tried floure, that
is bake in the ouen, and what euer thing
in the gredyrne, or in friynge panne is
greithid, of that preest it shal be, of
whom it is offred,
10 whether thei ben
spreynt with oyle, or drye. To alle the
sones of Aaron euen mesure bi echon shal
be dyuydid.
-- --
CAP. VII.
11 This is the lawe of the oost of pesible
thinges, that is offerd to the Lord.
12 If for
doynge of thankyngis were the offryng,
thei schulen offre looues with outen sour
dow&yogh; spreynt with oyle, and thinne therf
cakis anoynt with oyle, and bakun tryed
floure, and litil rownd looues spreynt with
mengyng of oyle;
13 and looues maad with
sour dow&yogh;, with the oost of thankynges
that is offerd for the pesible thinges;
14 of
the whiche oon for the chefe fruytis shal
be offerd to the Lord, and it shal be of
the preest that shal heelde the blood of
the oost,
15 whos fleshe that same day shal
be etun, ne there shal leeue of it eny
thing vnto the morwe.
16 If thur&yogh; a vow,
or wylfully, eny man offreth an oost, the
same day also it shal be eten; but if eny
thing leeue to the morwe, it is leful to
eete;
17 what euer forsothe the thridde
day fynde, the fier shal consume.
18 If eny
man eete the thridde day of the flesh of
the oost of pesible thinges, his offrynge
shall be sett at no&yogh;t, ne it shal profyte
to the offrer; but rather ech lijf that defowlith
hym silf with syche meete, shal
be gilti of trespassyng.
19 The flesh that
eny vnclene thing touchith, shal not be
etun, but brent with fier; he that is clene,
shal eete it.
20 A lijf defowlid, that etith
of the flesh of the oost of pesible thingis,
that is offred to the Lord, shal perishe
fro his puplis.
21 And he that towchith the
vnclennes of man, or of beeste, or of eny
thing that may defowle, and etith of siche
maner flesh, shal spille fro his puples.
22 And the Lord spak to Moyses, seiynge,
Spek to the sones of Irael,
23 The talw&yogh; of
sheep, and of oxe, and of geyt, &yogh;e shulen
-- --
not eete;
24 the talw&yogh; of deed careyn, and
of that beeste that is takun of a wilde
beeste, &yogh;e shulen haue into dyuerse vses.
25 If eny man eete the talw&yogh;, that shulde be
offred into the encense of the Lord, he
shal perishe fro his puple.
26 And the blood
of eche beeste &yogh;e shulen not take in
meete, as wel of bryddes, as of beestis;
27 eche lijf that etith blood shal perishe fro
his puplis.
28 And the Lord spak to Moyses,
seiyng,
29 Speke to the sones of Yrael, He
that offreth slawn offryng of pesible
thinges to the Lord, offre he therwith
and sacrifice, that is, his offrynges of
licours.
30 He shal holde with hondes the
talw&yogh; of the oost, and the litil brest; and
whanne bothe, offred to the Lord, he hath
sacred,
31 he shal take to the preest, the
which shal brenne the talw&yogh; vpon the
auter; the litil brest forsothe shal be of
Aaron and his sones;
32 and the ri&yogh;t shuldre
of the oostis of pesible thingis shal
falle into chefe fruytis of the preest.
33 He
that offreth the blood, and the talw&yogh;, of
the sones of Aaron, shal haue and the
ri&yogh;t shuldre in his porcioun.
34 The litil
brest forsothe of areryng, and the shuldre
of seueryng, Y haue take fro the
sones of Yrael of the pesible hoostes of
hem, and haue &yogh;yue to Aaron the preest
and his sones, thur&yogh; perpetuel lawe, fro
al the puple of Yrael.
35 This is the anoyntyng
of Aaron and his sones, in the cerymonyes
of the Lord, the day that Moyses
offred hem that thei shulden vse preesthod,
36 and the thinges that the Lord comaundide
to be &yogh;eue to hem of the sones
of Yrael, thur&yogh; perpetuel relygioun in her
generaciouns.
37 This is the lawe of the
brent sacrifice, and of sacrifice for synne,
and for trespas, and for the sacryng, and
for slawn offrynges of pesible thinges,
38 that the Lord ordeyned to Moyses in the
mownt Synay, whanne he comaundide
-- --
to the sones of Yrael that thei shulden
offre her offrynges to the Lord, in the desert
of Synay.
CAP. VIII.
1 The Lord spak to Moyses, seiynge,
Tak Aaron with his sones,
2 the clothes of
hem, and the oyle of the anoyntyng, a
calf for synne, two wethers, a leepe with
therf loues;
3 and thow shalt gedere togidere
al the companye at the dore of the
tabernacle.
4 Moyses dyde as the Lord comaundide;
and al the puple gadered before
the &yogh;ates of the tabernacle,
5 he seith,
This is the word that the Lord comaundide
to be do.
6 And anoon he offred Aaron
and his sones; and whanne he hadde
washe hem,
7 he clothide the bishop with
a lynnen sherte, girdynge hym with a
gyrdle and clothing hym with a blewe
coote,
8 and putte a boue the coope, the
which streynynge with a lace ioyned it
to the brest broche, in the which was
loore and sothenes.
9 And he couerde the
heed with a mytre, and vpon it, aboute
the frownt, he putte a goldun plate, sacrid
in halowyng, as the Lord comaundide to
him.
10 And he took the oyle of anoyntyng,
with the which he anoyntide the tabernacle
with alle his ournementis;
11 and
whanne halowynge he hadde spreynt the
auter seuen sithes, he anoyntide it; and
alle the vessels of it, and the lauatorye
with his foot he halowide with oyle.
12 The
which heeldynge vpon the heed of Aaron,
he anoyntide hym,
13 and sacrede, and his
-- --
sones offrede he sacride, and clothid with
lynnen cootys, and girde with girdles,
and putte on hem mytrys, as the Lord
comaundide.
14 And he offrede a calf for
synne; and whanne Aaron and his sones
hadden putte her hondes vpon the heed
of it, he offrede it, takynge the blood;
15 and
the fyngre wett, he towchede the hornes
of the auter bi enuyroun, the which
clensid and halowid, he heelde the laft
blood at the foundementis of it.
16 The
talw&yogh; forsothe that was vpon the entrayles,
and the calle of the mawe, and
the two litil reynes with her grece he
brent vpon the auter;
17 the calf with the
skynne, flesh, and dryt, brennynge out of
the tentes, as the Lord comaundide.
18 And
he offred a wether into brent sacrifice;
vpon whos heed whanne Aaron and his
sones hadden putte her hondes,
19 he offred
it, and heelde the blood of it bi enuyroun
of the auter.
20 And thilk wether cuttynge
in gobetis, the heed of it, and the lemes,
and the talw&yogh; he brente with fier,
21 washed
before the entraylis and the feete; and al
the wether he tende to gidere vpon the
auter, forthi that it was brent sacrifice of
moost swete smel to the Lord, as he comaundide
to hym.
22 And he offrede the
secounde wether, into the sacringe of
preestis; and Aaron and his sones puttiden
her hondes vpon the heed of it.
23 The which whanne Moyses hadde offride,
takynge of the blood towchid the ende of
the ri&yogh;t eere of Aaron, and the thowmbe
of his ri&yogh;t hoond, also and of the foote.
And he offred the sones of Aaron.
24 And
whanne of the blood of the offred wether
he hadde towchid the eende of the ri&yogh;t
eere of echon, and the thoumbe of the
hoond, and of the ri&yogh;t foote, the relif he
-- --
heelde vpon the auter bi enuyroun.
25 The
talw&yogh; forsothe, and the tayle, and al the
fatnes that couereth the entrayles, and
the calle of the mawe, and the two reynes
with her talw&yogh;es, and the ry&yogh;t shuldre he
seuerede.
26 Takynge forsothe of the leepe
of therf looues, that was before the Lord,
looues with outen sour dow&yogh;, and a litil
rownd loof spreynt with oyle, and a
thinne caake, he putte vpon the talw&yogh;es,
and the ri&yogh;t shuldre,
27 takynge alle togidere
to Aaron and hys sones.
28 The which
whanne thei hadden rerede hem beforn
the Lord, eftsones takynge of the hondes
of hem, he brente vpon the auter of brent
sacrifice, forthi that it was the offring of
consecracioun, into smel of swetnes of sacrifice
to the Lord.
29 And he took the litil
breest, rerynge it before the Lord, of the
wether of consecracioun into his part, as
the Lord hath comaundide hym.
30 And
takynge the oynement, and the blood that
weren in the auter, he spreynde vpon
Aaron, and his vestementes, and upon his
sones, and her clothis.
31 And whanne he
hadde halowide hem in her clothinge, he
comaundide hem, seiynge, Seethe &yogh;e the
flesh before the &yogh;atis of the tabernacle,
and ther etith it; and the looues of consecracioun
etith, that ben putte in the leepe,
as God hath comaundide to me, seiynge,
Aaron and his sones schulen eete hem;
32 what euer forsothe were laft of the flesh
and of the looues, the fier shal consume.
33 Fro the dore forsothe of the tabernacle &yogh;e
shulen not goo out seuen daies, vnto the
day in the which the tyme of &yogh;oure consecracioun
shal be fulfillid; seuen forsothe
daies is endid the consecracioun,
34 as
now it is doon, that the ryte of the sacrifice
be fulfild.
35 Day and ny&yogh;t &yogh;e shulen
-- --
dwelle in the tabernacle, al about kepynge
the wardes of the Lord, lest &yogh;e dien; so
forsothe it is comaundide to me.
36 And
Aaron and his sones diden alle thingis,
that the Lord spak bi the hoond of
Moyses.
CAP. IX.
1 The ei&yogh;t day forsothe doon, Moyses
clepide Aaron, and his sones, and the
greet men thur&yogh; birthe of Yrael; and he
seide to Aaron,
2 Tak fro the droue a calf
for synne, and a wether into brent sacrifice,
eithir with out wemme, and offre
hem before the Lord.
|
