Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VI.
1 And the Lord seide to Moyses, Now
thow shalt seen, what thingis Y am to do
to Pharao; forsothe bi a strong hoond he
shal leeue hem, and in a my&yogh;ti hoond he
shal throwe hem out of his loond.
2 And
the Lord spak to Moyses, seiynge, Y the
-- --
Lord,
3 that aperyde to Abraham, and to
Ysaac, and to Jacob in the God Almy&yogh;ti;
and my name Adonay Y shewyde not to
hem;
4 and I couenauntide a boond of pees
with hem, that Y shulde &yogh;yue hem the
loond of Chanaan, the loond of her pilgrimage,
in the which thei weren comlyngys.
5 Y haue herd the weylyng of the
children of Yrael, in the which the Egipciens
han oppressid hem, and Y haue recordide
of my couenaunte.
6 Therfore sey
to the sones of Yrael, Y the Lord, that
shal lede &yogh;ow out of the traueilous prisoun
of Egipciens; and delyuere fro seruage;
and forbigge in an ouerpassyng arm, and
in greet domes;
7 and Y shal tak &yogh;ow to
me into a puple, and Y shal be &yogh;oure
Lord; and &yogh;e shulen knowe, that Y am
the Lord &yogh;oure God, that hath ladde &yogh;ow
out fro the traueylows prisoun of Egipciens,
and brou&yogh;te &yogh;ow into the loond,
8
vpon the which Y have lift up myn
hoond, that Y &yogh;yue it to Abraham, Ysaac,
and Jacob, and Y shal &yogh;yue it to be had
to &yogh;ow; I a Lord.
9 Thanne Moyses tolde
alle thes thingis to the sones of Yrael, the
whiche assentiden not to hym for the angwisch
of spyryt, and the moost hard
werk.
10 And the Lord spak to Moyses,
seiynge,
11 Goo yn, and spek to Pharao, the
kyng of Egipte, that he leeue the sones
of Yrael from his loond.
12 Moyses answerde
before the Lord, Loo! the sones
of Yrael heren me not, and what manere
shal Pharao here, namelich sith Y am vncircumcidid
in lippes?
13 And the Lord
spak to Moyses and Aaron, and &yogh;af a
maundement to the sones of Yrael, and
to Pharao, the kyng of Egipte, that thei
leden the sones of Yrael out of the loond
of Egipte.
14 Thes be the princis of the
housholdis bi her meynese. The sones of
Ruben, the first goten of Yrael, Enoch,
and Fallu, Esrom, and Carmy;
15 thes the
-- --
cognaciouns of Ruben. The sones of Symeon,
Jamuel, and Jamyn, and Adod, and
Jachym, and Soer, and Saul, the sone of
Chananytidis; thes the progenyes of Symeon.
16 And thes the names of the sones
of Leuy bi her cognaciouns, Gerson, and
Caath, and Merary. Forsothe the &yogh;eres
of the lijf of Leuy weren an hundred and
seuen and thretti.
17 The sones of Gerson,
Lobny and Semei, by her cognaciouns.
18 The sones of Caath, Amram, and Ysuar,
and Ebron, and Oziel; the &yogh;eris forsothe
of the lijf of Caath an hundryd and six
and thretii.
19 The sones of Merary, Mooly
and Musi. Thes the cognaciouns of Leuy
bi her meynese.
20 Amram forsothe tok a
wijf, Jochabed, the dou&yogh;ter of the brother
to hys fader, the which bar to hym Aaron,
and Moysen, and Mary; and the
&yogh;eris of the lijf of Amram weren an hundryd
and seuen and thretti.
21 And the
sones of Ysuar, Chore, and Naphes, and
Zethry.
22 The sones forsothe of Oziel, Mysael,
and Elizaphan, and Sethri.
23 Aaron
forsothe tok a wijf, Elizabeth, the dow&yogh;ter
of Amynadab, the sister of Naason, the
which bar to hym Nadab, and Abyut, and
Aleazar, and Ythamar.
24 The sones forsothe
of Chore, Aser, and Elchana, and
Abiasab; thes ben the cognaciouns of Chorytis.
25 And forsothe Eliazar, the sone of
Aaron, tok a wijf of the dow&yogh;tris of
Phatiel, the which bar to hym Phynees.
Thes ben the princis of the Leuytis
meynese bi her cognaciouns.
26 This is Aaron
and Moyses, to whom the Lord comaundide,
that thei shulden lede the
sones of Yrael out of the loond of Egipte
be her companyes;
27 thes ben that speken
to Pharao, the kyng of Egipte, that thei
leden the sones of Yrael out of Egipte;
this is Moyses and Aaron,
28 in the day that
the Lord spak to Moyses in the loond of
Egipte.
29 And the Lord spak to Moyses,
seiynge, Y the Lord; spek to Pharao,
-- --
kyng of Egipte, alle thingis that Y speke
to thee.
30 And Moyses seith bifore the
Lord, Loo! Y am vncircumcidid in lippys,
what manere shulde Pharao here me?
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
