Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IV.
1 Moyses answerde, and seith, Thei shulen
not leue me, ne here my voyce; but seyn,
The Lord apeeryde not to thee.
2 Thanne
he seide vnto hym, What is that that
thow holdist in thin hoond? He answerde,
A &yogh;erde.
3 And the Lord seide,
Throw it into the erthe; he threwe it,
and it was turned into a boske eddre, so
that Moyses flei&yogh;.
4 And the Lord seide,
Strecch out thin hoond, and tak his
tayle; he strau&yogh;te out, and helde, and it
was turned into a &yogh;erde.
5 That thei bileuen,
he seith, that God of thi fadres
aperide to thee God of Abraham, and
God of Ysaac, and God of Jacob.
6 And
the Lord seide eftsones, Putte thin hoond
into thi bosum; the which whanne he
hadde putt into his bosum, he brou&yogh;te it
forth leprows, at liknes of snow.
7 Drawe
a&yogh;en, he seith, the hoond into thi bosum:
-- --
he a&yogh;en drew&yogh;, and brou&yogh;te it forth eftsones,
and it was lijk vnto the tother
fleshe.
8 If thei leuen not, he seith, to thee,
ne here the word of the former signe,
thei shulen leue to the word of the signe
that folweth;
9 and if forsothe they leuen
not to thes twey signes, ne heren thi
voys, tak water of the floode, and heeld it
out vpon the drye loond, and what euere
thow drawist of the floode, it shal be
turned into bloode.
10 Moyses seith, Lord,
Y biseche, I am not wel spekynge fro
&yogh;isterday and fro the thridde dai hens;
and sith thow spak to thi seruaunt, Y am
of more latsum and of more slow tonge.
11 The Lorde seide to hym, Who made the
mouth of man, or who forgide the
dowmbe and the deef, the seer and the
blynde? whether not Y?
12 Goo thanne, I
shal be in thi mouth, and Y shal teche
thee what thow shalt spek.
13 And he, Y
biseche, he seith, Lord, sende whom thow
art to sende.
14 The Lord wrooth a&yogh;ens
Moyses, seith, Aaron, thi brother, Leuyte,
I wote that he is a fayr speker;
loo! he shal goo out into thin a&yogh;en goynge,
and seynge thee he shal `be glad
in herte.
15 Spek to him, and put my
wordis in his mouth, and Y shal be in
thi mouth and `in his mouth; and Y
shal shewe to &yogh;ou what &yogh;e shulen do.
16 He shal speke for thee to the puple, and
he shal be thi mouth; thow forsothe shai
be to hym in thes thinges, that pertenen
to God.
17 And this &yogh;erde tak in thin
hoond, in the which thow art to doon
signes.
18 Moyses &yogh;ede, and turned a&yogh;en to
Jetro, his wyues fader, and he seide to
hym, Y shal goo, and turn a&yogh;en to my
bretheren in to Egipte, that Y se if thei
&yogh;it lyuen. To whom seide Jetro, Goo in
pees.
19 Thanne the Lord seide to Moyses
in Madian, Goo, and turn a&yogh;en into Egipte;
-- --
forsothe alle thei ben deede, that
sou&yogh;ten thi lyf.
20 Moyses tok his wyf, and
his sones, and putte hem upon an asse,
and he is turned a&yogh;en into Egipte, berynge
the &yogh;erde of God in his hoond.
21 And the
Lord seide to hym turnynge a&yogh;en into
Egipte, Looke, that alle the signes worthi
to be shewid thow do, the whiche Y
have putte in thin hoond, before Pharao;
Y shal hardun his herte, and he shal not
leeue the puple;
22 and thow shalt seye to
hym, Thes thingis seith the Lord, My
sone first getun Yrael;
23 Y seide to thee,
leeue my sone, that he serue to me; and
thow woldist not leeue hym; loo! Y shal
slee thi first gotun sone.
24 And whanne
he was in the weie, in the syde turnyng
place to reste, the Lorde &yogh;ede a&yogh;ens hym,
and wold slee hym.
25 Anoon Sephora tok
a ful sharp stoon, and kitte al aboute the
vttermore skynne of the &yogh;erde of hir sone,
and it touchide his feet; and she seith,
A spouse of blodis thow art to me.
26 And
she lafte hym, for the circumsicioun, aftir
that she hadde seid, A spouse of blodes
thou art to me.
27 The Lord forsothe seide
to Aaron, Goo into the a&yogh;en comyng to
Moises, into desert; the which &yogh;ede to
mete with hym into the hil of God, and
he kysside hym.
28 And Moyses tolde Aaron
alle the wordis of the Lord, for the
whiche he sente hym, and the toknes
that he comaundyde.
29 And thei comen togidere,
and thei gadereden togidere alle
the alder men of the sones of Yrael.
30 And
Aaron spak alle the wordis, that the
Lord hadde seyde to Moyses; and he
dide the signes beforn the puple;
31 and
the puple bileuede; and thei herden that
the Lord hadde visitid the sones of Yrael,
and that he hadde biholdun the affliccioun
of hem; and redi thei anourden.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|