Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXX.
1 And thou shalt make an auter, for to
brenne `the maad ensence of the trees of
Sichym,
2 hauynge o cubijt of lengthe, and
another of brede, that is foure cornerd,
and two cubites in hei&yogh;t; hornes shulen
goo out of it.
3 And thow shalt clothe it
with moost puyr gold, as wel the litel
fier panne of it, as the walles bi enuyroun,
and the hornes; and thow shalt
make to it a coroun of gold `bi enuyroun,
4 and two rynges of gold vnder the
hornes bi eche sides, that the berynge
staues mowen be putte into hem, and the
auter born.
5 And thilke berynge staues
thow shalt make of the trees of Sichym,
and gilden;
6 and thow shalt sette the auter
a&yogh;ens the veyle, that hongith before
the arke of testymonye before the propiciatorye,
with the which is couerd the
witnessynge, where Y shal speke to thee.
7 And Aaron shal brenne the ensence swete
smellynge vpon it erly; whanne he shal
araye the lanternes, he shal teenden it;
-- --
and whanne he settith hem at euen,
8 he
shal brenne the euerlastynge maad ensense
before the Lord, into &yogh;oure generaciouns.
9 &YOGH;e shulen not offer vpon it ensence
of other makynge, ne offrynge, ne
sacrifice, ne offrynge loues &yogh;e shulen taste.
10 And Aaron shal preye vpon the hornes
of it ones bi the &yogh;eer, in blood that is
offerd for synne, and he shal plese vpon
it in &yogh;oure generaciouns; the holy of halowen
it shal be to the Lord.
11 And the
Lord spake to Moyses,
12 seiynge, Whanne
thow takist a sowme of the sones of
Yrael, eche shal &yogh;yue prijs after the
noumbre for her soules to the Lord, and
there shal be no veniaunce in hem, whanne
thei shulen be nowmbred.
13 And eche shal
&yogh;yue this that passith to a name, half `an
nounce after the mesure of the temple;
a sicle, `that is, a nounce, hath twenti
half scripilles; the half perty of a sicle
shal be offerd to the Lord.
14 He that is
had in the noumbre, fro twenti &yogh;eer and
aboue, shal &yogh;yue the prijs;
15 the riche shal
not adde to an half sicle, and the pore no
thing shal lesse.
16 And the money takun,
that is gederid of the sones of Yrael,
thow shalt take in to the vses of the tabernacle
of witnessynge, that there be the
mynde of hem before the Lord, and he
haue mercy to the soules of hem.
17 And
the Lord spake to Moyses,
18 seyynge, And
thow shalt make a brasun lauatory with
his foot to washe with, and thow shalt
putte it betwix the tabernacle of witnes
and the auter; and the water put yn,
19 Aaron and his sones shulen washe in it
her hondes and feete,
20 whanne thei ben to
goynge ynto the tabernacle of witnessyng,
and whanne thei ben nei&yogh;ynge to
the auter that thei offren in it maad ensence
to the Lord,
21 lest perauenture thei
dyen; lawful euerlastynge it shal be to
hym and to the seed of hym bi successyouns.
-- --
22 And the Lord spak to Moyses,
seiynge,
23 Tak to thee swete smellynge
thingis, of the first myrre and chosen,
fyue hundryd siclis; and the half of the
canel, that is, two hundrid and fifti siclis;
24 and of chaalamy also two hundryd
and fifti, and of chasee fyue hundryd
sicles, in the wei&yogh;t of the seyntuarye;
oyle of the olyues, the mesure of hyn,
`that is, of two pownd;
25 and thow shalt
make the holy oyle of anoyntyng, an
oynement maad with the werk of ungwentarye.
26 And thow shalt anoynt of
it the tabernacle of witnessynge, and the
arke of testament,
27 and the bord with his
vessels, and the candelstik, and the necessaryes
of it,
28 the auter of ensence, and of
al brent sacrifice, and al the necessarye
that perteyneth to the heriying to hem.
29 And alle thow shalt halowe, and thei
shulen be the holi thingis of halowes;
he that towchith hem, shal be halowid.
30 Thow shalt anoynt Aaron, and the sones
of hym, and thow shalt halwe hem, that
thei beren the office of preesthod to me.
31 And to the sones of Yrael thow shalt
seie, This oyle of anoyntyng holy it shal
be to me into &yogh;oure generaciouns.
32 The
flesh of man shal not be anoyntyde of it,
and biside the composicioun of it &yogh;e shulen
not make another, for it is halowid,
and hooli shal be to &yogh;ow.
33 What euer
man make sich on, and &yogh;yue of it to an
alyen, he shalle be putte out of his puple.
34 The Lord forsothe seyde to Moyses, Tak
to thee swete smellynge thinges, stacten,
and onycha, galbantum of good smel, and
ensence moost li&yogh;tynge, and alle thei shulen
ben of euen wei&yogh;te.
35 And thow shalt
make the maad ensence with werk of
oynement makynge, meyngid bisily, and
puyr, and moost worthi with halowyng.
-- --
36 And whanne thow hast pownede alle togidere
into moost smal powdre, thow
shalt putte of it before the tabernacle of
wytnessynge, in the which place Y shal
apere to thee; hooly of halowes shal be
to &yogh;ow the maad ensence.
37 Siche a makynge
&yogh;e shulen not make into &yogh;oure owne
vses, for hooli it is to the Lord.
38 Eche
man that doth lyik thing, that he ful
vse the smel of it, he shal peryshe fro his
puplis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
