Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XLVII.
1 And he turnede me to the &yogh;ate of the
hous; and loo! waters wenten out vndir
the thresfold of the hous to the eest;
forsothe the face of the hous byheelde to
the eest; sothely the waters wenten doun
in to the ri&yogh;t syde of the temple, to the
south of the auter.
2 And he ledde me
out by the waye of the north &yogh;ate, and
he turnyde me to the waye with outen
the vtmer &yogh;ate, the waye that byheelde
to the eest; and loo! waters tournynge
a&yogh;ein of the ri&yogh;t syde,
3 whan the man
wente out to the eest, that hadde a litil
coord in his hond, and matte a thousand
cubitis, and ledde me ouer by the water
-- --
vn to the helis.
4 And aft sone he matte
a thousand, and ledde me ouer by the
water vn to the knees. And aft sone he
matte a thousand, and ledde me by the
watre vn to the reynys.
5 And he matte a
thousand, by the streme of reyn whom Y
mi&yogh;te not ouer passe; for deep waters of
the streme of reyn wexiden grete, whiche
may not be ouer wad.
6 And he saide to
me, Certis, sone of man, thou hast seen.
And he ledde me, and turnyde me to the
ryuer of the streme of rayn.
7 And whan
I hadde conuertid me, loo! in the ryuer
of the streem of rayn ful many trees on
eche syde.
8 And he saith to me, These
waters that gon out to the heepis of the
eest soond, and gon doun to the playn
thingus of desert, shuln go ynne to the
see, and go out; and the waters shuln
heele.
9 And eche lyuynge soule that
creepith, whither euer the strem of rayn
shal cum, shal lyue; and there shuln be
fishis many ynow, after that these waters
shuln cum thidir, and thei shuln be maad
hoole, and shuln lyue; alle these shuln
lyue, to whom the streme of rayn shal
cum.
10 And fishers shuln stond vpon hem;
fro Engaddi vnto Engallym shal be dryinge
of nettis; ful many spices shuln be
of fishis therof, as fishes of the grete
se, of ful grete mykilnesse;
11 forsothe in
brynkis therof and in mareisis thei shuln
not be helid, for thei shuln be &yogh;ouen in
to salt places.
12 And on the streme of
rayn, and ryuers therof, and on eche
part, al tree berynge appul shal be brou&yogh;t
forth; a lefe shal not fle awey therof, and
the fruyt of it shal not fayle; by eche
monethes it shal brynge first fruytis, for
the waters therof shuln go out of sayntuarie;
and fruytis therof shuln be in to
mete, and lefis therof to medecyne.
13 These thingus saith the Lord God, This
is the terme, in whiche &yogh;e shuln weelde
the lond, in twelue kynredis of Yrael;
-- --
for Joseph hath double coord, or part.
14 Forsoothe &yogh;e shuln weelde it, eche euenly
as his brother; vpon whom I reyside myn
hond, that I shulde &yogh;eue to &yogh;our fadris;
and this lond shal falle to &yogh;ou in to possessioun.
15 This is the terme of the lond
at the north coost, fro the grete se, the
way of Bethalon to men cummynge to
Sedala,
16 Emath, Beroth, Sabarym, whiche
is bitwix the mydil of Damask and the
coostis of Emath, the hous Athicon, that
is bysidis the termys of Auran.
17 And
the terme shal be fro the se vn to the
hous Ennon, the terme of Damask, and
fro the north vn to the north, the terme,
or eende, of Emath; forsothe the north
plage, or coost.
18 Forsothe the eest coost
of the mydil of Auran, and of the mydil of
Damask, and of the mydil of Galaad, and
of the mydil of the lond of Yrael, Jordan,
departynge at the eest see, &yogh;e shuln mete
eest coost.
19 Sothely the south coost of
mydday, fro Thamar vn to the waters of
a&yogh;ein saiynge of Cades; and the streme
of rayn vn to the grete see, and the south
cost at mydday.
20 And the coost of the
see is the grete see, fro the eende coost
by the strei&yogh;t, til thou cum to Emath;
this is the coost of the see.
21 And &yogh;e
shuln departe this lond to &yogh;ou by lynagis
of Yrael;
22 and &yogh;e shuln sende it in to
eritage to &yogh;ou, and to cumlyngis that
camen to &yogh;ou, that gendreden sonys in
the mydil of &yogh;ou; and thei shuln be to
&yogh;ou as in dwellers amonge the sonys of
Yrael; with &yogh;ou thei shuln departe possessioun,
in mydil of the lynages of Yrael.
23 Forsothe in what euer lynage a cumlynge
shal be, there &yogh;e shuln &yogh;eue possessioun
to hym, saith the Lord God.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
