CAP. XXXIII.
1 And don is the wrd of the Lord to
Jeremye, the secounde tyme, whan &yogh;it he
was closid in the porche of the prisoun,
seiende,
2 These thingys seith the Lord,
that is to make and to foorme it, and to
greithe, Lord the name of hym;
3 Crie to
me, and Y shal ful out here thee, and
Y shal telle to thee grete thingus, and
faste, that thou wost not.
4 For these
-- --
thingus seith the Lord God of Irael to
the houses of this cite, and to the houses
of the king of Juda, that ben destro&yogh;ed,
and to the strengthingus, and to the
swerd of men comende,
5 that thei fi&yogh;te with
the Caldeis, and fulfille hem with the
careynes of men, the whiche Y smot in
my wodnesse, and in myn indignacioun;
and Y hidde my face fro this cite, for alle
the malice of hem.
6 Lo! `Y shal close
a&yogh;een to them the wounde and helthe,
and helen hem; and Y shal opene to
them the lowely pre&yogh;yng of pes, and of
treuthe;
7 and turne the turnyng of Juda,
and turne the turnyng of Jerusalem, and
Y shal bilde vp hem, as fro the bigynnyng.
8 And Y shal clense out hem fro
ther wickednesse, in whiche thei synneden
to me, and mercifull Y shal be to
alle the wickenesses of hem, in whiche
thei `trespasiden to me, and dispisiden
me.
9 And it shal be to me in to name,
and in to io&yogh;e, and in to preising, and in
to ful out io&yogh;ing, to alle Jentiles of erthe,
that herden alle goodis that Y am to do
to them; and thei shuln inwardly dreden,
and ben disturbid in alle goodus, and in
alle pes, that Y shal do to them.
10 These
thingus seith the Lord, &YOGH;it shal ben herd
in this place, whom &yogh;ee seyn to be desert,
for thi that ther is not a man ne
beste in the cites of Juda, and withouteforth
Jerusalem, that ben desolat withoute
man, and withoute dwellere, and
withoute beste,
11 vois of io&yogh;e, and vois of
gladnesse, vois of man spouse, and vois
of womman spouse, vois of men, seiende,
Knoulecheth to the Lord of ostus, for
good the Lord, for withoute ende his
mercy, and of men berende vouwis in to
the hous of the Lord; forsothe Y shal
bringe a&yogh;een the turnyng of the lond, as
fro the bigynnyng, seith the Lord.
12 These
thingus seith the Lord of ostus, &YOGH;it shal
be in this desert place, withoute man
-- --
and withoute beste, and in alle his cites,
a dwelling place of shepperdus, of liggende
flockus.
13 And in the mountewous
cites, and in the feldi cites, and in the
cites that at the south ben, and in the
lond of Beniamyn, and in the cumpas of
Jerusalem, and in the cites of Juda, &yogh;it
shul passe flockes, at the hond of the
noumbrere, seith the Lord.
14 Lo! da&yogh;es
comen, seith the Lord, and Y shal rere
a good wrd, that Y spac to the hous of
Irael, and to the hous of Juda.
15 In tho
da&yogh;es, and in that tyme, to buriowne Y
shal make Dauid, a buriownyng of ri&yogh;twisnesse;
and he shal do dom and ri&yogh;twisnesse
in the lond.
16 In tho da&yogh;es shal
be saued Juda, and Irael shal dwelle
trostili; and this is the name that they
shul clepen hym, The Lord oure ri&yogh;twis.
17 For these thingus seith the Lord, Dien
shal not of Dauid a man, that sit vp on
the trone of the hous of Irael;
18 and of
the prestus and Leuytus shal not die a
man fro my face, that offreth brent sacrifices,
and brenne sacrifise, and sle victorie
sacrifise alle da&yogh;es.
19 And don is the wrd
of the Lord to Jeremye,
20 seiende, These
thingus seith the Lord, Yf voide mai be
mad my couenaunt with dai,
21 and my
couenaunt with ny&yogh;t, that ther be not
dai and ny&yogh;t in his tyme; and my couenaunt
voide shal moun be with Dauid,
my seruaunt, that ther be not of hym a
sone, that regne in his trone, and Leuytus,
and prestus,
22 my seruauns; as noumbred
out moun not be the sterres of heuene,
and mesured the grauel of the se, so Y
shal multeplie the sed of Dauid, my seruaunt,
and Leuytus, my seruauntys.
23 And
don is the wrd of the Lord to Jeremye,
Whether thou haue not seen,
24 that this
puple spac, seyende, Two kinredus that
the Lord hadde chose, ben cast awei, and
my puple thei dispiseden, for thi that ther
is no more a folc of kinde biforn hem.
-- --
25 These thingus seith the Lord, If my couenaunt
betwe dai and ny&yogh;t, and lawes to
heuene and erthe Y sette not;
26 forsothe
and the sed of Jacob and of Dauid, my
seruaunt, Y shal throwe aferr, that Y take
not of his sed princes, of the sed of Abraham,
Isaac, and of Jacob; I shal bringe
forsothe a&yogh;een the turnyng of hem, and
han mercy to them.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].