Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVIII.
1 The wrd that don is to Jeremye fro
the Lord,
2 seiende, Ris, and cum doun in
to the hous of the crockere, and there
thou shalt here my wrdis.
3 And Y cam
doun in to the hous of the crockere, and
lo! he made a werc vp on a whel.
4 And
scatered is the vessel, that he made of
clei with his hondus; and turned he made
that vessel other, as it pleside his e&yogh;en
that he shulde make.
5 And don is the
wrd of the Lord to me,
6 seiende, Whether
as maketh this crockere, shal not Y moun
make to &yogh;ou, hous of Irael? seith the
Lord. Lo! as the cley in to the hond
of the crockere, so &yogh;ee in myn hond, the
hous of Irael.
7 Sodeynli Y shal speke
a&yogh;en folc, and a&yogh;en reume, that Y drawe
vp bi the roote, and destro&yogh;e, and scatere
it.
8 If penaunce shul do that folc of his
euel, for whiche I spac a&yogh;en it, don shal
and Y othenking vp on the euel, that Y
tho&yogh;te that I shulde do to it.
9 And sodeynli
Y shal speken of the folc, and of
the rewme, that Y bilde vp, and plaunte
in it.
10 If it shul don euel in myn e&yogh;en,
that it here not my vois, othinking Y shal
do vp on the good that Y spac, that Y
shulde do to it.
11 Now thanne sei to the
man of Jewerie, and to the dwellere of
Jerusalem, seiende, These thingus seith
the Lord, Lo! Y make a&yogh;en &yogh;ou euel, and
thenke a&yogh;en &yogh;ou thenking; be turned a&yogh;een
eche fro his euel weie, and right reulith
&yogh;oure weies and &yogh;oure studies.
12 The
whiche seiden, Wee han dispeired, after
oure tho&yogh;tus forsothe wee shul go, and
eche aftir the shreudenesse of his euel
-- --
herte wee shul do.
13 Therfore these thingus
seith the Lord, Asketh folc of kinde, who
herde such orrible thingus, the whiche
to myche dide the maiden Irael?
14 Whether
of the ston of the feld shal faile the
sno&yogh; of Liban? or ben pullid awei moun
watris brekende out, colde and ful myche
flowende doun?
15 For for&yogh;at me my puple,
in veyn offrende licoures, and stumblende
in ther weies, and in the styes of the
world, that thei go bi them in a weye
not berdid;
16 that be mad the lond of
hem in to desolacioun, and in to whistling
euere durende; eche forsothe that
passeth bi it, shal become stoneid, and
mouen his hed.
17 As a brenende wind Y
shal scatere them bifor the enemy; bac
and not face Y shal shewe to them, in the
dai of perdicioun of hem.
18 And thei seiden,
Cometh, and thenke wee a&yogh;en Jeremye
tho&yogh;tus; forsothe pershe shal not the
lawe fro the prest, ne counseil fro the
wise man, ne sermoun fro the profete;
cometh, and smyte wee hym with tunge,
and take wee not heed to alle the sermouns
of hym.
19 Tac heed, Lord, to me,
and here the vois of myn adversaries.
20 Whether &yogh;olden is for good euel, for thei
deluen a dich to my soule; recorde, that
Y stod in thi si&yogh;t, that I schuld speke for
them good, and turne awei thin indignacioun
fro them.
21 Therfore &yogh;if the sonus of
them in to hunger, and bring doun hem
in to the hondus of swerd; mad be the
wifes of them withoute free childer, and
widewes, and the men of hem be slayn
with deth; the &yogh;unge of them be thei
stikid with swerd in bataile.
22 Herd be
the cri fro the houses of them, thou shalt
bringe to forsothe vp on hem a thef sodeynly;
for thei doluen a dich that thei
take me, and grynes thei hidden to my
feet.
23 Thou forsothe, Lord, wost al the
counseil of hem a&yogh;en me in to deth; ne
be thou plesid to the wickidnesse of
-- --
them, and the synne of hem fro thi face
be not don awei; be thei mad togidere
fallende in thi si&yogh;t, in tyme of thi wodnesse;
awei fro good vse them.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
