Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVII.
1 The synne of Jude writen is with
an irene pointel, in an adamantyne nail,
grauen out vp on the brede of ther herte,
and in the hornes of their auteres.
2 Whan
recorde shul the sonus of them of ther
auteres, and of ther maumet wodus, and
of ther braunching trees in hee&yogh;e mounteynes,
sacrifiende in the feld,
3 thi strengthe
and alle thi tresores in to taking awei Y
shal &yogh;yue, thin hee&yogh;e thingus for the
synnes in alle thi coestes.
4 And thou shalt
be forsake alone of thin eritage that Y
-- --
&yogh;af to thee; and to seruen Y shal make
thee to thin enemys, in the lond that
thou knewest not; for fyr thou brendist
vp in my wodnesse, vnto euermor it shal
brenne.
5 These thingus seith the Lord,
Cursid the man that trostith in man,
and putteth flesh his arm, and fro the
Lord his herte goth awei.
6 Forsothe it
shal ben as `iencian trees in desert, and
he shal not see, whan shal come good;
but he shal dwelle in dro&yogh;te in desert, in
the lond of briyn, and vnabitable.
7 Blessid
the man that trosteth in the Lord, and
the Lord shal ben his trost.
8 And he
shal be as a tree, that is ouer plauntid
vp on watris, that at the humour sendith
his rootes; and he shal not drede,
whan shal come gret hete; and his lef
shal be grene, and in tyme of dro&yogh;te shal
not be bysy, ne any tyme shal cese to
make frut.
9 Shreude is the herte of man,
and vnserchable; who shal knowen it?
10 I
the Lord serchende herte, and prouende
reenes, that &yogh;yue to eche man after his
weie, and after the frut of his findingus.
11 The partrich nurshede that she bar
not, made richesses, and not in dom; in
the myddil of ther da&yogh;es she shal forsake
them, and in hir laste she shal ben vnwis.
12 The dignete see of glorie of hei&yogh;te fro
the bygynnyng, place of oure halewing,
abiding of Irael.
13 Lord, alle that thee forsaken,
shul be confoundid; goende awei
fro thee in the erthe shul be writen, for
thei forsoken the veyne of lyuyng watris,
the Lord.
14 Hele me, Lord, and Y shal ben
helid; saf mac me and Y shal be saf; for
my preising thou art.
15 Lo! thei seyn to
me, Wher is the wrd of the Lord? come
it.
16 And Y am not disturbid, thee shepperde
folewende, and the dai of man I
disirede not, thou wost. That that is
gon out fro my lippis ri&yogh;t in thi si&yogh;te
-- --
was.
17 Be thou not to me to ferd; myn
hope thou in the dai of tormenting.
18 Be
thei confoundid, that me pursuen, and
confoundid be not Y; inwardly drede thei,
and inwardly drede not Y; bring in vp
on hem dai of tormenting, and with
double to-treding to-tred hem.
19 These
thingus seith the Lord God to me, Go,
and stond in the &yogh;ate of the sonus of the
puple, bi whiche gon in kingus of Juda
and gon out, and in alle the &yogh;atus of Jerusalem.
20 And thou shalt sei to them,
Hereth the wrd of the Lord, &yogh;ee kingus
of Juda, and al Jewerie, and alle the
dwelleris of Jerusalem, that gon in bi
these &yogh;atus.
21 These thingus seith the Lord
God, Kepeth &yogh;oure soules, and wilith not
berthenus bern in the dai of sabat, ne
bringe &yogh;ee in bi the &yogh;atus of Jerusalem.
22 And wileth not caste out burthenus fro
&yogh;oure houses in the dai of sabat, and
eche werc &yogh;ee shul not do; halewith the
day of sabat, as Y comaunde to &yogh;oure
fadris.
23 And thei herden not, ne boweden
in ther ere, but inwardly hardeden
ther nol, lest thei herde me, and lest thei
toke discyplyne.
24 And it shal be, if &yogh;ee
shul heren me, seith the Lord, that
&yogh;ee bringe not in birthenus bi the &yogh;atus
of this cite in the day of sabat, and if
&yogh;ee halewe the dai of sabat, `that &yogh;ee don
not in it alle werc,
25 gon in shul bi the
&yogh;ates of this cite kingus and princes sittende
vpon the see of Dauid, and ste&yogh;ende
vp in chares and hors; thei, and the
princes of them, men of Juda, and the
dwelleris of Jerusalem; and dwellid shal
be this cite in to euermor.
26 And `comen
shul fro the cite of Juda, and fro the
cumpas of Jerusalem, and fro the lond of
Beniamyn, and fro the wilde feldus, and
fro the mountuous places, and from the
south, berende brent sacrifise, and slayn
offring, and sacrifise, and encens; and
`thei shul bringe in offring in to the
hous of the Lord.
27 If forsothe &yogh;ee shul
-- --
not here me, that &yogh;ee halewe the day of
sabat, and that &yogh;ee bere not berthene,
and ne bringe in bi the &yogh;atus of Jerusalem
in the dai of sabat, Y shal tende vp
fyr in his &yogh;atus; and it shal deuoure the
housys of Jerusalem, and shal not be
quenchid.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
