Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXXV.
1 The mene tyme the Lord spak to Jacob,
Aryse, and stey to Bethel, and dwel
there, and mak an autere to the Lord,
that aperide to thee whanne thou flow&yogh;
Esau, thi brother.
2 Jacob forsothe, al his
hows clepid togidere, seith, Doth awey
alyen goddis, that ben in the mydil of
&yogh;ow, and be &yogh;e clensid, and chaunge &yogh;e
&yogh;oure clothis;
3 rise &yogh;e, and steye we vp in
to Bethel, that we maken there an autere
to the Lord, the which hath herd me in
the day of my tribulacioun, and was felaw
of my weye.
4 Thanne thei &yogh;yuen to hym
alle alyen goddis that thei hadden, and
the eer ryngis, that weren in the erys of
hem; and he indeluede hem vndur an
theribynte, that is bihynde the cite of
Sichem.
5 And whanne thei weren goon,
feerde of God &yogh;ede vpon alle the cytees
by enuyroun, and thei weren not hardi
to pursue hem awey goynge.
6 Thanne
Jacob com to Luzam, that is in the loond
of Chanaan, Bethel bi name, he and alle
the peple with hym.
7 And he bilde there
an auteer, and clepide the name of that
place The hows of God; there forsothe
aperyde God to hym, whanne he shulde
flee his brother.
8 The same tyme was
deed Delbora, the norisch of Rebecca, and
was byried at the rootis of Bethel, vndur
an ook, and the name of the place is
clepid The ook of weping.
9 God forsothe
aperyde eftsones to Jacob, after that he
was turnyd a&yogh;en fro Mesopotany of Syrye,
and com into Bethel, and blissid to hym,
seiynge,
10 Thow shalt no more be clepid
Jacob, but Yrael shal be thi name. And
he clepid hym Yrael,
11 and seide to hym,
Y God Almy&yogh;ti, grow, and be thow multiplied,
folke of kynde and peplis of naciouns
of thee shulen ben, kyngis of thi
leendis shulen goon oute;
12 the loond that
Y haue &yogh;ouun to Abraham and Ysaac, Y
-- --
shal &yogh;yue to thee, and to thi seed after
thee.
13
14 And he &yogh;ede a wey fro hym. He
forsothe areride a stonen signe of worship,
in the place that God speke to hym,
sacrifynge vpon it sacrifice of licowres,
and heldynge oute oyle,
15 and clepynge the
name of that place Bethel.
16 And he goon
out thens, com in veer tyme to the loond
that ledith to Effratam, in the which
whanne Rachel shulde bere childe,
17 for
the hardnes of birth she biganne to perishe;
and the meedwijf seide to hir,
Wole thow not drede, for also and this
thow shalt haue a sone.
18 The soule forsothe
goynge oute for sorwe, and now
deeth fallynge ynne, the name of hir sone
she clepide Benony, that is, the sone of
my sorwe; the fader forsothe clepide
hym Beniamyn, that is, the sone of the
ri&yogh;t side.
19 Thanne Rachel was deed, and
was biryed in the weye that ledith to
Effratam, that is Bethleem.
20 And Jacob
reyside a signe of preysing vpon the sepulcre
of hir; this is the title of the
monument of Rachel vnto the present
day.
21 He goon out thens ficchide a tabernacle
ouer the towre of the flok.
22 And
whanne he shulde dwelle in that regioun,
Ruben &yogh;ede, and slepte with Bala, the
secundarye wijf of his fader, that to hym
was not vnwist. Forsothe the sones of
Jacob weren twelue;
23 the sones of Lia,
the first gotun Ruben, and Symyon, and
Leuy, and Judas, and Ysachar, and Zabulon;
the sones of Rachel,
24 Joseph, and
Beniamyn;
25 the sones of Bale, the seruaunt
of Rachel, Dan, and Neptalym;
the sones of Zelphe,
26 the handmayden of
Lye, Gad, and Aser. Thes the sones of
Jacob, which ben born to hym in Mesopotanye
of Syrye.
27 He cam also to Ysaac,
his fadyr, into Mambre, the cyte of Arbee,
this is Ebron, in the which pilgrimagid
-- --
Abraham and Ysaac.
28 And fulfillid
ben the dayes of Ysaac an hundryd
and ei&yogh;ti of &yogh;eris;
29 and endid thur&yogh; age is
deed, and he is put to his peple, olde, and
ful of dayes; and biryeden hym Esau
and Jacob his sones.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|