Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIII.
1 And Sara lyuyde an hundrid and seuen
and twenti &yogh;eer,
2 and she was deed in the
citee of Arbee, that is Ebron, in the loond
of Chanaan; and Abraham cam, that he
my&yogh;te weyl and wepe hir.
3 And whanne
he was rysun fro the office of the deed cors,
he spake to the sonys of Heth, seiynge,
4 A comelyng and a pilgrime I am anentis
&yogh;ow; &yogh;yue &yogh;e to me ry&yogh;t of a biryyng
place with &yogh;ow, that I mow biry ynne
my deed.
5 And the sones of Heth answeriden,
seiynge, Lord, here vs;
6 the
prince of God thow art anentis vs; in
oure chosun berielis birye thi deed, and
no man shal mow wern thee, but in the
monument of hym thow byrye thi deed.
7 And Abraham aroos, and lowtide the
puple of the erthe, the sones, that is, of
Heth.
8 And he seide to hem, If it plese to
&yogh;oure soule that I byrye my deed, here
&yogh;e me, and preye &yogh;e for me anentis
Ephron,
9 the sone of Seor, that he &yogh;yue
to me the dowble spelunk, `or caue, that
he hath in the vttermore party of his
feeld; for the worth of money take he it
to me bifore &yogh;ow into possessioun of a
sepulcre.
10 Ephron forsothe dwellid in the
-- --
myddil of the sones of Heth. And Ephron
answeryde to Abraham, alle men herynge
the which &yogh;ede into the &yogh;aat of the cite
of hym,
11 seiynge, My lord, so shal it not
be, but thow more herkyn that I speke;
the feeld I take to thee, and the spelunk
that is in yt, present the sonys of my
puple; birye thi deed.
12 Abraham lowtide
bifore the Lord, and the puple of the
loond,
13 and spake to Ephron, stondynge
aboute the folk of hym, I biseche, that
thow here me; I shal &yogh;yue money for
the feeld, take it, and so Y shal birye my
deed in the feeld.
14 And Ephron answeryde,
My lord,
15 here me, the erthe that
thow askist is worth foure hundryd sicles
of siluer, this is the pryis bitwix me and
thee, but what is that? birye thi deed.
16 The which whanne Abraham had herd,
he peyside the money that Ephron had
askyd, herynge the sonys of Heth, foure
hundrid siclys of siluer, and of preued
comune money.
17 And the feeld sumtyme
of Ephron, in the which was the dowble
spelunk, biholdynge to Mambre, as wel
it as the spelunk and alle the trees of it,
in alle the termes of it bi enuyroun, is
confermyd to Abraham into possessioun,
18
seynge the sones of Heth and alle that
entreden the &yogh;ate of the cite of hym.
19 And so Abraham byriede his wijf Sara
in the dowble spelunk of the feeld, the
which bihelde Mambre; that is Ebron
in the londe of Chanaan.
20 And the feeld
is confermed, and the pit that was in it,
to Abraham, into possessyoun of a monument,
of the sones of Heth.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|