Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. LXVI.
1 These thingus seith the Lord, Heuene
my sete, and erthe the stonding vp place
of my feet. What is this hous, that &yogh;ee
shul bilde to me, and what is this place
of my reste?
2 Alle these thingus myn
hond dide, and mad ben alle these
thingus, seith the Lord; to whom forsothe
shall I beholde, but to my porelet
and contrit in spirit, and tremblende
my wrdis?
3 That offreth an oxe, as that
sle a man; that sleth a beste, as that
brayne a dogge; that offreth offring,
as that souwe blod he offre; that recordeth
of encens, as that blisse to the mawmet;
alle these thei chosen in ther weies,
and in ther abominaciouns the soule of
them delitede.
4 Wherfore and I shal
chesen the illusiouns of hem, and that
thei dredden I shal brenge to them; for
I clepede, and ther was not that shulde
answern; I spac, and thei herden not;
and thei diden euel in myn e&yogh;en, and
that I wolde not, thei chosen.
5 Hereth
the wrd of the Lord, that tremblen at
his wrd; &yogh;oure brethern seiden hatende
&yogh;ou, and castende awei for my name,
Glorified be the Lord, and wee shul see
in &yogh;oure gladnesse; thei forsothe shul be
confoundid.
6 Vois of the puple fro the
cite, vois fro the temple, vois of the
Lord &yogh;eldende &yogh;elding to his enemys.
7 `Er sche trauelide with peyne as wymmen
-- --
don, sche bar withoute; er shulde
come his birthe `wyth peyne, sche
bar a male child.
8 Who herde euere
such a thing, and who sa&yogh; to this lic?
Whether shal with ynne bern the erthe
in o dai, or shal be born a folc of kinde
togidere? For with ynne bar and withoute
bar Sion his sones.
9 Whether I that
othere men make to bern child, I my
self shal not bern? seith the Lord. If I
that ieneracioun to othere men &yogh;yue, bareyn
shal be? seith the Lord thi God.
10 Gladeth with Jerusalem, and ful out
io&yogh;eth in it, alle that louen it; io&yogh;eth
with it with io&yogh;e, alle that weilen vp on
it;
11 that and &yogh;ee souke, and be fulfild of
the tetes of his coumforting, that &yogh;ee
mylke, and with delices flowen, of alle
maner glorie of hym.
12 For these thingus
seith the Lord, Lo! I shal bowe doun
vp on it, as the flod of pes, and as strem
flowende the glorie of Jentilis, that &yogh;ee
shul souke; to the tetes &yogh;ee shul be born,
and vp on the knes men shul daunte
&yogh;ou.
13 What maner if to whom a moder
daunte, so I shal coumforte &yogh;ou, and
in Jerusalem &yogh;ee shul be coumfortid.
14 &YOGH;ee
shul seen, and io&yogh;en shal &yogh;oure herte, and
&yogh;oure boenes as an erbe shul buriowne.
And knowe shal ben the hond of the
Lord in his seruauns, and endeyne he
shal to his enemys.
15 For lo! the Lord
in fyr shal come, and as a whirlewynd
his foure horsid carres, to &yogh;elde in to
indignacioun his wodnesse, and his blamyng
in a flawme of fyr.
16 For in a fyr
the Lord shal be dyuersly demed, and
in his swerd to alle flesh; and multeplied
shul be the slayne of the Lord,
that weren halewid,
17 and cleene weeneden
themself, in gardynes bihynde the firste
tree, `or the &yogh;ate, with ynne forth; that
eeten souwe flesh, and abominacioun,
-- --
and a mous, togidere shuln ben wastid,
seith the Lord.
18 I forsothe the werkys
of hem and the tho&yogh;tus of hem, come that
I gedere, with alle folkis and tungus; and
thei shul comen, and seen my glorie.
19 And I shal putte in them a tocne, and
senden of hem that shul be saf to the
Jentiles, in to the se, in to Affrich, and
in to Liddiam, men holdende an arwe, in
to Italie, and Grece, to iles aferr, to
hem that herden not of me, and se&yogh;en
not my glorie. And thei shul tellen out
my glorie to Jentilis,
20 and bringen alle
&yogh;oure brethern fro alle Jentilis a free
&yogh;ifte to the Lord, in hors, and in foure
horsid carres, and in literes, and in mulys,
and in cartus, to myn hoeli mounteyn,
Jerusalem, seith the Lord; as if the sonus
of Irael bringen in a &yogh;ifte in a clene
vessel in to the hous of the Lord.
21 And
I shal taken of them in to prestus and
Leuytus, seith the Lord.
22 For as newe
heuenus and newe erthe, whiche I make
to stonde bifor me, seith the Lord, so
stonde shal &yogh;oure sed, and &yogh;oure name.
23 And ther shal be monyth of monyth, and
sabot of saboth; comen shal eche flesh
to honoure byfor my face, seith the Lord.
24 And `gon out shuln, and seen the careynes
of men, that trespasiden a&yogh;en me;
the werm of them shal not die, and the
fir of hem shal not be quenchid; and
thei shul be in to filling of si&yogh;t to alle
flesh.
Here endith the boke of Ysaie, and
now begynneth the prolog of Jeremye.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
