Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. LVIII.
1 Crye, ne cese thou; as a trumpe enhaunce
thi vois, and tel out to my puple
the hidous giltes of hem, and to the hous
of Jacob ther synnes.
2 Me forsothe fro
dai in to dai thei sechen, and witen my
weies thei wiln; as a folc of kynde, that
ri&yogh;twisnesse hadde do, and that the dom
of his God `forsoken not; thei pre&yogh;en
me domes of ri&yogh;twisnesse, and ne&yogh;hen to
God thei wiln.
3 Whi han wee fastid, and
thou hast not biholden; wee han mekid
oure soules, and thou hast not knowen?
Lo! in the dai of &yogh;oure fasting is founde
&yogh;oure owne wil, and alle &yogh;oure detoures
&yogh;ee pleten.
4 Lo! to ples and to striues &yogh;ee
fasten, and smyten with the fist vnpitously.
Wileth not fasten, as vnto this
dai, that herd be in hei&yogh;te &yogh;oure cry.
5 Whether such is the fasting that I chese,
bi the dai a man to tormenten his
soule? whether to binde togidere as a
cercle his hed, and sac and asken to
ara&yogh;en? Whether this I clepede fasting,
and an acceptable dai to the Lord?
6 Whether
not this is more fasting that I ches?
Vnbind thou the togidere bindingus of
vnpitousnesse, loose the bundeles doun
berende; lete hem that ben to-broke,
free, and eche charge to-brec.
7 Brec to
the hungri thi bred, and the helpeles and
vagaunt bring in to thin hous; whan
thou shalt see the nakid, couere hym,
and thi flesh thou shalt not dispise.
8 Thanne shal breken out as morutid thi
li&yogh;t, and thin helthe sunnere shal springe;
and bifor thi face shal go thi ri&yogh;twisnesse,
and the glorie of the Lord shal
gedere thee.
9 Thanne thou shalt inwardly
clepen, and the Lord shal heren; thou
shalt crien, and he shal sey, Lo! I am
ny&yogh;, for merciful I am, the Lord thi God.
If thou take awei fro thi myddel the
-- --
cheyne, and cese the fynger to strecchen
out, and to speken that profiteth not;
10 whan thou shalt heelden out to the
hungri thi soule, and the tormentid lijf
thou shalt fulfillen, springe shal in dercnesses
thi li&yogh;t, and thi dercnesses shul
ben as myddai.
11 And reste &yogh;yue to thee
shal the Lord thi God euermor, and fulfillen
he shal in shynynges thi soule, and
thi bones delyueren; and thou shalt ben
as a watri gardyn, and as a welle of
watris, whos watris `schul not failen.
12 And bild vp shul ben in thee the desertes
of worldus, the foundemens of ieneraciouns
and of ieneraciouns thou shalt
reren; thou shalt ben clepid a bildere vp
of hegges, turnende awei the pathis of
wickidnesses.
13 If thou schalt turne awei
fro the sabot thi foot, to do thin owne
wil in myn hoely dai, and clepist a delicat
sabot, and the hoely of the Lord, glorious,
and glorifiest hym, whil thou dost not
thi weies, and is not founde thin owne
wil, that thou speke a wrd;
14 thanne thou
shalt delyten vp on the Lord, and I shal
rere thee vp vp on the hei&yogh;tus of erthe,
and shal fede thee with the eritage of
Jacob, thi fader; the mouth forsothe of
the Lord spac.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
