Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XL.
1 Gret ocupacioun is shape to alle men,
and a greuous &yogh;oc vp on the sonus of
Adam, fro the day of the goyng out fro
the wombe of the moder of hem, vn to
the day of the biriyng in to the moder
of alle thingus.
2 The tho&yogh;tis of hem, and
the dredes of herte, the fyndyngus of
abidyng, and the da&yogh;es of endynge;
3 fro the cheef sittere `vp on the glorious
sete, vn to the meekid vn to the
erthe and asken;
4 fro hym that vseth
blu silc, and berth the croune, vn to
hym that is couered with raw lynen,
wodnesse, enuye, noyse, wagering, and
dred of deth, wrathefulnesse stedefastly
bidende, and striuyng;
5 and in tyme of
repast in the bed, slep of ny&yogh;t chaungeth
his kunnyng.
6 Litil forsothe as no&yogh;t in
reste; and of hym in slepes as in the
day respit.
7 He ys disturbid in the si&yogh;te
of his herte, as he that is scapid in the
dai of bataile. In the tyme of his helthe
he ros out, and wndrende at no drede,
with alle flesh,
8 fro man vn to beste, and
vp on the synneres seuenfold.
9 To these
thingus, deth, blod, strif, and two bitende
swerd, opressiouns, hungres, and totreding,
and scourges;
10 vp on wickid men
ben formed alle these thingus, and for
hem was mad the ieneral flod.
11 Alle
thingus forsothe that of the erthe ben, in
to erthe shul ben turned; and alle watris
in to the se shuln be turned.
12 Alle
&yogh;ifte and wickidnesse shal ben don awey;
and feith in to world shal stonde.
13 The
substaunces of vnri&yogh;twis men as a flod
-- --
shul ben dried; and as gret thunder in
reyn thei shul sowne ful.
14 As the ri&yogh;twis
man in openyng his hondis shal gladen;
so the lawe brekeres in the ende shuln
wanen awey.
15 The sonus sonus of vnpitous
men shul nott multeplie braunches;
and vnclene rootes vp on the cop of the
ston sounen.
16 Vp on eche water grenenesse;
and at the hour of the flod biforn
al the hey it shal be pullid vp.
17 Grace
as paradis in blissingus; and mercy in to
the world abit stille.
18 The lif of the suffisaunt
werkere to hymself shal be mad
swete; and in it thou shalt fynde tresor.
19 The bilding vp of the cite shal confermen
the name; and ouer this an vndefoulid
womman shal be countid.
20 Wyn and
melodye gladen the herte; and ouer
either the loouyng of wisdam.
21 Trumpes
and sautre maken swete melody; and
ouer eithir the swete tunge.
22 Grace and
fairnesse the e&yogh;e shal desyren; and ouer
these grene tilthis.
23 A frend and a mete
felawe in tyme comende togidere; and
ouer either a womman with a man.
24 Brethern in to help in tyme of tribulacioun;
and ouer them mercy shal delyueren.
25 Gold and siluer, and setting of
feet; and ouer either counseil wel
plesid.
26 Facultes and vertues enhauncen
the herte; and ouer these the drede of
the Lord.
27 Ther is not in the drede of
the Lord lassing; and ther is not in it
to seche helpe.
28 The drede of the Lord
as paradis of blessing; and ouer alle
glorie thei couereden it.
29 Sone, in the
tyme of thi lif ne nede thou; betere is
to dyen, than to neden.
30 A man biholdende
in to an other mannes bord, the lif
of hym is nott in the thenking of liflode;
forsothe he nursheth his lif with other
mennus metes.
31 A man forsothe disciplyned
-- --
and ta&yogh;t, shal kepe hymself.
32 In
the mouth of the vnprudent shal be
maad myseise; and in the wombe of
hym fyr shal brenne.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
