Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XX.
1 Hou good is to vndernymyn, than to
wrathen, and to not forbeden the knoulechere
in orisoun.
2 The lust of the gelding
deflourede the &yogh;unge womman, `or birefte
hir meydenhed,
3 so he that doth bi fors
-- --
wicke dom.
4 Hou good is, the chastisid to
schewe penaunce; so forsothe thou shalt
fleen awei wilful synne.
5 Ther is a stille
man, that is found wis; and ther is an
hateful, that is gredy to speken.
6 Ther is
forsothe a stille man, not hauende wit of
speche; and ther is a stille man, witende
tyme of couenable tyme.
7 A wys man
shal be stille vnto tyme; the reccheles
forsothe and the vnprudent shul not
kepe time.
8 Who vseth manye wrdis,
hurteth his soule; and who taketh to
hym power wrongfulli, shal ben hatid.
9 Ther is goyng forth in euelis to a man
vndisciplyned; and ther is finding in to
harm.
10 Ther is &yogh;ouen thing, that is not
profitable; and ther is &yogh;oue thing, whos
&yogh;elding is double.
11 Ther is lassing for
glorie; and ther is, that fro mecnesse
shal rere the hed.
12 There is, that manye
thingis a&yogh;een bie for litil pris, and restorende
them in to seuen fold.
13 A wys
man in wrdis maketh hym self loouable;
the graces forsothe of foolis shul ben
held out.
14 The &yogh;ifte of the vnwise shall
not be profitable to thee; the e&yogh;en forsothe
of hym ben seuennfold.
15 Fewe
thingus he shal &yogh;yue, and many thingus
he shal vpbreiden; and the openyng of
the mouth of hym is enflaumyng.
16 To
day leeneth a man, and to moru he asketh
it bi ple; and hateful is such a
maner man.
17 To a fool shal not ben a
frend, and ther shal not be grace to the
goodis of hym.
18 Who forsothe eten the
bred of hym, ben of fals tunge; hou ofte
sithes and hou fele shul thei scorne hym?
19 Ne forsothe that were to ben had, with
euene ri&yogh;t wit he delede; lic maner and
that, that were not to ben had.
20 The
slidyng of the false tunge `as he that is
falling in the pament; so the fallingus
-- --
of euele men hastili shal come.
21 An vnkinde
man as a veyn fable; and it shal
be ofte in the mouth of the vndisciplyned.
22 Of the mouth of the fool shal ben repreued
a parable; forsothe he seith it
not in his tyme. Ther is, that is forbedun
for myseisete to synnen; and in
his reste shal be prickid.
23 And ther is,
that shal leese hys soule for confusioun;
and of vnprudence of persone he shal
leesen it.
24 Forsothe bi excepcioun of persone
he shal leese hymself.
25 Ther is,
that for confusioun bihotith to a frend;
and hath woonnen hym an enemy wilfully.
26 Wicke repref in a man a lesyng;
and in the mouth of the vndisciplyned
it shal be besily.
27 Betere is a thef than
the besynesse of a man liere; forsothe
bothe shuln eritagen perdicioun.
28 Maneres
of men lieres withoute wrshipe;
and the confusioun of hem with them
withoute cesing.
29 A wys man in wrdis
shal bringe forth hymself; and a prudent
man shal plesen to grete men.
30 Who
wercheth his lond, shal myche he&yogh;en the
hep of frutes; and who wercheth ri&yogh;twisnesse,
he shal myche ben enhauncid.
Who forsothe pleseth to grete men, shal
fleen awei, `or ascape, wickidnesse.
31 Presentes
and &yogh;iftes ful out blenden the e&yogh;en
of domysmen; and as a doumb in the
mouth he turneth awei the chastisingus
of hem.
32 Hid wisdam, and tresor vnseen,
what profit in eithir?
33 Betere is, that
hilith his vnwisdam, than a man that
hidith his wisdam.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
