Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVIII.
1 He that lyueth in to withoute ende,
made of no&yogh;t alle thingus togidere; God
alone shall be iustefied, and dwelleth
vnuenkushid king withoute ende.
2 Who
shal suffise to telle out the werkis of
hym?
3 who shal enserche the grete
wrthi thingis of hym?
4 The vertue forsothe
of his gretnesse who shal telle out?
or who shal leyn to to tellen out the
merci of hym?
5 There is not to lassen,
ne to echen; ne ther is to fynde the
grete wrthi thingus of God.
6 Whan a
man hath ful endid, thanne he bigynneth;
and whan he hath restid, he shal
werchen.
7 What is a man, and what is
the glorie of hym? and what is good,
or what the wicke thing of hym?
8 The
noumbre of the da&yogh;es of men, as myche
an hundrid &yogh;er, as dropis to the watir
of the se thei ben ordeyned; and as a
litil ston of grauel, so fewe &yogh;eres in the
dai of the spirituel world.
9 For that
pacient is God in them, `and he schal
heelde out vpon hem his mercy.
10 He sa&yogh;
the presumpcioun, `or pride, of the herte
of hem, for it ys euel; and he kne&yogh; the turnyng
vp so doun of hem, for it is shreude.
11 Therfore he fulfilde hys mercy in hem,
and shewede to them the weie of equyte.
12 The mercy doyng of man aboute his
ne&yogh;hebore; the merci forsothe of the
Lord vp on alle flesh.
13 He that hath
mercy, and lerneth, and techeth as a
shepperde his floc,
14 haue he mercy, takende
out doctrine of mercy doyng; and
that hie&yogh;en in the domes of hym.
15 Sone,
in goode thingus &yogh;yue thou not pleynt, and
in alle &yogh;ifte &yogh;yue thou not sorewi slouthe,
`or heuynesse, of an euel wrd.
16 Whether
not brennende hete the dew shal a&yogh;een
keelen? so and a wrd betere than a
-- --
&yogh;ifte.
17 Lo! whether not a wrd ouer a
good &yogh;ifte? but either with a iustefied
man.
18 The fool sharpli shal &yogh;yue repref;
and the &yogh;ifte of the vndisciplyned maketh
e&yogh;en to waxe failende.
19 Bifor dom
greithe ri&yogh;twisnesses to thee; and er that
thou speke, lerne.
20 Bifor sicnesse tac
medicyne; and bifor dom aske thou thiself,
and in the si&yogh;te of God thou shalt
finde mercy.
21 Bifor siknesse meeke thee,
and in tyme of infirmyte shew thou thi
conuersacioun, `or lyuyng.
22 Be thou not
lettid to pre&yogh;en euermor, and drede thou
not vnto the dead to be iustefied; for the
meede of God dwellith in to withoute
ende.
23 Biforn orisoun greithe thou thi
soule; and wile thou not be as a man that
tempteth God.
24 Haue mynde of wrathe
in the day of endyng; and tyme of &yogh;elding
in conuersacioun thou shalt make.
25 Haue mynde of pouert in tyme of
plente; and the nede of pouert in the
dai of richesses.
26 Fro erli vnto euen the
tyme shal ben chaungid; and alle these
thingus hastid in the e&yogh;en of God.
27 A
wys man in alle thingis dredeth; and
in the da&yogh;es of giltes shal taken heed fro
slouthe.
28 Eche witti knowith wisdam;
and to hym that fyndeth it, it shal &yogh;yue
knoulechyng.
29 The wel felende in wrdus
and thei wisly diden, and vnderstoden
treuthe, and ri&yogh;twisnesse; and biso&yogh;ten
prouerbes and domes.
30 After thi lustis
go thou not; and fro thi wil turne thee
awei.
31 If thou &yogh;yue to thi soule his lustis,
it shal make thee in to io&yogh;e to thin enemys.
32 Ne delite thou in cumpanyes, ne
in smale thyngus; sotheli the trespasing
of hem is contynuel.
33 Ne be thou mene
in strif for monee, and ther is not to
thee no thing in the world; forsothe
thou shalt be enuyous to thy soule.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
