Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. III.
1 The soules of ri&yogh;twis men ben in the
hond of God; and torment of deth shal
not touche them.
2 Thei ben seen to the
e&yogh;en of vnwise men to dien; tormenting
is eymed the issue of hem.
3 And fro a
ri&yogh;twis weie thei wenten in to destruccioun,
and that of vs ys weie of destruccioun;
thei forsothe ben in pes.
4 And
if befor men thei suffreden tormentis, the
hope of hem is ful of vndeadlynesse.
5 In
fewe thingus trauailid, in manye thingus
thei shul be weel disposid; for God
temptede them, and fond hem wrthi
hymself.
6 As gold in furneis he prouede
them, and as brent sacrifise of ost he
loouwede them; and in time shal ben
the biholding of hem.
7 Thei shul shyne
ri&yogh;twis, and as sparcles in reeddy places
thei shuln renne hider and thider.
8 Thei
shul deme naciouns, and lordshipen to
puples; and the Lord of hem shal regne
in to withoute ende.
9 Who trosten in
hym, shuln vnderstonde treuthe; and
feithful in looue thei shul assente to
hym; for free &yogh;ifte and pes is to the
chosen men of hym.
10 Vnpitous men forsothe,
aftir that thei tho&yogh;ten, vndernymynges
-- --
shuln han; that dispiseden the
ri&yogh;twis, and fro the Lord wenten awei.
11 Wisdam forsothe and discipline who
casteth awei, is vnseli; and voide is the
hope of hem, and trauailes withoute frut,
and vnprofitable the werkis of them, and
vnable to dwelle in.
12 The wymmen of
them ben vnwise, and most wicke the
sonus of hem.
13 Cursid the creature of
them; for seli is the bareyn, and the
vndefoulid, that kne&yogh; not the bed in trespas,
shal han frut in beholding of holi
soulis.
14 And the gelding, that wro&yogh;te not
bi his hondis wickidnesse, ne tho&yogh;te a&yogh;en
the Lord most wicke thingus; forsothe
ther shal ben &yogh;iue to hym the chosen
fre &yogh;ifte of the beleeue, and lot in the
temple of God most aloowid.
15 Forsothe
of goode trauailes glorious is the frut,
and the whiche the roote of wisdam al
to-stereth not.
16 The sones forsothe of
auoutreres in ending shul ben, and fro
the wicke bed the seed shal ben outlawid.
17 And if forsothe of long lif thei
shul be, in no&yogh;t thei shul be countid; and
withoute wrshipe shal be the laste eelde
of hem.
18 And if swiftliere thei shul ben
dead, thei shul not han hope, ne in the
dai of knouleching speche.
19 Forsothe
wicke naciouns ben of hard ending.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
