Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. II.
1 Forsothe vnpitouse men seiden, thenkende
anent hemselue not ri&yogh;t, Litil and
with no&yogh;e is the time of oure lif; ther
is not refreshing in the ende of a man,
and ther is not, that be knowen turned
a&yogh;een fro helle.
2 For of no&yogh;t wee ben
born, and aftir these thingus wee shul
be, as tho&yogh; wee hadden not ben; for
smoke and blast is in oure nose therles,
and sermoun of a sparcle to stirn togidere
oure herte.
3 For quenchyd ashen
shal ben oure bodi, and the spirit shal
be held abrod as `softe eir; and oure lif
shal passe as the step of a cloude, and
as a litil cloude ben vnknyt, that is
dryuen of the bemes of the sunne, and
of the hete of it agreggid.
4 And oure
name for&yogh;eting shal take by tyme; and
no man shal han mynde of oure werkis.
5 Forsothe the passing of the shadewe is
oure tyme, and ther is not turning
a&yogh;een of oure ende; for it is al closid,
and no man turneth a&yogh;een.
6 Cometh
-- --
thanne, and vse wee the goodis that
ben, and vse wee creature, as in oure
&yogh;outhe, swiftli.
7 With precyous win and
oynemens fille wee vs; and passe not vs
the flour of tyme.
8 Crowne wee vs with
roses, er thei welewen; no medwe be,
that oure leccherie passe not thur&yogh;.
9 Noon of vs be withoute lot of oure leccherie;
ouer al lefe wee signes of gladnesse;
for this is oure part, and this is
lot.
10 Oppresse wee the ri&yogh;twis pore man,
and spare wee not to the widewe, ne
wrshipe wee hoere heres of the olde
man of myche time.
11 Be forsothe oure
strengthe the lawe of vnri&yogh;twisnesse;
forsothe that that is feble, vnprofitable
is founde.
12 Bigile wee thanne the ri&yogh;twis
man, for vnprofitable he is to vs, and
contrarie to oure werkis; and repreuendeli
puttith to vs the synnes of lawe, and
defameth a&yogh;en vs the synnes of oure
disciplyne.
13 He behoteth hym the kunnyng
of God to han, and the sone of
God he nempneth hymself.
14 He is mad
to vs in to ouerleding of oure tho&yogh;tis.
15 Heuy he is to vs also to seen; for vnlic
to othere is the lif of hym, and myche
chaungid ben the weies of hym.
16 As
trifleres wee ben eymed of hym, and he
absteneth hymself fro oure weies, as fro
vnclennesses; and he tellith biforn the
laste thingus of ri&yogh;twis men, and he glorieth
hymself to han God to fader.
17 See
wee thanne, if the wrdis of hym ben
trewe; and asa&yogh;e wee, what ben to comen
to hym; and wee shul wite, what shul
ben the laste thingis of hym.
18 If forsothe
he is verre sone of God, he shal
vndertaken hym, and delyuere hym fro
the hondis of the contrariose.
19 With
wrong vndernymyng and torment aske
wee hym, that wee wite the reuerence of
-- --
hym, and proue the pacience of hym.
20 Bi most foul deth condempne wee hym;
forsothe respit shal be of the wrdis of
hym.
21 These thingus thei tho&yogh;ten, and
erreden; and the malice of hem blendede
them.
22 And thei knewen not the sacramens
of God, ne hopeden the meede of
ri&yogh;twisnesse, ne demeden the wrshepe of
holi soules.
23 For God made man vndeadli,
and to the ymage of his licnesse
made hym.
24 Forsothe thur&yogh; the enuye
of the deuel deth cam in in to the roundnesse
of erthis;
25 forsothe thei folewen
hym, that ben of the part of hym.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|