Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XX.
1 A leccherous thing win, and noiseful
drunkenesse; who so euere in these
thingis delitith, shal not be wis.
2 As the
roring of a leoun, so and the ferd of the
king; who terreth hym, synneth a&yogh;en
his soule.
3 Wrshipe is to the man that
seuereth hym fro striues; alle forsothe
foolis shul be mengd with wrong blamyngis.
4 For cold the slowe wolde not
eren; thanne he shal begge in somer,
and it shal not ben &yogh;iue to hym.
5 As
dep watir, so counseil in the herte of a
-- --
man; but a wis man shal drawe it out.
6 Manye men merciful ben clepid; a feithful
man forsothe who shal finde?
7 The
ri&yogh;twis forsothe that goth in his simplenesse,
blisful sones aftir hym shal leuen.
8 The king that sit in the see of dom,
scatereth alle euelis in his clere loking.
9 Who mai sey, Clene is myn herte; pure
withoute synne?
10 Peis and peis, mesure
and mesure, either is abhominable anent
God.
11 Of his studies is the child vnderstonde,
if ri&yogh;t ben and clene the workis
of hym.
12 The herende ere, and the seende
e&yogh;e, the Lord made euer either.
13 Wile
thou not looue slep, lest thee nedynesse
opresse; opene thin e&yogh;en, and be thou
fulfild with loues.
14 Euel it is, euel it is,
seith eche biere; and whan he goth awei,
thanne he shal glorien.
15 Gold, and the
multitude of iemmes, and precious vessel,
the lippis of kunnyng.
16 Tac the cloth
of hym, that bor&yogh; was of the alien; and
for straungeres tac awei the wed fro hym.
17 Swete is to a man the bred of lesing;
and aftir shal be fulfild the mouth of
hym with a litil pibbil ston.
18 Tho&yogh;tis bi
counseilis ben strengthid; and bi gouernailis
batailis ben to be tretid.
19 To
hym that openeth priuetes, and goth
gilendeli, and spredeth abrod his lippis,
ne be thou togidere mengd.
20 Who cursith
to his fader and moder, shal be quenchid
his li&yogh;t in myddyl dercnesses.
21 Eritage to
the whiche is hee&yogh;id in the begynnyng,
in the laste shal lacke blissing.
22 Ne sey
thou, I shal &yogh;elde euel for euel; abid the
Lord, and he shal deliuere thee.
23 Abominacioun
is anent God wei&yogh;te and wei&yogh;te;
a treeccherous balaunce is not good.
24 Of
the Lord ben ri&yogh;t reulid the goingis of a
man; who forsothe of men mai vnderstonde
his wei?
25 Falling is of men ofte
to `vouwe to seintis, and aftir the vouwis
a&yogh;een drawe.
26 Scatereth vnpitous men a
wis king; and he bowith in vpon hem
-- --
a stonene bowe.
27 The lanterne of the
Lord the brething place of a man, that
enserchith alle the priuetes of the wombe.
28 Mercy and treuthe kepen the king; and
his trone is strengthid with noble mercy.
29 The ful out io&yogh;ing of &yogh;unge men the
strengthe of hem; and the dignete of
olde men hornesse.
30 The wannesse of
wounde shal clense awei euelis, and
woundis in the priuyere partys of the
wombe.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|