Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XV.
1 A nesshe answere breketh wrathe;
an hard woord rereth woodnesse.
2 The
tunge of wise men enhourneth kunnyng;
the mouth of foolis boilith out folie.
3 In
alle place the e&yogh;en of the Lord beholden
goode men, and euele.
4 A plesable tunge
the tree of lif; whiche forsothe is vntemprid,
shal defoule the spirit.
5 The
fol scorneth the discipline of his fader;
who forsothe kepith blamyngis, shal be
more witti. In plenteeuous ri&yogh;twisnesse is
most vertue; tho&yogh;tys forsothe of vnpitous
men shul be pullid out bi the roote.
6 The
hous of the ri&yogh;twise myche strengthe;
and in the frutis of vnpitouse al disturbaunce.
7 The lippis of wise men shul
-- --
sowen abrod kunnyng; the herte of foolis
vnlic shal ben.
8 The sacrifise of victorie
of vnpitous men wlatesum to the Lord;
the vouwis of ri&yogh;twys men plesable.
9 Abominacioun is to the Lord the lif of
the vnpitous; who folewith ri&yogh;twisnesse,
shal be looued of hym.
10 Euel doctrine
to the forsakende the weie of lif; who
blamyngis hateth, shal dien.
11 Helle and
perdicioun befor the Lord; myche more
the hertis of the sonus of men.
12 The
bacbitere looueth not hym that chastiseth
hym; ne to wise men goth.
13 The
io&yogh;ende herte maketh out gladsum the
face; in mornyng of inwit shal be
throwe doun the spirit.
14 The herte of
the wise man shal seche doctrine; and
the mouth of foolis is fed with vnwisdam.
15 Alle the da&yogh;is of the pore euele;
a sikir mynde as a contynuel feste.
16 Betere is a litil with the drede of the
Lord, than grete tresoris and vnfillable.
17 Betere is to be clepid to wrtis with
charite, than to a fat calf with hate.
18 A
man ful of wrathe stirith striues; who
is pacient, swageth the vprered.
19 The
weie of slowe men as heggis of thornes;
the weie of ri&yogh;twis men withoute thing
of hurting.
20 A wis sone maketh glad
the fader; and a fool man despiseth his
moder.
21 Folie is io&yogh;e to the fool; and a
prudent man shal ri&yogh;t reulen his goingus.
22 Tho&yogh;tis ben to-scatered, wher is not
counseil; wher forsothe ben manye
counseileris, thei ben confermed.
23 A man
gladeth in the sentence of his mouth;
and the spedful sermoun is best.
24 The
path of lif vp on the ta&yogh;t man; that he
bowe doun fro the last helle.
25 The hous
of proude men the Lord shal destro&yogh;e;
and stedefast he shal make the termes of
the widewe.
26 Abominacioun of the Lord
euele tho&yogh;tis; a pure sermoun most fair
shal be fastned of hym.
27 He al disturbith
his hous, that folewith auarice; who
-- --
forsothe hatith &yogh;iftis, shal liue. Bi merci
and feith ben purgyd synnes; bi the
drede forsothe of the Lord bowith doun
eche man fro euel.
28 The mynde of the
ri&yogh;twis sweteli thenketh wisdam; the
mouth of vnpitous men reboundeth to
euelis.
29 Ferr is the Lord fro vnpitous
men; and the orisouns of ri&yogh;twis men
he shal ful out heren.
30 The li&yogh;t of e&yogh;en
maketh glad the soule; good los inwardli
fattith bones.
31 The ere that hereth
blamyngus of lif, in the myddel of
wise men shal al abide.
32 Who casteth
awei discipline, despiseth his soule; who
forsothe assenteth to vndirnymyngis,
weldere is of herte.
33 The drede of the
Lord discipline of wisdam; and mecnesse
goth befor glorie.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|