Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
[Prologue on the book of Proverbs.]
In these Prouerbis of Salomon is contened myche prudence and vndurstonding,
&yogh;ouen to Salomon bi the Spirit of God, and acordinge in many places with the
gospel of Crist. And as Crist techith in his gospel goostli wisdom oonli, so Salomon
techith worldli warnesse, how a man owith to gouerne him prudentli in the world,
and to be war of perels and mescheues, and to fle nedynesse, and to schewe bi his
gouernaunce, that the prudence of God is with him, which is arettid as li&yogh;t, and folie
is arettid as derknesse.
Heere bygyneth the prologe in the booc off Prouerbys.
`To Cromacie and Eliodere, bishopis, Jerome sendeth greeting. Joyne the epistil
whom ioyneth presthod; &yogh;he, the chartre twynne not, whom the looue of Crist
knytteth. Exposiciouns in Osee, Amos, Zacharie, and Malachie, the whiche &yogh;ee
asken, I shulde han write, if it hadde ben leeful for siknesse. &YOGH;ee senden solacys
of costis, &yogh;oure notories, and bokis writeres sustenende, that to &yogh;ou most oure wit
trauaile. And lo! aside the hauntende puple of men diuerse thingis askende, as or
euene it be me to trauailen, &yogh;ou hungrende, also to othere, or, in resoun of &yogh;yuen
thing and taken, to any, saue &yogh;ou, I be bounde. And so thur&yogh; long siknesse brosid,
lest fulli this &yogh;eer I shulde be stille, and anent &yogh;ou I were doumb, the werc of thre
da&yogh;is to &yogh;oure name I sacride; the remenyng, that is, of the thre volumes of Salomon,
Masloch, that Ebrues Parablis, the comun making Prouerbis clepeth; Coelech, that
Grecli Eclesiasten, Latinli a Spekere wee moun seyn; Cirasirym, that in to oure
tunge is turned Song of Songis. It is told and Panarethos, the boc of Jhesu, sone of
Cirach; and an other falsly writen, that is inwriten the Wisdam of Salamon. Of
whiche the rathere I fond Ebru, not Ecclesiasticum, as anent the Latynes, but
Parablis beforn notid; to whom weren ioyned Eclesiastes and the Song of Songis;
that he shulde euene to the licnesse of Salamon, not onli in noumbre of bokis, but
also in maner of mateeris. The secounde anent the Ebrues is neuer no wher, for and
that maner of speche sauoureth the Grekis faire speche; and summe of olde writeres
afermen this boc to ben of Jew Filon. As thanne Judith, and Tobie, and the bokis of
-- --
Macabeis, redeth hem forsothe the chirche, but among the reuleer scripturis
resceyueth not; so and these two volumes rede he to the edificacioun of the puple,
not to the autorite of chirche teching to ben confermed. If to any man forsothe
more plese the translacioun of the seuenty remenoures, he hath it sum time amended
of vs. Ne forsothe so newe thingis wee maken, that olde thingis wee destro&yogh;e. And
`neuer the latere, whan most diligentli redeth he, wite he oure writen thingis to
ben vnderstonde, that ben not coruptid held into the thridde vessel, but, anoon from
the presse most pureli the vessel &yogh;euen, han kept their sauour.
Here endith the prolog, and here bigynnen the Parablis of Salomon.
Here bigynneth the Parablis of Salomon.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
