Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
PSALM LXX.
1 The salm of Dauid is of the sonys of
Jonadab, and of the rathere caitiues.
noteIn thee, Lord, I hopide; I shal not be
confoundid in to with oute ende;
2 in thi
ri&yogh;twisnesse deliuere me, and tac me awei.
Bowe thou in to me thin ere; and saue
me.
3 Be thou to me in to God defendere,
and in to a strengthid place; that thou
make me saaf. For my fastnesse; and my
refute thou art.
4 My God, tac me awey fro
the hond of the synnere; and fro the hond
of the doere a&yogh;en the lawe, and of the wicke.
5 For thou art my pacience, Lord; Lord,
myn hope fro my &yogh;outhe. In thee I am
confermed fro the wombe;
6 fro the wombe
of my moder thou art my defendere.
7 In
thee my synging euermor; as wndring I
am maad to manye; and thou a strong
helpere.
8 Be fulfild my mouth with preising,
that I synge thi glorie; al dai thi
gretnesse.
9 Ne throwe thou me aferr in
-- --
time of elde; whan shal faile my vertue,
ne forsake thou me.
10 For myn enemys
seiden to me; and thei that kepten my
soule counseil maden in to oon.
11 Seiende,
God hath forsaken hym, pursueth, and
taketh hym; for ther is not that take
awey.
12 God, ne be thou longid awei fro
me; my God, in to myn helpe behold.
13 Be thei confoundid, and faile thei, bacbitende
to my soule; be thei couered
with confusioun and shame, that sechen
euelis to me.
14 I forsothe euermor shal
hopen; and casten to vp on alle thi
preising.
15 My mouth shal befor telle thi
ri&yogh;twisnesse; al dai thin helthe &yogh;iuere.
For I knew not lettrure, I shal gon in
to the poweris of the Lord;
16 Lord, I shal
han mynde of thi ri&yogh;twisnesse alone.
17 God,
thou hast ta&yogh;t me fro my &yogh;outhe, and vn
to now; I shal telle forth thi merueilis.
18 And vn to the laste age, and the laste
ende of it; God, ne forsake thou me. To
the time that I telle out thin arm; to alle
ieneracioun that is to come. Thi power,
and thi ri&yogh;twisnesse,
19 God, vn to the he&yogh;este
grete thingus that thou didist;
God, who is lic to thee?
20 Hou grete thou
hast shewid to me tribulaciouns, manye
and euele, and al turned thou hast quykened
me; and fro the depnessis of the
erthe eft thou hast a&yogh;een bro&yogh;te me.
21 Thou
hast multiplied thi grete doing; and al
turned thou hast coumfortid me.
22 For
and I shal knouleche to thee in vesselis
of salm thi treuthe, God; I shal do salm
to thee in an harpe, thou holi of Irael.
23 Ful out shul io&yogh;e my lippis, whan I shal
synge to thee; and my soule, that thou
a&yogh;een bo&yogh;tist.
24 But and my tunge al dai
shal sweteli thenke thi ri&yogh;twisnesse; whan
confoundid and shamefastly aferd shul
ben that sechen euelis to me.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
