Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIII.
1 The moste king Artaxerses, fro Ynde
vnto Ethiope, of an hundrid and seuene
and twenti prouyncis, to princis and
dukis, that to his empire ben soget,
greting seith.
2 Whan to manye folkis
I shulde comaunden, and al the world
hadde sogetid to my comaunding, I wolde
not the mykilnesse of my power mysvsen,
but with mercy and softenesse gouerne
the sogetis, that, with oute any
drede ouerpassende the lif in silence, thei
shulden vse the pes desirid to alle deadli
men.
3 Me forsothe sechende of my counseileris,
hou that my&yogh;te be fulfild, oon,
that in wisdam and feith othere men
passide, and was after the king the seconde,
Aaman bi name,
4 tolde to me in
al the world of londis to ben a puple
scaterid, that newe shulde vsen lawis,
and, a&yogh;en the custum of alle Jentilis
-- --
doende, the hestis of the kingis dispise,
and the `oon acord of diuerse naciouns
with ther descencioun defoule.
5 The
whiche thing whan we hadden lerned,
seande o folc rebel a&yogh;en alle kinde of men
to vse shreude lawis, and to oure hestis
to gon a&yogh;en, and to disturbe the pes and
the acord of the prouyncis soget to vs,
wee comaundeden,
6 that who so euere
Aman, that is prouost to alle prouyncis,
and secounde fro the king, and whom
in stede of a fader wee wrshipen, shal
shewyn, with wiues and fre childer be
thei don awei of ther enemys, and no
man haue mercy of them, the fourtenthe
dai of the twelfthe moneth Adar,
of the &yogh;er present;
7 that wicke men, o dai
to helle goende doun, &yogh;elde to oure empire
the pes, that thei han disturbid.
Hider to the saumple of the epistil;
thoo thingus, that folewen, after that
place writen I fond, wher is rad,
And goende Mardoche dide alle thingus,
that Ester hadde comaundid to hym;
and ner the latere thei ben not had
in Ebru, and anent no man of the remenoures
thei ben vtterli told.
8 Mardoche
forsothe pre&yogh;ede the Lord, myndeful
of alle his werkis,
9 and seide, Lord,
Lord, king almy&yogh;ti, in thi power alle
thingis ben set, and ther is not, that
mai withstonde to thy wil; if thou deme
to sauen Irael, anoon wee shul be delyuered.
10 Thou madist heuene and erthe,
and alle thing that is contened in the
cumpas of heuene.
11 Lord of alle thingus
thou art, ne ther is that withstonde to
thi mageste.
12 Alle thingus thou knewe,
and wost, that not for pride and strif
and any coueitise of glorie I do this,
that I honoure not the most proud
Aman;
13 forsothe gladli for the helthe of
-- --
Irael also the steppis of his feet I were
redi to kisse,
14 but I dradde, lest the
wrshipe of my God I shulde bern ouer
to man, and lest any man I shulde honoure
out take my God.
15 And now, Lord
king, God of Abraham, haue mercy of
thi puple, for oure enemys wiln leesen
vs, and thin eritage don awei;
16 ne dispise
thou thi part, that thou hast a&yogh;een bo&yogh;t
fro Egipt.
17 Heere my pre&yogh;eere, and merciful
be thou to the lot, and the litle
corde of thin eritage; and turne oure
weiling in to io&yogh;e, that liuende we preise
thi name, Lord; and ne close thou the
mouthis of men preisende thee.
18 And al
Irael lic mynde and beseching criede to
the Lord, for thi that to hem shulde
hange in certeyn deth.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
