Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIV.
1 Judit forsothe seide to al the puple,
Hereth, brethern; hangeth vp this hed
vp on the wallis.
2 And it shal be, whan
the sunne goth out, eche man take his
armes, and goth out with bure, not that
&yogh;ee go doun benethe, but as bure doende.
3 Thanne it shal nede ben, that the spieres
of the lond flen to ther prince to be rerid
vp to the fi&yogh;t.
4 And whan the dukis of
hem comen to gidere to the tabernaclis
of Olofernes, and finden hym heded, in
his blod wrappid, drede shal fal doun
vpon hem.
5 And whan &yogh;ee knowen them
to fleen, goth after hem siker, for God
shal to-trede them vnder &yogh;oure feet.
6 Thanne Achior seande the vertue that
God of Irael hadde do, laft the custum
of his hethenenesse, leeuede to God; and
circumcidede the flesh of his &yogh;erde, and
is put to the puple of Irael, and al the
successioun of his kinrede vnto the dai
-- --
that is now.
7 Anon forsothe that sprungen
is dai, thei heengen vpon the wallis the
hed of Olofernes; and eche toc his armes,
and thei wenten out with gret noise and
&yogh;elling.
8 Whiche thing seande, the aspies
runnen togidere to the tabernacle of Olofernes.
9 Forsothe thei, that weren comende
in the tabernacle, and befor the incomyng
of the priue chaumbre makende noise, for
ende to reren hym, bi craft casten vnreste,
that not of the rereres, but of the
noise makeris Olofernes shulde waken.
10 No man forsothe was hardi the tabernacle
of the vertue of Assiries knockende
or entrende to openen.
11 But whan his
dukis hadden come, and the leders of
thousendis, and alle the more of the ost
of the king of Assiries, thei seiden to the
priue chaumberleynes,
12 Goth, and rereth
hym; for myis gon out of ther caues
ben hardi to clepen forth vs to bataile.
13 Thanne Vagio, gon in to his priue
chaumbre, stod befor the curtin, and
made fawnyng with his hondis; forsothe
he trowide hym with Judit to
slepen.
14 But whan no mouyng of hym
liende with the wit of eris parceiuede,
he wente to ne&yogh;hende to the curtin, and
rerende it, and seande the carein of Olofernes
withouten hed to lin roten in his
blod vpon the erthe, criede out with a
gret vois with weeping, and cutte his
clothis.
15 And gon in to the tabernacle of
Judit, fond her not, and he out sterte
with oute to the puple,
16 and seide, An
Ebru womman hath do confusioun in
the hous of king Nabugodonosor; lo!
forsothe Olofernes lith in the erthe, and
his hed is not in hym.
17 The whiche
-- --
thing whan hadden herd the princis of
the vertue of Assiries, alle cutten ther
clothis, and vntolerable drede and trembling
fel vp on hem, and ther inwittis
ben disturbid gretly.
18 And ther is maad
an vntolerable cry in to the middel tentis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
