Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. I.
1 And Josias made pasch in Jerusalem
to the Lord, and he offride pasch the
fourtenthe dai of the moone of the firste
monith,
2 ordeinende prestis bi whilis of
da&yogh;is, clothid in stolis, in the temple of
the Lord.
3 And he seide to the Leuitus, the
holi seruauns of Irael, that thei shulden
halewe them self to the Lord, in setting
of the holi arke of the Lord in the hous,
that king Salamon, the sone of Dauid,
bilde;
4 It shal not be to &yogh;ou to taken it
vp on shuldris; and now serueth to oure
Lord, and doth the cure of that folc of
Irael, of parti aftir tounis, and ther
linagis,
5 aftir the writing of Dauid, king
of Irael, and aftir the grete wrshipeful
doing of Salamon, his sone, alle in the
temple, and aftir &yogh;oure litil fader partie
of princehod of hem, that stonden in the
si&yogh;te of the brethern of the sonus of Irael.
6 Offrith pasch, and maketh redi sacrifises
to &yogh;oure brethern; and doth aftir the
heste of the Lord, that is &yogh;iue to Moises.
7 And Josias &yogh;af in to the folc that is
founde, shep, of lombis, and of kidis, and
of she got, thretti thousend; calues thre
thousend.
8 These thingus of the kingus
thingus ben &yogh;iuen aftir beheste to the
puple, and to prestis, in to pasch; shep
in noumbre two thousend, and caluis an
-- --
hundrid.
9 And Jechonias, and Semeias,
and Nathanael, brother, and Azabias,
and Oziel, and Coraba, in to pasch, shep,
fiue thousend; caluis, fiue hundrid.
10 And
whan these thingis weren do nobli, the
prestis and Leuitus stoden, hauende
therue loues bi linagys.
11 And aftir the
parties of the princehod of fadris in the
si&yogh;te of the puple thei offriden to the
Lord, aftir thoo thingus that in the boc
of Moises ben writen.
12 And thei rosteden
pasch with fijr, as it behouede; and ostus
thei soden in sething vesselis and pottis,
with weel willing.
13 And thei bro&yogh;ten to
alle that weren of the folc; and aftir
these thingus thei maden redi to hemself
and to prestis.
14 The prestus forsothe offriden
talewis, vnto the hour was endid;
and Leuitus maden redi to hemself, and
to ther bretheren, and to the sonys of
Aron.
15 And the sacrifieris offriden do&yogh;tris,
after ordre, and after the heste of
Dauid; and Azaf, and Zacharias, and
Jeddinus, that was of the king;
16 and the
ussheris bi alle the &yogh;atis, so that noon
ouerpasside his. Forsothe the brethern
of hem gretheden to hem.
17 And thoo
thingis, that perteneden to the sacrifise
of the Lord, ben ended.
18 In that dai thei
dide pasch, and offriden ostis vp on the
sacrifise of the Lord, after the heste of
king Josie.
19 And the sonus of Irael, that
ben founde, diden in that time pasch,
and the feste dai of therue loues bi seuene
da&yogh;es.
20 And there is not solempnisid such
a pasch in Irael, fro the times of Samuel,
the profete.
21 And alle the kingus of Irael
haleweden not such a pasch, as dide
Josias, and the prestus, and Leuitis, and
Jewis, and al Irael, that ben founden in
the commemoracioun at Jerusalem.
22 The
ei&yogh;etenthe &yogh;er, regnende Josias, is halewid
pasch.
23 And the werkis of Josie ben made
ri&yogh;te in the si&yogh;te of his Lord, in ful herte
dredende;
24 and thoo thingus forsothe that
abouten hym ben writen, in the rathere
times of hem that sinneden, who so euere
weren vnreligious a&yogh;en the Lord, befor
-- --
alle folc, and that so&yogh;ten not the woordis
of the Lord vp on Irael.
25 And aftir al
this deede of Josie, Farao, king of Egipt,
ste&yogh;ede vp, comende to casten awei in
Carcamys vpon Eufraten; and Josias
wente in to meeting to hym.
26 And the
king of Egipt sente to Josiam, seiende,
What is to me and to thee, king of Jude?
27 I am not sent of the Lord, vpon Eufraten
forsothe is mi bataile; hee&yogh;ende go doun.
28 And Josias is not turned a&yogh;een vp on
the char, but enforcide to ouercomyn hym,
not takende heede to the woord of the
profete, of the mouth of the Lord;
29 but
he sette to hym bataile in the feld of
Mecedan; and princis descendeden to
king Josiam.
30 And the king seide to his
childer, Moueth me awei fro the bataile;
forsothe I am gretli maad sijk. And anoon
his childre moueden hym awei fro the
sheltrun.
31 And he ste&yogh;ede vp vpon his
secunde char; and comende to Jerusalem,
diede, and is biried in the fader sepulcre.
32 And in al Jude thei weileden
Josie, and thei that befor seten with
wiues, weilede hym vnto this dai; and
this is &yogh;iue to be don euermor in to al
the kinrede of Irael.
33 These thingus forsothe
ben beforn writen in the boc of
stories of kingus of Juda, and `in to alle
iestis, the deede of Josie, the glorie of
hym, and his vnderstonding in the lawe
of God; for euenli ben don of hym, and
thoo thingus that ben not writen in the
boc of kingus of Irael and of Juda.
34 And
thei that weren of the kinrede, takende
Jechoniam, the sone of Josie, setten king
for Josie, his fadir, whan he was of thre
and thretti &yogh;er.
35 And he regnede vp on
Irael thre monethis; and the king of
Egipt putte hym awei, that he regne not
in Jerusalem.
36 And he pilde the folc of
an hundrid talentus of siluer, and a talent
of gold.
37 And the king of Egipt sette
Joachym, his brother, king of Jude and
of Jerusalem;
38 and he bond the maister
iugis of Joachim; Saracel, his brother,
takende, he bro&yogh;te a&yogh;een to Egipt.
39 Joachim
-- --
was of fiue and twenti &yogh;er, whan
he regnede in the lond of Juda and of
Jerusalem; and he dide euel in the si&yogh;te
of the Lord.
40 Aftir this forsothe Nabugodonosor,
king of Babiloine, ste&yogh;ede vp,
and bindende hym in a strong bond,
bro&yogh;te in to Babiloine;
41 and the holi vesselis
of God Nabugodonosor toc and
bro&yogh;te, and sacride in his temple in Babiloine.
42 Forsothe of his vnclennesse and
vnreligiosite it is writen in the boc of
the times of kingus.
43 And Joachim, his
sone, regnede for hym; whan forsothe he
was ordeined, he was of ei&yogh;te &yogh;er.
44 Forsothe
he regnede thre monethis and ten
da&yogh;es in Jerusalem; and dide euel in the
si&yogh;te of the Lord.
45 And aftir a &yogh;er Nabugodonosor
sendende bro&yogh;te hym ouer in
to Babiloine, togidere with the sacride
vesselis of the Lord.
46 And he sette Sedechiam
king of Juda and of Jerusalem,
whan he was of oon and twenti &yogh;er.
47 Forsothe
he regnede elleuen &yogh;er; and dide
euel in the si&yogh;te of the Lord, and was not
adrad of the woordis that ben seid of Jeremie,
the profete, of the mouth of the
Lord;
48 and adiurid of king Nabugodonosor,
forsworn wente awei, and his hardned
nol, and with his herte trespaside the
lawful thingus of the Lord God of Irael.
49 And the dukis of the puple of the Lord
manie thingus wickeli beeren, and vnpitousli
diden ouer alle the vnclennessis of
Jentilis; and thei defouleden the temple
of the Lord, that was holi in Jerusalem.
50 And God of ther fadris sente bi his
aungil to a&yogh;een clepen hem, for the
whiche thing he sparede to hem, and to
ther tabernacle.
51 Thei forsothe scorneden
in ther corneris, and that dai that
the Lord spac, thei weren bobbende his
profetus.
52 The whiche vnto wrathe is
stirid vp on his folc, for ther irreligiosite.
Comaundende and ste&yogh;ende vp the
kingus of Caldeis,
53 thei slowen the &yogh;unge
men of hem in swerd, in the enuyroun of
the holi temple of hem; and thei spareden
not to &yogh;ung man, and to maiden, and to
-- --
old man, and to ful waxen man;
54 but and
alle thei ben taken in to the hondus of
hem; and alle the sacride vesselis of the
Lord, and the kingis cofrys takende, thei
bro&yogh;ten in to Babiloine.
55 And thei brenden
vp the hous of the Lord, and distrieden
the wallis of Jerusalem, and his touris
brenden with fijr.
56 And thei wasteden
alle the wrshipeful thingus, and to no&yogh;t
bro&yogh;ten; and the laft fro swerd thei
bro&yogh;ten in to Babiloine.
57 And thei weren
his thrallis, vnto the time that Persis regneden,
in the fulfilling of the woord of
the Lord, in the mouth of Jeremie;
58 for
to the lond wolde do benigneli ther sabatis,
al the time of ther forsaking he
sabatisede, in the apliyng of seuenti &yogh;er.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
