Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. V.
1 Salomon thanne brou&yogh;te in alle thingis,
that Dauid, his fadir, hadde vowed; syluer,
and gold, and al the vessels, he putte
in the tresores of the hous of the Lord.
2 After the whiche thingis he gadride the
more thoru&yogh; birthe of Irael, and al the
princis of lynagis, and the heuedis of
meynes, of the sonys of Yrael, in to Jerusalem,
that thei bryngin the ark of the
pese couenaunt of the Lord fro the cyte
of Dauid, that is Syon.
3 And so camen
to the kyng alle the men of Yrael, in
the solempne day of the seuenth moneth.
4 And whanne weren commen alle of the
elder of Yrael, the Leuytes beren the
arke,
5 and brou&yogh;ten it in, and al the aray
of the tabernacle. Bot the vessels of the
seyntuarye, that weren in the tabernacle,
the prestis beeren with the Leuytis.
6 Kyng Salomon forsothe, and al the companye
of Irael, and alle that weren gadered
beforn the arke, offreden wethers
and oxen with oute eny noumbre; so
myche forsothe was the multitude of
slayn offryngus.
7 And the prestis brou&yogh;ten
in the arke of the pese couenaunt of the
Lord in to his place, that is, to Goddis
answerynge place of the temple, in to the
holies of halowes, vndre the weengis of
-- --
cherubyn;
8 so that cherubyn spreden out
their weengis vpon the place, in the
whiche the ark was sett, and that arke
thei schulden coueren with their beryng
staues.
9 Of the berynge staues forsothe,
with the whiche the ark was born, for a
litil wi&yogh;t lengere thei weren, the heuedis
weren opene beforn Goddis answerynge
place; &yogh;if forsothe eny a litil wi&yogh;t were
with out forth, hem he my&yogh;te not seen.
And so the arke was there vnto the present
day;
10 and noon other thing was in
the ark, bot the two tablis that Moyses
hadde putte in Oreb, whanne he &yogh;aue the
lawe to the sonis of Yrael goyng out fro
Egipt.
11 Forsothe the prestis goon out
fro the seyntuarye, alle forsothe prestis,
that there my&yogh;t ben founden, ben halowed,
ne &yogh;it in that tyme the whijlis,
and the order of seruyses betwene hem
seluen was deuydid;
12 bothe Leuytis and
syngers, that is, and that vndur Asaph
weren, and that vndur Eman, and that
vndir Idythum, sonis and bretheren of
hem, clothed with surples, in cymbalis
and sawtres and harpis sungyn, stondynge
at the eest coost of the auter, and
with hem prestis an hundrith and twenty,
syngynge with trumpis.
13 Thanne alle to
gyder, in trumpis, and voice, and cymbalis,
and orgnys, and of dyuerse kynde
of musikis, sownynge to gydre, and the
voice berynge vp an heei&yogh;, afer the sown
was hard, so that whanne the Lord thei
hadden begunnen to preysen, and seyn,
Knowlecheth to the Lord, for `he is
good, for in to the world the mercy of
hym; the hous of God was fulfillid with
a clowde,
14 and the prestis my&yogh;ten not
stonden and mynystren for the derknessis;
forsothe the glorie of the Lord
hadde fulfild the hous of God.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
