Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXI.
1 Josaphath forsothe slepte with his faders,
and is biryed with hem in the cite
of Dauid; and Joram, his sone, regned
for hym.
2 The whiche hadde bretheren,
sonus of Josaphath, Azaryam, Jahiel, and
Zacharie, and Azarie, and Mychael, and
Saphaciam; alle thes the sonis of Josaphath,
kyng of Juda.
3 And his fadir &yogh;aue
to hem many &yogh;iftis of gold and of syluer,
and pensyouns, with the most strengthed
citees in Juda; the rewme forsothe he
toke to Joram, for thi that he was the
first goten.
4 Joram forsothe roos vpon
the rewme of his fadir; and whanne he
hadde confermede him selue, he slew&yogh; alle
his bretheren with swerde, and sum of
the princis of Juda.
5 Of two and thritty
&yogh;eer Joram was, whanne he beganne to
regnen; and ei&yogh;t &yogh;eer he regnede in Jerusalem.
6 And he wente in the weyes of
the kyngis of Irael, as the hous of Achab
hadde don, the dou&yogh;ter forsothe of Achab
was his wijf; and he dide euyl in
the si&yogh;t of the Lord.
7 Forsothe the Lord
wolde not distruyen the hous of Dauid,
for the couenaunt that he hadde gon in
with hym, and for he hadde behoten
-- --
that he schulde &yogh;euen to hym a lantern,
and to his sonus in al tyme.
8 In tho days
Edom rebellide, that he were not suget
to Jude, and he sette to hym a kyng.
9 And whanne Joram was passed with his
princis, and with al the chyualrie, that
was with hym, he ros the ni&yogh;t, and smote
Edom, `the whiche hadde enuyrounde
hym, and alle the duykis of his chyualrye.
10 Neuer the later Edom rebellide, that he
were not vnder the comaundinge of Juda
vnto this day. That tyme and Lobna
wente awey, that he were not vnder the
hond of hym; forsothe he hadde forsaken
the Lord God of their fadirs.
11 Forthermore
he forgide hee&yogh;e thingus in the
cytees of Juda, and he maad the dwellers
of Jerusalem to do fornycacioun, and
Juda to breken the lawe.
12 Forsothe ther
ben brou&yogh;t to hym lettris fro Helia, the
prophete, in the whiche was writen, Thes
thingus seith the Lord God of Dauid, thi
fadir,
13 For thou wentist not in the weies
of Josaphath, thi fadir, and in the wei of
Aza, kyng of Juda, bot and thou wentist
bi the wey of the kyngis of Irael, and
thou madist Judam and the dwellers of
Jerusalem to don fornycacioun, folewynge
the fornycacioun of the hous of Achab;
ferthermore and thi bretheren and the
hous of thi fadir, beter thanne thi silf,
thou hast sleyn;
14 loo! the Lord schal
smyten thee with a grete veniaunce, with
thi puple, and sonus, and thi wyues, and
with al thi substaunce;
15 thou forsothe
schalt waxen seek the most warst langour
of wombe, to the tyme that thi
guttis gon out lityl melum by sundre
days.
16 Thanne the Lord rerede a&yogh;einus
Joram the spirite of Philisteis, and of
Arabes, the which ben nee&yogh; coostis to
-- --
Ethiopes;
17 and thei stey&yogh;eden up in to
the lond of Juda, and thei wastiden it,
and thei distruyeden al the substaunce,
that is founden in the hous of the kyng;
ferthermore and the sonus of hym, and
the wijues; and ther laft not to hym a
sone bot Joacha, that was leste thoru&yogh;
birth.
18 And vpon alle thes thingus the
Lord smote hym with vncurable sorowe of
wombe.
19 And whanne to the day schulde
folowen day, and the spacis of tymes
weren turned ouer, of two &yogh;eer the cercle
is fulfild; and so with longe langour he
is wastid, so that he schot out also his
guttis, and so he wantide the langour to
gydre and lijf, and he is deed in warst
infirmyte. And the puple dide not to hym
the deedis office after the maner of brennynge,
as it hadde done to the more of
hym.
20 Of two and thritty &yogh;eer he was,
whanne he beganne to regnen, and ei&yogh;t
&yogh;eer he regnede in Jerusalem, and he
wente not ri&yogh;t; and thei biryeden hym
in the cyte of Dauid, neuer the later not
in the sepulcre of kyngis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
