Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. I.
1 Salomon thanne, the sone of Dauid, is
coumfortid in his rewme, and the Lord
was with hym, and magnyfiede hym in
to an hee&yogh;.
2 And Salomon comaundyde
to al Yrael, to leders of thousandis, and
maystirs of hundrethis, and to domysmen,
and to the duykis of al Yrael, and
to princis of meynes;
3 and wente with al
the multitude in to the hei&yogh;t of Gabaon,
where was the tabernacle of the pese
couenaunt of the Lord, that Moyses, the
seruaunt of God, made in wyldirnesse.
4 Dauid forsothe hadde lad the arke of
God fro Cariathiarym in to the place
that he hadde made redi to it, and wher
he hadde pi&yogh;t to it a tabernacle, that is,
in Jerusalem.
5 Also a brasen auter, the
whiche Beseleel, the sone of Vri, sone of
Ur, hadde forgid, there was beforn the
tabernacle of the Lord; the whiche and
Salomon sou&yogh;t and al the chirche.
6 And
-- --
Salomon stei&yogh;ede up to the brasen auter,
before the tabernacle of the pese couenaunt
of the Lord, and offride in it a
thousand hoostis.
7 Lo! forsothe in that
ny&yogh;t God apeerid to hym, seyinge, Ask
that thou wylt, that I &yogh;eue to thee.
8 And
Salomon seide to God, Thou didist with
Dauith, my fadir, grete mercy, and settist
me kyng for hym.
9 Nowe thanne,
Lord God, thi word be fulfild, that thou
bihi&yogh;tist to Dauid, my fadir; thou forsothe
hast made me kyng vpon thi grete
puple, the whiche is as vnnoumbreable
as the poudre of the erth.
10 &YOGH;eue to me
wysdam and vndirstondynge, that I go in
and go out beforn thi puple; who forsothe
may this thi puple, that is so greet,
worthily deemyn?
11 God forsothe seide to
Salomon, For this more pleside to thin
herte, and askidist not rychesses, and
substaunce, and glorie, ne the lijues of
hem that hatiden thee, ne many days of
lijf; but forsothe thou askidist wisdam
and kunnynge, that thou my&yogh;tist deme
puple, vpon the whiche I haue sett thee
kyng,
12 wisdom and kunnynge ben &yogh;euen
to thee; ritchesses forsothe, and substaunces,
and glorie I schal &yogh;euen to
thee, so that no man in kyngis, ne before
thee ne aftir thee, were lijc thee.
13 Than
Salomon came fro the hei&yogh;t of Gabaon
in to Jerusalem, beforn the tabernacle of
the pese couenaunt, and regned vpon
Yrael.
14 And he gadirde to hym charis
and hors men, and ther ben maad to
hym a thousand and foure hundrith
chaaris, and twelue thousand of horse
men; and he maad hem to ben in the
citees of plowes of foure hors, and with
the kyng in Jerusalem.
15 And the kyng
&yogh;aue in to Jerusalem syluer and gold as
stonys, and cedres as long mulberies, that
-- --
growen in wijld feeldis in myche multitude.
16 Forsothe ther weren brou&yogh;t to
hym hors fro Egipt, and fro Ohoa, of the
marchaundis of the kyng, that wenten
and bo&yogh;ten bi prijs,
17 a plow&yogh; of hors for
sixe hundrith platis of syluer, and an
hors for an hundrith and fyfty. Lijc
maner of alle the rewmes of Cetheys,
and of the kyngis of Cirie, the bying
was solemply don.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
