Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXI.
1 Sathan forsothe rose a&yogh;ein Yrael, and
stired Dauith for to noumbre Yrael.
2 And
Dauid seid to Joab, and to the princes
of the puple, Goth, and noumbrith Yrael
fro Bersabe vnto Dan, and bryngith to
me the noumbre, that I knowe.
3 And
Joab answerd, The Lord encrese his puple
an hundrith fold thann thei ben;
whether not, my lord kyng, thi seruauntis
thei ben alle? Why this thing
sechith my lord, that in to synne it be
rettid to Yrael?
4 Bot the word of the
kyng more hadde the maistrie; and Joab
wente out, and enuyrouned al Yrael, and
is turned a&yogh;ein in to Jerusalem.
5 And he
&yogh;aue to Dauid the noumbre of hem, the
whiche he hadde enuyrownede; and al
the noumbre of Yrael is founden a thousand
thousandes, and an hundrith thousand
of men, drawynge oute swerd; of
Juda forsothe thre hundrith and seuenty
thousand of fi&yogh;tynge men.
6 Forsothe Leuy
and Beniamyn he noumbride not, for thi
that constreyned he folowede out the
kyngis hest.
7 Forsothe that was comaundid
displeside to the Lord, and he
smote Yrael.
8 And Dauid seid to God,
I haue synned ful myche for to do this;
I biseche, do awey the wickidnesse of thi
-- --
seruaunt, for vnwijsly I dide.
9 And the
Lord spac to Gad, seere of Dauid, seyinge,
Go,
10 and speke to Dauid, and sey to
hym, Thes thingis seith the Lord, Of
thre thingis to thee I &yogh;eue chois; oon that
thou wylt, chees, that I doo to thee.
11 And
whann Gad was commen to Dauid, he
seide to hym, Thes thingis seith the
Lord,
12 Chees that thou wilt, or three
&yogh;eer pestilence, or thee thre monethis to
flee thi enmyes and the swerd of hem
not to mowen ascapyn, or thre days the
swerd of the Lord and deth to be turned
aboute in the lond, and the aungel of the
Lord to slen in alle the cytees of Yrael.
Nowe thanne see, what I schal answere
to hym that sente me.
13 And Dauith
seid to Gad, On alle sijdes angwyschis
thresten me doun, bot beter it is to me,
that I falle in to the hondis of the Lord,
for many ben the mercyes of hym, thanne
in to the hondis of men.
14 Thanne the
Lord sente pestilence in to Yrael, and
ther fellen of Yrael seuenty thousand of
men.
15 And he sente the aungel in to
Jerusalem, that he smyte it; and whanne
it schulde ben smyten, the Lord saw&yogh;,
and hadde rewthe vpon the mykilnesse
of euyl; and he comaundide to the aungel
that smote, It sufficith, nowe cese thi
hond. Forsothe the aungel of the Lord
stode besides the corn flore of Ornam
Jebusei.
16 And Dauid, rerynge his ee&yogh;en
up, sawe the aungel of the Lord stondynge
bitwene heuene and erthe, and a
drawn swerd in his hond, and turned
a&yogh;einus Jerusalem. And there fellen downe
as wele he as the more thoru&yogh; birthe,
clothid with heyris, bowed doun in to
the erth.
17 And Dauid seide to the Lord,
Whether not I am the whiche haue comaundide
that the puple be noumbrid?
I that haue synned, I the whiche dyde
euyl; this floc what hath deserued?
-- --
Lord my God, be turned, I biseche, thi
hond in to me, and in to the hous of my
fadir; thi puple forsothe be not smyten.
18 The aungel forsothe of the Lord comaundide
to Gad, that he schuld seyn
to Dauith, that he schuld stey&yogh;e up, and
maken out an auter to the Lord God in
the corne flore of Ornam Jebuse.
19 Than
Dauid stey&yogh;ide up aftir the word of Gad,
that to hym he hadde spoken of the word
of the Lord.
20 Bot Ornam whanne he
hadde beholden and seen the aungel, and
his foure sonys with hym, hidden hem
silf, for why that tyme he tradde corn
in the flore.
21 Thanne whanne Dauid
came to Ornam, Ornam byheld hym, and
wente forth to meeten hym fro the flore,
and honouride hym, bowed in to the
erthe.
22 And Dauid seide to hym, &YOGH;eue
to me a place of thy flore, that I bild in
it an auter to the Lord; so that howe
myche it is worth of syluer thou take,
and the veniaunce cese fro the puple.
23 And Ornam seyde to Dauid, Take, and
my lord the kyng do what euer thing
plese to hym; bot and oxen I &yogh;eue in to
brent sacrifice, and the pestels in to wode,
and the whete in to sacrifice; alle thingis
gladly I &yogh;eue.
24 And kyng Dauith seide
to hym, It schal not ben so, bot syluer
I schal &yogh;euen as myche as it be worth;
ne forsothe I owe to taken awey to thee,
and so to offren to the Lord free brent
sacrifices.
25 Than Dauid &yogh;aue to Ornam
for the place ownces of gold of most just
wei&yogh;t sixe hundrith.
26 And he bilde there
an auter to the Lord, and offride brent
sacrifices and pesible, and inwardly clepid
God; and he herd hym in fyre fro heuen
vpon the auter of brent sacrifice.
27 And
the Lord comaundide to the aungel, and
he turned the swerd in to the schethe.
-- --
28 Thanne Dauid anoon seeynge, that the
Lord hadde herde hym in the corn flore
of Ornam Jebusei, he offride there slayne
sacrifices.
29 Forsothe the tabernacle of the
Lord, that Moyses hadde maad in desert,
and the auter of brent sacrifices, was in
that tempest in the hei&yogh;t of Gabaon;
30 and
Dauid my&yogh;t not gon to the auter, that
there he beseche God, forsothe he was
with to myche gastnesse aferd, seeinge
the swerd of the aungel of the Lord.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
