Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VIII.
1 Helisee forsothe spac to the womman,
whose sone he made to lyue, seyinge,
Rijs, goo, and thou and thin hous, in pilgrymage,
whereuer thou schalt fynde;
the Lord forsothe schal clepen hungre,
-- --
and it schal commen vpon the lond seuen
&yogh;eer.
2 The whiche rose, and dyde aftir
the word of the man of God; and gooynge
with hyre hous pylgrymagid in
the lond of Phylisteis many dayes.
3 And
whanne seuen &yogh;eer weren fynyschid, the
womman is turnede a&yogh;ein fro the lond
of Philisteis; and sche wente oute, that
sche preye the kyng for hyre hous, and
for hir feeldis.
4 The kynge forsothe spak
with Giezi, the chijld of the man of God,
seyinge, Telle to me alle the grete thingis
that Helisee dide.
5 And whanne he tolde
to the kynge, what maner wijse he hade
rered the deed, the womman apeeride,
whose sone he hade quyckenede, criynge
to the kyng for hyre hous, and for hyre
feeldis. And Giezi seide, My lord kyng,
this is the womman, and this is the sone
of hyre, that Helisee rerede.
6 And the
kynge askyde the womman, the whiche
tolde to hym tho thingis to be soth. And
the kyng &yogh;aue to hyre an geldynge, seiynge,
Restore to hyre alle thingis that
ben hyres, and alle the rentes of feeldis,
fro the day that sche laft the lond vnto
the tyme that is nowe.
7 Forsothe Helisee
cam to Damask, and Benadab, kyng
of Cyrye, wexe seeke; and thei tolden
to hym, seyinge, The man of God is commen
hydre.
8 And the kyng seith to Asael,
Take with thee &yogh;iftis, and goo in to a&yogh;ein
commynge of the man of God, and counseyle
by hym the Lord, seyinge, &YOGH;if I
schal mow ascapen of this myn enfirmyte?
9 Than Asael wente in to a&yogh;ein
commynge of hym, hauynge with hym
&yogh;iftis, and alle the goodis of Damaske,
fourty chamel chaargis. And whanne he
hade stonden before hym, seith, Thi sone,
Benadab, kyng of Syrie, sente me to thee,
seyinge, &YOGH;if I schal mowe be heelid of
this myn enfirmyte?
10 And Helisee seide,
Goo, seye to hym, Thou schalt ben hoole;
-- --
bot the Lord hath schewide to me for by
deth he schal dye.
11 And he stode with
hym, and is distourbled, vnto the schedynge
doun of the cheere; and the man
of God wepte.
12 To whom Asael seith,
Why my lord weepith? And he answerde,
For I wote what thou be to doo
to the sonis of Yrael euyls; the strengthide
cytees of hem thou schalt brenne up
with fijr, and the &yogh;onge men of hem thou
schalt slee with swerde, and the lytyll
chyldre of hem thou schalt hurtlyn, and
the wymmen with chijlde thou schalt
deuyde.
13 And Asael seyde, What forsothe
am I, thi seruaunt, an hound, that
I doo this grete thinge? And Helisee
seith, The Lord hath schewide to me
thee to be kyng of Cyrye.
14 The which
whanne hade goon aweye fro Helisee,
came to his lord; the which seith to
hym, What seide Helisee to thee? And
he answerde, He seide to me, Thou schalt
resseyue helth.
15 And whanne the tother
day was commen, he toke an couerlyte,
and helte in with watir, and spradde
vpon his face; the whiche deed, Asael
regnede for hym.
16 The fyft &yogh;eer of Joram,
the sone of Acab, kyng of Yrael, regnede
Joram, the sone of Josaphath, king of
Juda.
17 Of two and thritty &yogh;eer he was
whanne he beganne to regnen, and ei&yogh;te
&yogh;ere he regnyde in Jerusalem.
18 And he
wente in the weyes of the kyngis of
Yrael, as wente the hous of Acab; the
dou&yogh;ter forsothe of Acab was his wiyf;
and he dydde that, that is yuel in the
si&yogh;t of the Lord.
19 And the Lord wolde
not scateren Juda, for Dauid, his seruaunt,
as he hadde behoten to hym, that
he schulde &yogh;eue to hym a lanterne, and
to his sones alle days.
20 In tho days
wente aweye Edom, that thei weren not
vndur Juda; and he sette to hym a kyng.
-- --
21 And Joram came to Seyr, and alle the
charis with hym; and he roose the ny&yogh;t,
and smote Ydumes, that hym hadden
enuyround, and the princis of the chaaris;
the puple forsothe fleey&yogh; in to their tabernaclis.
22 Than went Edom, that he were
not vndur Juda vnto this day; thanne
wente aweye Lobna and in that tyme.
23 The remnaunt forsothe of the wordis of
Joram, and alle thingis that he dyde,
whether not these ben writen in the
booke of the wordis of the days of the
kyngis of Juda?
24 And Joram slepte with
his faders, and is byryed with hem in
the cytee of Dauid; and Ochosias, his
sone, regnede for hym.
25 The twelfith &yogh;eer
of Joram, the sone of kyng Achab, regnede
Ochosias, the sone of kyng Joram, of
Jude.
26 Of two and twenty &yogh;eer was Ochosias,
the sone of Joram, whanne he beganne
to regnen, and oon &yogh;eer he regned
in Jerusalem; the name of his modir
Athalia, the dou&yogh;ter of Amry, kyng of
Yrael.
27 And he wente in the weyes of
the hous of Achab, and dydde that, that
is yuel before the Lord, as the hous of
Acab; forsothe the sone in lawe of the
hous of Acab he was.
28 Forsothe he wente
with Joram, the sone of Acab, to fi&yogh;ten
a&yogh;eyn Azael, kyng of Cyrie, in to Ramoth
Galaad; and Cyries woundeden Joram.
29 The whiche is turned a&yogh;eyn, that
he were helyd in Jezrael; for Cyries
woundeden hym in Ramoth, fi&yogh;tynge
a&yogh;eynst Azael, kynge of Cyrie. Forsothe
Ochozias, the sone of Joram, kyng
of Juda, came doun to visyten Joram, the
sone of Achab, in Jezrael, the whiche
seekened there.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
