1   And thei tolden to the kyng that sche hadde seide; the whiche sent, and ben gadred to hym alle the olde men of Juda, and of Jerusalem. 2   And the kyng stey&yogh;ide up the temple of the Lord, and alle the men of Juda, and alle that dwelliden in Jerusalem with hym, prestis, and prophetis, and alle the puple, fro lytyl vnto mychil; and he radde, alle men heerynge, alle the wordis of the boke of the pese couenaunt of the Lord, the whiche is founden in the hous of the Lord. 3   And the kyng stood vpon a gree; and he smote pese couenaunt before the Lord, that thei goon after the Lord, and keepen his heestis and witnessyngis and cerymoynes in al herte and in al soule, that thei reren the wordis of this pese couenaunt, that weren wryten in that boke; and the puple assentyde to the couenaunt. 4   And the kyng comaundyde to Elchie, the bischop, and to the prestis of the secound ordre, and to the &yogh;ate kepers, that thei throwen forthe fro the temple of the Lord alle the vessels, that weren maad to Baal, and in the mawmett wodde, and to al the kny&yogh;thod of heuen; and he brende hem with outen forth Jerusalem, in the valey of Cedron, and he toke the poudre of hem in to Bethel. 5   And he dyde aweye the deuyl clepers, whome the kyngis of Juda hadden sett to sacrifien in hei&yogh;tis by the cytees of Juda, and the enuyroun of Jerusalem, and hem that brenden encense to Baal, and to the sunne, and to the mone, and to the twelue syngnys, and to alle the kny&yogh;thode of heuen. 6   And he comaundyde to ben born out the mawmett wodde fro the hous of the Lord with out forth Jerusalem in the

valey of Cedron, and brende it there, and brou&yogh;t it in to poudre, and threw&yogh; forth vpon the sepulcris of the comun. 7   Forsothe he distruy&yogh;ide the lytyl housis of the wommannysch maad men, that weren in the hous of the Lord; for the whiche wymmen weueden as lytyll houses of the mawmett wodde. 8   And he gadrede alle the prestis of the cytees of Juda, and he defoulide the hey&yogh;tis, where the prestis sacrifieden, fro Gaba vnto Bersabe; and he distruyed the auters of the &yogh;atis in the entree of the dore of Josie, prince of the cytee, that was at the left syde of the &yogh;ate of the cytee. 9   Neuer the latre the prestis of the hee&yogh;e thingis stey&yogh;iden not vp to the auter of the Lord in Jerusalem, bot oonly eten therfe loouys in the mydill of their bretheren. 10   Forsothe he defoulide Topheth, that is in the valeye of the sone of Ennon, that no man schuld sacryn his sone or his dou&yogh;tre thor&yogh; fyr to Moloch. 11   Forsothe he toke awey the hors, the whiche the kingis of Jude hadden &yogh;euen to the sunne, in the entree of the temple of the Lord, besijdis the chayer of Nathanmylech, geldynge, that was in Faturym; the chaare forsothe of the sunne he brende with fijr. 12   And the auters, that weren vpon the rooues of the soupynge place of Achath, the whiche the kyngis of Juda hadden maad, and the auters that Manasses hadde maad in the two poorchis of the temple of the Lord, the kyng destruyede; and he ran to Jude, and he scatrede the askis of hem in to the streme of Cedron. 13   The hee&yogh;e thingis forsothe, that weren in Jerusalem at the ri&yogh;t partye of the hyll of the offencyoun, the whiche Salomon, kyng of Yrael, hadde bylde, and Astaroth, the mawmett of Sydonyes, and Camos, of the offencyoun of Moab, and Melchon, the abomynacyouns

of the sonys of Amon, the kyng defoulide; 14   and broosede the ymagis, and hew&yogh; doun the mawmett woodis, and fulfillide the places of hem with the boonis of deed men. 15   Ferthermore and the auter that was in Bethel, and the hee&yogh;e thinge, that Jeroboam, the sone of Nabath, hadde maad, the whiche maad Yrael to synnen; and that hee&yogh; auter he distruyede, and brende, and mynuschede in to poudre, and also brende up the mawmett woode. 16   And Josias turned, sau&yogh; there sepulcris that weren in the hyll; and he sente, and toke the boonys fro the sepulcris, and brende hem vpon the auter, and putte it aftir the word of the Lord, that the man of God spac, the whiche hadde before seide these wordis. 17   And he seith, Whose is this towmbe that I see? And the cyte&yogh;eens of that cyte answerden to hym, The sepulcre it is of the man of God, that came fro Juda, and before seide thes wordis, `the whiche thou hast done vpon the auter of Bethel. 18   And he seith, Lefe hym; no man styrre the boonys of hym. And vntouchid laften the boonys of hym with the boonis of the prophete, that came fro Samarye. 19   Ferthermore and alle the mawmett templis of the hee&yogh;e thingis, that weren in the cytees of Samarye, the whiche the kyngis of Yrael hadden maad to terre the Lord, Josias toke aweye; and he dyde to hem aftir alle the werkis that he hadde done in Bethel. 20   And he slew&yogh; alle the prestis of the hee&yogh;e thingis, that weren ther vpon the auteres, and he brende mens boonys vpon thoo; and he turnede a&yogh;eyn to Jerusalem. 21   And he comaundide to al the puple, seyinge, Makith pask to the Lord &yogh;oure God, aftir that is writen in the boke of this pese

of couenaunt. 22   Ne forsothe ther is maad siche a pask fro the days of iugis, that demeden Yrael, and of alle the days of the kyngis of Yrael, and of the kyngis of Juda, 23   as in the ei&yogh;tenthe &yogh;eer of kyng Josie this pasch is maad to the Lord in Jerusalem. 24   Bot and the clepers of deuyls, and deuynours, and the fyguris of mawmettis, and the vnclennesses, and abomynacyouns, that weren in the lond of Juda and of Jerusalem, Josias dyde aweye, that he make stable the wordis of the lawe, that ben writen in the boke, that Elchias, the prest, fonde in the temple of the Lord. 25   Lijk hym was not beforn hym a kyng, that was turned a&yogh;eyn to the Lord in al his herte, and in alle his soule, and in al his vertue, aftir al the lawe of Moyses; ne aftir hym rose lijke to hym. 26   Neuerthelatre the Lord is not turned aweye fro the wrath of his grete woodnes, in the whiche his wodnes is wrothe a&yogh;eynus Juda, for the terryngis in the whiche Manasses hadde terred hym. 27   And so the Lord seide, Also Judam I schal taken aweye fro my face, as I toke aweye Yrael; and I schal throwen aweye this cytee, that I chees, Jerusalem, and the hous of the whiche I seide, My name schal ben there. 28   The remnaunt forsothe of the wordis of Josie, and alle thingis that he dyde, whether not thes ben writen in the boke of the wordis of the days of the kyngis of Juda? 29   In his days stey&yogh;ide up Pharao Nechao, kyng of Egipt, a&yogh;eynus the kyng of Assiries, at the flode of Eufraten; and Josias, kyng of Juda, wente in to a&yogh;ein commynge of hym, and is slayn in Magedo, whanne he had seen hym. 30   And his seruauntis beeren hym deed fro Magedo, and brou&yogh;ten hym in to Jerusalem, and byryeden hym in his sepulcre; and the puple of the lond

toke Joachas, the sone of Josie, and anoyntyden hym, and setten hym kyng for his fadir. 31   Of three and twenty &yogh;eer was Joachaz, whanne he hadde begune to regnen, and thre monethis he regned in Jerusalem; name of his modir, Amychael, dou&yogh;ter of Jeremye of Lobna. 32   And he dyde euyl beforn the Lord, aftir alle thingis that the fadirs of hym hadden done. 33   And Pharao Nechao bond hym in Reblatha, that is in the lond of Emath, that he `regne not in Jerusalem; and he putte vpon a multynge to the lond, in an hundreth talentis of syluer, and a talent of gold. 34   And Pharao Nechao ordeynde kyng Eliachym, the sone of Josias, for Josias, his fadir; and he turnede his name Joachym; forsothe Joachaz he toke, and ladde in to Egipt. 35   Forsothe Joachym &yogh;aue to Pharao syluer and gold, whanne he hadde comaundide to the lond by alle &yogh;eeris, that it were brou&yogh;t, aftir the heest of Pharao; and echon aftir their strengthis he askyde bothe syluer and gold, of the puple of the lond, that he my&yogh;te &yogh;eue to Pharao Nechao. 36   Of fyue and twenty &yogh;eer was Joachym, whanne he hadde begunne to regnen, and elleuen &yogh;eer he regnede in Jerusalem; the name of his modir, Zebida, dou&yogh;ter of Fadaya of Ruma. 37   And he dyde euyl before the Lord, aftir alle thingis that his fadirs haden done.

Previous section

Next section