Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIX.
1 Thanne alle the companyes of Philisteis
ben gadred in Aphech, but and
Irael sette tentis vpon the welle that was
in Jezrael.
2 Forsothe and the maistris of
Philisteis wenten in hundredis and thousandis;
forsothe Dauid and his men
weren in the last companye with Achis.
3 And the princis of Philisteis seiden to
Achis, What to hem self wolen thes
Ebrews? And Achis seith to the princys
of Philisteis, Whether knowe &yogh;e not Dauid,
that was seruaunt to Saul, kyng of
Irael? and is anentis me manye days or
&yogh;eeris, and I founde not in hym eny
thing, fro the dai that he ouer flei&yogh; to
me vnto this dai.
4 Forsothe the princis
of Philisteis ben wrooth a&yogh;ens hym, and
seiden to hym, The man turne a&yogh;en, and
sitt in his place, in the which I haue sett
hym, and dessende he not with vs into
batail, lest he be maad to vs aduersarye,
whanne we bigynnen to fi&yogh;te; forsothe
what maner wise other wise he shal
mowe plese his lord, but in oure heedis?
5 Whether is not this Dauid, to whom
thei syngen in dauncis, seiynge, Saul
hath smyten in his thousandis, and Dauid
in his ten thousandis?
6 Thanne Achis
clepide Dauid, and seide to hym, The
Lord lyueth; for ri&yogh;t thou ert, and good
in my si&yogh;t, and thi goynge out and thin
incomynge with me is in the tentis, and
I haue not founden in thee eny thing of
yuel, fro the dai that thou cam to me
vnto this dai; but to the maistris thou
plesist not.
7 Turn thanne a&yogh;en, and go in
pees, and offend thou not the eyen of the
-- --
maistris of Philisteis.
8 And Dauid seid
to Achis, Forsothe what haue I doo, and
what hast thou founden in me thi seruaunt,
fro the dai that I was in thi si&yogh;t
vnto this dai, that I come not, and fi&yogh;t
a&yogh;ens the enemyes of my lord the kyng?
9 Forsothe Achis answerynge spak to Dauid,
I woot for thou art good, and in myn
eyen as the aungel of God; but the princis
of Philisteis seiden, He shal not stie vp
with vs into batail.
10 Therfor rise eerli,
thou, and thi seruauntis that camen with
thee; and whanne fro ni&yogh;t &yogh;e shulen rise,
and it bigynneth to `li&yogh;te day, gooth.
11 And so Dauid roos fro ni&yogh;t, he and his
men, that he mi&yogh;t goo forth eerli to the
loond of Philisteis, and turne a&yogh;en; forsothe
Philisteis stieden vp into Jezrael.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
