Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXII.
1 Dauid thanne &yogh;eed thens, and flei&yogh; into
the spelunk of Odallam; the which thing
whanne the britheren of hym hadden
herd, and al the hows of his fadre, thei
camen doun to hym thidir.
2 And camen
to gidre to hym alle that weren in
angwish set, and oppressid for other
mennus monee, and for bitter inwit; and
he is maad the prince of hem, and there
weren with hym as foure hundrid men.
3 And Dauid wente thens into Masphat,
that is of Moab; and seide to the kyng of
Moab, Dwelle, Y preye, my fader and
my moder with &yogh;ow, to the tyme that
Y wite what God doo to me.
4 And he
laft hem before the face of the kyng of
Moab; and thei dwelten anentis hym alle
days, in the whiche Dauid was in strong
socour.
5 And Gad, the prophet, seide to
Dauid, Wole thow not dwelle in the
place of strong socour; weend forth, and
goo into the loond of Juda. And Dauid
wente, and cam into the wijlde wode of
Areth.
6 And Saul herde, that Dauyd apperyde,
and men that with hym weren.
Forsothe Saul whanne he dwelt in Gabaa,
and was in the wode that is in Rama,
a speer in hoond holdynge, and alle his
seruauntis stoden about hym,
7 he seith to
his seruauntis that stoden ny&yogh; to hym,
Herith me nowe, the sones of Gemyny;
whethir to alle &yogh;ou the sone of Ysay
shal &yogh;yue feeldis and vynes, and alle &yogh;ou
shal make lederys of thousandis and
-- --
leders of hundredis?
8 For &yogh;e alle han
sworn togidre a&yogh;ens me, and there is not
that a&yogh;en telle to me; moost whanne and
my sone hath ioyned couenaunt of pees
with the sone of Ysay; there is not that
sorwith my while of &yogh;ou, ne that telle to
me, forthi that my sone hath reride my
seruaunt a&yogh;ens me, weytynge to me vnto
to day.
9 Forsothe answerynge Doech
Ydume, that stood ny&yogh;, and was the fyrst
amonge the seruauntis of Saul, I saw&yogh;,
he seith, the sone of Ysay in Nobe, at
Achimalech, the sone of Achitob, the
preest;
10 the which counseilede the Lord
for hym, and &yogh;af meetis to hym, but and
the swerd of Goliath Philistee he &yogh;af to
hym.
11 Thanne the kyng sente to cleepe
Achymalech, the sone of Achitob, the
preest, and al the hows of his fader, of
the prestys that waren in Nobe; the
whiche alle to the kyng ben comen.
12 And Saul seith to Achymalech, Here,
thou sone of Achitob. The which answerde,
I am prest, lord.
13 And Saul
seide to hym, Whi han &yogh;e sworn togidre
a&yogh;ens me, thou, and the sone of Ysay,
and thou hast &yogh;euen to hym loouys and
a swerd, and thou hast counseild for hym
the Lord, that he ryse a&yogh;ens me, dwellynge
a spye vnto to day?
14 And Achymalech
answerynge to the kyng seith, And
who in alle thi seruauntis trewe as Dauid,
and the sone in lawe of the kyng, and
goynge at thin heest, and gloryous in
thin hows?
15 Whether to day I haue begun
for hym to counseil the Lord? A wey be
that fro me, ne trowe the kyng a&yogh;ens his
seruaunt sich a maner thing in al the
hows of my fader; forsothe thi seruaunt
wiste not eny thing vpon this nede, othere
litil or greet.
16 And the kyng seide, Bi
deth shal dye, Achymalech, thou, and al
-- --
the hows of thi fader.
17 And the kyng
seith to the outgoers in his nedis, that
stooden about hym, Turneth, and sleeth
the preestis of the Lord, for the hoond
of hem is with Dauid; wytynge that he
was flowen, and thei sheweden not to
me. Forsothe the seruauntis of the kyng
wolden not strecche out her hoond into
the preestis of the Lord.
18 And the kyng
seith to Doech, Turn thou, and fal into
the preestis of the Lord. And Doech
Ydume turnede, felle into the preestis,
and hew&yogh; doun fyue and ei&yogh;tith men in
that day, clothid with surplees.
19 Also he
smoot Nobee, the citee of preestis, in
mouth of swerd, men and wymmen, litil
children and sowkynge, and oxe, and
asse, and sheep, in mouth of swerd.
20 Forsothe
oon ascapynge, sone of Achymalech,
the sone of Achitob, whos name
was Abiathar,
21 flee&yogh; to Dauid, and toolde
to hym, that Saul hadde slayn the prestis
of the Lord.
22 And Dauid seith to Abiathar,
Forsothe I wist in that day, that
whanne there was Doech Ydume, with
out dout he wold telle to Saul; I am
gilti of alle the soulis of thi fader.
23 Dwel
with me, ne drede thou; if eny man
sechith my lijf, shal seche and thi lijf,
and with me thou shalt be kept.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|