Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIV.
1 And it felle on a day, that Jonathas,
the sone of Saul, seide to the &yogh;ong man
his squyer, Com, and goo we to the stacioun
of Philistyens, that is bi&yogh;onde that
place; to his fader forsothe that same
thing he shewide not.
2 Forsothe Saul
dwellide in the vttermoost parti of Gabaa,
vndur a poomgarnet tree, that was
in `the feeld of Gabaa; and there was a
puple with hym as of sexe hundred men.
3 And Achias, the sone of Achitob, the
brother of Ychabod, the sone of Phynees,
that was comen of Hely, the preest of the
Lord in Silo, beere the prestis coope; but
and the puple knewe not whider Jonathas
was goon.
4 Forsothe there weren
bytwixe the stiyngis vp, bi the whiche
-- --
Jonathas enforside to goo to the stacyouns
of Philistiens, hei&yogh;e stonys on
either side, and as in maner of teeth litle
rochis hens and thens before brokun;
name to the oon Boosez, and to the
tother the name Sene;
5 o litil roche ful
hee&yogh; at the north a&yogh;ens Machynas to
fi&yogh;ten, and another at the south a&yogh;ens
Gabaa.
6 Jonathas forsothe seide to the
&yogh;ong man his squyer, Come, and passe
we to the stacioun of thes vncercumcidide,
if perauenture the Lord do for vs;
for it is not to the Lord hard to saue, or
in many or in fewe.
7 And his squyer
seide to hym, Do alle thingis that plesen
to thin inwit; go whider thow coueytist,
I shal be with thee where euere thou
wolt.
8 And Jonathan seith, Loo! we goon
to thes men; and whanne we aperen to
hem,
9 if this maner thei speken to vs,
Dwel &yogh;e, to the tyme that we comen to
&yogh;ou; stonde we in oure place, ne stye
we vp to hem.
10 Forsothe if thei seyn,
Stye &yogh;e vp to vs; stye we vp, for the Lord
hath takun hem in oure hoondis; this
shal be to vs a tokne.
11 And so either
aperide to the stacioun of Philistiens;
and Philistiens seiden, Loo! the Hebrewis
goon out fro the caues, in the
whiche thei weren hid.
12 And the men
speken fro the stacioun to Jonathan and
to his squyer, and seiden, Stieth vp to vs,
and we shulen shewe &yogh;ou a thing. And
Jonathas seith to his squier, Stie we,
folwe me; forsothe the Lord hath taken
hem into the hoondis of Yrael.
13 Forsothe
Jonathas styede crepynge with hoondis
and feet, and his squyer after hym; and
whanne thei hadden seen the face of
Jonathan, other fellen before Jonathan,
other his squyer slow&yogh;, folowynge hym.
14 And the first veniaunce is doon, the
which smoot Jonathas and the squyer of
-- --
hym as of twenti thousand men, in the
half party of an akir that a peyre of
oxen in a day is wont to ere.
15 And a
myracle is doon in the tentis, bi the
feeldys, but and al the puple of the stacioun
of hem that weren at robbynge,
wexe astonyed, and the tentis ben disturblid;
and it felle as a myracle fro
God.
16 And the weyters of Saul, that
weren in Gabaa of Beniamyn, bihelden,
and, loo! a multitude throwun doun, and
hidir and thider down fleynge.
17 And
Saul seith to the puple that weren with
hym, Enserchith, and lokith, who &yogh;ede
awey fro vs. And whanne thei hadden
sou&yogh;t, it is founden not to be nee&yogh; Jonathas
and his squyer.
18 And Saul seith to
Achyam, Applye the arke of `the Lord;
forsothe the arke of God was there in
that day with the sonys of Israel.
19 And
whanne Saul spak to the preest, greet
noyse is out sprongen in the tentis of
Philistyen; and it wexe litilmele, and
cleerliker it sownyde. And Saul seith
to the preest, Withdrawe thin hoond.
20 Thanne Saul and the puple that was
with hym criede togidre; and thei
camen to the place of the strijf, and,
loo! the swerd of echon was turned to
his nei&yogh;bour, and a greet slau&yogh;ter wel
mych.
21 But and the Hebrewis that
weren with Philistiens &yogh;istirday and bifore
&yogh;isterdai, and stieden vp with hem
in the tentis, ben turned for to ben with
Yrael, that weren with Saul and Jonatha.
22 Forsothe alle the Iraelitis, the whiche
hadden hid hem silf in the hil of Effraym,
herynge that Philistiens weren flowen,
felawshipten hem02Q0008 seluen with hem in
the batayl, and weren with Saul as twenti
thousandis of men.
23 And the Lord sauyde
Irael in that day. Forsothe the fi&yogh;t camen
-- --
vnto Bethauen.
24 And men of Yrael ben
felawshipt to hem seluen in that day;
forsothe Saul swore to the puple, seyynge,
Cursid be the man that etith breed
vnto euen, to the tyme that I be vengid
of myn enemyes.
25 And al the puple eete
no breed. And alle the comouns of the
loond camen into a wast wody place,
in the which was hony on the face of
the feeld.
26 And so al the puple wente
into the place of hei&yogh;e trees, and there
apperide flowyng hony; and no man
appliede the hond to his mouth; forsothe
the puple dredde the ooth.
27 Forsothe
Jonathas herde not, whanne his
fadre swore to the puple; and he strau&yogh;t
out the cop of the &yogh;eerde, that he hadde
in the hoond, and he wette into the hony
combe; and he turnede his hoond to his
mouth, and the eyen of hym ben li&yogh;tned.
28 And answerynge oon of the puple seith,
Thi fader hath constreynyd the puple
with ooth, seiynge, Cursid be the man
that etith breed to day. Forsothe the
puple faylide.
29 And Jonathas seide, My
father hath disturblid the loond; &yogh;oure
self han seen, for myn eyen ben li&yogh;tned,
forthi that Y taastide a litil of this hony;
30 myche more if the puple hadde eeten of
the prei&yogh;e of her enemyes, that thei
foonden; whether not more veniaunce
hadde be doo in Philistees?
31 Thanne thei
smyten in that day the Philistees fro
the place of engynes vnto Hailon.
32 Doun
weried is the puple wel miche; and
turned to the praye, took sheep, and oxen,
and calues, and slewen in the lond; and
the puple eete with blood.
33 And thei
toolden to Saul, seiynge, that the puple
hadde synned to the Lord, etynge with
blood. The which seith, &YOGH;e han trespasside;
turneth to me ry&yogh;t nowe a greet
-- --
stoon.
34 And Saul seide, Beth &yogh;e scatered
into the comouns, and seye &yogh;e to hem,
that echon brynge to me his oxe and
wether; and sleeth vpon it, and etith,
and &yogh;e shulen not synne to the Lord,
etynge with blood. And so al the puple
brou&yogh;te echon an oxe in his hoond vnto
ny&yogh;t, and thei slowen there.
35 And Saul
bildide vp an auter to the Lord; and
thanne first he bigan to bilde an auter
to the Lord.
36 And Saul seide, Falle we
vpon the Philistyens bi ny&yogh;t, and waste
we hem vnto the morwetide li&yogh;t; ne
leeue we of hem a man. And the puple
seide, Al that good is seen to thee in
thin eyen, do. And the preest seith,
Nei&yogh; we hider to God.
37 And Saul counseylide
the Lord, seiynge, Whether shal
Y pursue Philistiym, if thou taake hem
into the hoondis of Yrael? And he answerde
not to hym in that day.
38 And
Saul seide, Aplieth hidir alle the corners
of the puple, and witith, and seeth, bi
whom fallith this synne to day.
39 The
Lord the saueour of Yrael lyueth; for
if bi Jonathan my sone it is doon, with
out a&yogh;en drawynge he shal die. To the
which no man a&yogh;en seide to hym of al
the puple.
40 And he seide to al Yrael, Be
&yogh;e seuerd into o parti, and Y with Jonathan
my sone shal be in o parti. And
the puple answerde to Saul, That good
is seen in thin eyen, do.
41 And Saul seide
to the Lord God of Irael, Lord God of
Yrael, &yogh;yue dom, what is, that thou answerst
not to thi seruaunt to day? If
in me, or in Jonathan my sone, is this
wickidnes, &yogh;yf shewynge; and if this
wickidnes is in thi puple, &yogh;if holynes.
And Jonathas and Saul ben taken; forsothe
the puple &yogh;ede out.
42 And Saul seith,
Leyeth lot betwix me and Jonathan my
sone.
43 And Jonathas is taken. Forsothe
-- --
Saul seide to Jonathan, Shewe to me
what thow hast doon. And Jonathas
shewide to hym, and seith, Taastynge
Y tastide in the cop of the &yogh;eerd that
was in myn hoond a litil of hony, and
loo!
44 Y dye. And Saul seith, Thes thingis
do to me God, and thes thingis adde, for
bi deeth thou shalt dye, Jonathas.
45 And
the puple seide to Saul, Thanne whether
Jonathas shulde dye, that hath doo this
greet helth in Yrael? that is felony; the
Lord lyueth, oon heer of the heed of
hym shal not fal into the erthe, for with
God he hath wrou&yogh;t to day. Thanne the
puple delyuerd Jonathan, that he diede
not.
46 And Saul wente a wey, and pursuede
not Philistiym; forsothe Philisteis
wenten a wey into her placis.
47 And, the
rewme stablid vpon Yrael, Saul fau&yogh;t bi
enuyroun a&yogh;ens alle his enemyes, a&yogh;ens
Moab, and the sones of Amon, and Edom,
and the kyngis of Saba, and the Philisteis;
and whidir euer he turnede hym silf,
he venkusede.
48 And, the oost gedrid, he
smoot Amalech, and he delyuerde Yrael
fro the hoond of his wastours.
49 Ther
weren forsothe the sones of Saul, Jonathas,
and Jesuy, and Melchisona; names of his
two dou&yogh;ters, name of the first goten
Merob, and name of the lasse Mycol.
50 And name of the wijf of Saul Achynoem,
the dou&yogh;ter of Achymaas; and the
name of the prince of his chiualrye Abner,
the sone of Ner, cosyn germeyn of
Saul.
51 Forsothe Cys was the fader of
Saul, and Ner, the fader of Abner, the
sone of Abyel.
52 Forsothe there was strong
batail a&yogh;ens Philisties alle the days of
Saul; wherfor whom euere Saul saw&yogh; a
strong man and able to bateil, he felawshipide
him to him silf.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|